Кæсойты Лаврент йæ царды сыфтæ фыста кæттагыл ахорæнтæй фыссæгау. Йæхæдæг-иу куыд дзырдта, уымæ гæсгæ уый рацыд уæззау, фæлæ тынг цымыдисаг царды фæндаг. Йæ удыхъæды æвидигæ энтузиазм æмæ энергиимæ алы хатт дæр хъахъхъæдта æмæ пропагандæ кодта национ культурæ æмæ традицитæ.
Лаврент хауы уыцы чысылнымæц нывгæнджыты номхыгъдмæ, кæцытæ сæ царды дæргъы бахъахъхъæдтой сфæлдыстадон сæрибардзинад æмæ куыстой æрмæстдæр ирон национ культурæйы хæрзæбонæн æмæ пропагандæ кодтой райгуырæн къуыммæ уарзондзинад. Уымæн ис ахæм куыстыты сери «Зæронд Цхинвал», зæгъгæ, цы ран уый æнæкæрон уарзтимæ ныв кæны зæронд Цхинвалы алы чысыл къуым дæр.
Йæ цъылынæджы æрмдзæфæн фæивддзаггæнæн никæимæ ис. Уæззау царды фæндæгтыл кæй рацыд, уымæ æнæкæсгæйæ, йæ куыстытæ семыдзаг сты ирд æмæ хъарм хуызтæй.
Нывгæнæг – уый æндæр дуне у. Кæсойты Лаврент – уый æндæр эпохæ у. Нывгæнæг йæ нывты кæронмæ райхалы йæ уд, рахæссы йæ адæмы тæрхонмæ.
Уыцы куыстытæй сæ иу у, кæцыйы райдыдта ныв кæнын Хуссар Ирыстонæн уæззау рæстæджы – 2008 азы фæстæ. Ацы æнæфæуд куыстæн ном дæр нæма радта, фæлæ дзы цы идейæ бавæрдта, уымæ гæсгæ йын схонæн ис «Ирыстоны иудзинад». Ацы куыст нырма дæр лæууы нывгæнæджы æрмадзы мольбертыл æвæрдæй. Куыста йыл рæстæгæй-рæстæгмæ, цыдæртæ-иу дзы фæивгæйæ, рагон мæсгуыты хуызтæ фæлындзгæйæ.
Йæ уды хъуырдухæн-иу фæбæрæг уыцы бынæттыл кусгæйæ, æмæ йæ ныхæстæм гæсгæ:
«Мæ куыст кæронмæ бакæндзынæн, дыууæ Ирыстоны куы баиу уой, уæд. Сфæлдыстадон уæлтæмæны гуырæн хъизæмарæй нæ, фæлæ Ирыстон кæй баиу, æрмæстдæр уый цинæй куы уа, уæд».
Ацы куыстмæ иу каст бакæнгæйæ дæр зæрдæ байдзаг уыдзæн абухгæ эмоцитæй, уд бауаддзæн ивгъуыды мысинæгты кæнæ райгуырын кæндзæн бæллицтæ. Æппæт уыдæттæн фенæн ис, дæсны нывгæнæг кæй райдыдта, фæлæ кæронмæ кæй нæ фæцис, уыцы нывы.
Зын у, тынг зын, уый афтæ раджы кæй ацыд не ‘хсæнæй… Уымæн йæ бон нырма уый бæрц саразын бауыдаид, уый бæрц…
Дзæгъиаты Альбинæ,
Аивæдты лицейы хуызфыссынады ахуыргæнæг
Comments are closed, but trackbacks and pingbacks are open.