Цхинвалы районы Сатихъары хъæумæ цалдæр азы размæ Сырх Дзуары комитеты хъæппæрисæй уагъд æрцыд дон. Цæрджытæ уæддæр хорз æмбæрстой, Годжиты хъæуы сæрмæ, доны ратæдзæны цы донæмбырдгæнæн рæзы, уый къаннæг кæй у æмæ æгас хъæуы цæрджытæн кæй нæ фаг кæндзæнис. Доны хæтæлтæ дæр сæм лыстæг кастысты. Домдтой, цæмæй сын байхъусой сæ фæндмæ æмæ, гæнæн уæвгæйæ, донæмбырдгæнæн бассейн дæр фестырдæр кæной æмæ хæтæлтæ дæр ивд æрцæуой стырдæр диаметрæй. Хъæубæсты цæрджытæ разы уыдысты хи фæрæзтæ æрæмбырд кæныныл дæр. Фæлæ Сырх Дзуары комитет загъта, зæгъгæ, мах нæ проект нал аивдзыстæм. Афтæмæй ныр цалдæр азы хъæуы цæрджытæн дон кæй нæ фаг кодта, уый аххосæй æвзæрстой бæрæг зындзинæдтæ. Сæ хъаст хастой алы инстанцитæм, суанг ма Президентмæ дæр.
Ацы бонты Цхинвалы районы администраци аскъуыддзаг кодта уыцы проблемæ. Администрацийы сæргълæууæджы хæстæ æххæстгæнæг Бибылты Валери зæгъы: «Сæрдыгон бонты Сатихъары хъæуы дон нал фæхæццæ кæны, хъæуы кæрæтты цы хæдзæрттæ ис, уырдæм. Йæ сæйраг аххосаг у, цæсгомджынæй дзы кæй нæ пайда кæнынц иуæй-иу цæрджытæ, уый. Ныр ацы проблемæ скъуыддзаг цæуы Хицауады руаджы. Нæ районы цæрæнуатон-коммуналон хæдзарады хъæуы цæрджыты æххуы-сæй æрæвнæлдта æхсæз километры дæрддзæгыл ног хахх уадзынмæ. Зæронд хаххы фæрсты уагъд цæуы стырдæр диаметры хæтæл. Уый фадат ратдзæнис, хъæуы цæрджытæй дон кæмæн нæ фаг кодта, уыдоны дæр донæй сифтонг кæнынæн», – зæгъы Бибылты Валери.
Уый ма куыд загъта, афтæмæй хъæуы цæрджытæ тынг цин кæнынц, дон сæм кæй уадзынц, уый тыххæй. Ныфс сæ ис, дон сæм ныр æдзух кæй цæудзæнис. «Нæ зæрды ма ис, хъæуы цæрджыты сыхтæм цы фæндæгтæ цæуы, уыдон дæр алæгъзытæ кæнын, цæмæй цъыф бонты зындзинæдтæ ма æвзарой».
Хъæуы цæрджытæ бузныджы ныхæстæ зæгъынц Цхинвалы районы къухдариуæгадæн æмæ паддзахады сæргълæууæг Бибылты Анатолийæн ахæм цæстуарзон æххуысы тыххæй.
Уазæгты Марфа
Comments are closed, but trackbacks and pingbacks are open.