Ацы аз сæххæст уыдзæн нæ адæмы иууыл рагондæр бæллиц – нуазыны донæй æнæкъуылымпыйæ ифтонг æрцæудзысты. Ууыл куыст цæуы цырд темптæй.
Уанат-Цхинвалы магистралон донуадзæны арæзтад хаст у 2018-2019 азтæн РХИ-йы социалон-экономикон рæзтæн ахъазгæнæг Инвестицион программæмæ.
Донæмбырдгæнæны ифтонгад сыгъдæг кæныны фæдыл куыстытæ æххæст æрцыдысты ивгъуыд азы кæрон. Советон Цæдисы рæстæджы Уанаты хъæуы цы цъайтæ уыд, уыдон сыджыты бын фесты æмæ сæ ныссыгъдæг кодтой тыхон ведомствоты кусджытæ. Проектгæнджытæ сарæзтой проект дренажтæ æмæ ног цъайтæн. Ам конд æрцыд геодезион куыстытæ дæр. Ныр марты райдиан генподрядон организаци ООО «СТМ-Юг» æрæвнæлдта ацы куыстытæм. Проекты аргъ у 400 милуан сомы. Донуадзæнæн йæ дæргъ у 16 км. бæрц. Куыстытæ хъуамæ конд фæуой азы кæронмæ.
Цхинвалы резервуартæм цы дон цæуы Брытъат æмæ Дзомагъæй, уымæн йæ дебет у 8-9 мин кубометры суткæйы мидæг. Уанат-Цхинвалы донуадзæнæй та суткæйы цæудзæн 15 мин кубометры дон.
Ныртæккæ куыст цæуы хицæн æмæ хицæн бынæтты. Присы хъæумæ хæстæг арæзт æрцыд дыууæ донæмбырдгæнæн бассейн. Кусджыты иу къорд та архайынц, доны хæтæлтæ æппæрст кæм хъуамæ æрцæуой, уыцы траншейты.
Донуадзæн эксплуатацимæ лæвæрд куы æрцæуа, уæд нæ горæты цæрджытæ бирæ азты цæмæ бæллыдысты, уый сæ къухы бафтдзæнис. Уалдзæджы æрбалæудимæ горæтмæ Едысæй цы дон цæуы, уымæн йæ дебет кæй æрхауы, уый тыххæй йæм баиу æрцæуынц Брытъат æмæ Дзомагъдоны суадæттæ. Уырдыгæй къæвдаты рæстæджы цы змæст дон фæцæуы, уый йемæ фæласы алыгъуызон брæттæ. Уый тыххæй бахъæуы сæ æрæхгæныны сæр. Цæрджытæ раст уый аххосæй фæисынц дон графикмæ гæсгæ. Ныр Цхинвал-Уанаты магистралон хæтæл арæзт куы æрцæуа, уæд цæрджытæ доны хъуагдзинад нал æвзардзысты.
БЕСТАУТЫ Валя
Comments are closed, but trackbacks and pingbacks are open.