Нæ сыл бандæвта пандеми

Ӕгас дунейыл хӕрзцъус рӕстӕгмӕ апарахат коронавирусон инфекци ӕмӕ тынг бирӕ бӕстӕтӕ тасы мидӕг цӕрынц. Ноджы ма ӕрвылбон дзыллон информацийы фӕрӕзтӕ хъусын кӕнынц ӕвирхъау хабӕрттӕ ацы низы тыххӕй ӕмӕ адӕмы онг бынтон амардтой. Ныридӕгӕн ацы низ уӕвынад кӕны 213 бӕстӕйы, фӕлӕ ма зӕххыл баззадис ахӕм бӕстӕтӕ дӕр, цы ран нырмӕ не сбӕлвырд коронавирусӕй рынчынтæ. Уыдон та сты Туркменистан, Цӕгат Корейӕ ӕмӕ цалдӕр африкӕйаг ӕмӕ сакъадахон бӕстӕйы.

Раздӕры Советон Цӕдисы бӕстӕтӕй ӕрмӕстдӕр Туркменистаны нӕй коронавирус. Дзыллон информацийы фӕрӕзты минӕвӕрттӕ ӕмӕ Дунейы ӕнӕниздзинад хъахъхъӕныны организаци (ВОЗ) куыд ӕмбарын кӕнынц, афтӕмӕй, ома, ацы бӕстӕйы къухдариуӕгад ӕмбӕхсы рынчынты ӕмӕ низӕй фӕмардуӕвджыты. Ууыл, зӕгъгӕ, дзурӕг у уый дӕр, ӕмӕ ВОЗ-ы кусджыты нӕ уадзынц сӕ территоримӕ.

Коронавирусы инфекци куы фӕзындис, уӕд Туркменистаны къухдариуӕгадӕн ахӕм ахаст нӕ уыд ацы низмӕ. Февралы ӕмӕ марты мӕйы райдианы бӕстӕйы паддзахадон информацион фӕрӕзтӕ ацы низы тыххӕй фыстой ӕмӕ дзырдтой, фӕдзӕхстой адӕмы, цӕмӕй сӕхи бахизой низӕй, мыхуыр кодтой информацион буклеттӕ ӕмӕ бынӕттон цӕрджытӕн лæвæрдтой инструкцитӕ. Фӕлӕ апрелы мӕйы райдианы бӕстӕйы къухдариуӕгад йӕ позици фӕивта, газеттӕй ӕмӕ телеуынынадӕй низы кой фесӕфтис,  ӕгӕрыстӕмӕй ма «коронавирус»  дзурын дӕр никӕй уадзынц. Маскӕтӕ ӕмӕ æрмкъухтæ чи дары, уыдоны та кӕнынц бӕрндзинадмӕ.

Туркменистаны президент Гурбангулы Бердымухамедов йӕхӕдӕг у дохтыр. Куыста дæндæгты дохтырæй, уыд поликлиникӕйы сӕйраг дохтыр, лекцитӕ каст медицинон институты ӕмӕ цалынмӕ президент не ссис, уӕдмӕ та уыд бӕстӕйы Ӕнӕниздзинад хъахъхъӕныны министр. Куыд бӕстӕйы къухдариуӕггӕнӕг, афтӕ йӕхицӕй тынгдӕр ничи тыхсы йӕ адӕмыл, се ‘нӕниздзинадыл ӕмӕ исы алыгъуызон мадзӕлттӕ коронавирусимӕ баст проблемон фарстатӕ аиуварс кӕныны фӕдыл.

Абоны онг дӕр Туркменистаны нӕма ис конд карантинон режим, фӕлӕ горӕттӕм бахизӕнты  ӕмӕ стыр фӕндӕгтыл ӕвӕрд ӕрцыдысты блокпосттӕ, цӕмӕй бӕлццӕттӕн барой сӕ тӕвд. Автобусты ӕмӕ адӕм бирӕ кӕм вӕййы, уыцы бынӕттӕ дезинфекци кӕнынц. Сæрмагонд режим сарӕзтой ахӕстӕттӕн дӕр, – хиуӕттимӕ сӕ нал уадзынц ӕмбӕлын ӕмӕ ма сӕм нӕй гӕнӕн хӕринӕгтӕ хӕссыны бар дӕр. Сӕ бӕстӕйы арӕнтӕй чи бахизы, уыдоны сӕвӕрынц карантины 14 боны ӕмгъуыдмӕ.

Бӕстӕйы президент сиды цӕрджытӕм, цӕмӕй сӕ цӕрӕнуӕттӕ, скъолатӕ, рынчындӕттӕ ӕмӕ ма куыстуӕтты бӕстыхӕйттӕ «гармала» кӕрдӕджы фӕздӕгӕй дезинфекци кӕной. Ацы кӕрдӕгӕй фыдӕлтӕй фӕстӕмӕ Азийы цӕрӕг адӕм пайда кӕнынц алыгъуызон низты ныхмӕ ӕмӕ йӕ Туркменистаны дӕр нымайынц эффективоныл. Адӕмы ‘хсӕн ма ацыд дам-дум дӕр, ома, фысы сӕр ӕмӕ къӕхтӕй арӕзт хӕринаг хорзӕрдӕм ӕндавы адӕймаджы ӕнӕниздзинадыл ӕмӕ стыр ахъаз у коро-навирусы инфекци амарынӕн. Уый фӕстиуӕгӕн цыбыр рӕстӕгмӕ фӕзынаргъ сты фысы сӕр ӕмӕ къӕхтӕ.

Эпидеми иннӕ бӕстӕты адӕмы цард куыд схӕццӕ кодта ӕмӕ сӕ куыд стыхсын кодта, ахӕм уавæр нӕй Туркменистаны. Ӕрӕджы се скъолаты уагъд ӕрцыдысты фӕстаг дзӕнгӕрӕджы бӕрӕгбонон мадзӕлттӕ, ӕххӕст цӕуынц алыгъуызон спортивон мадзӕлттӕ, динон бӕрӕгбонтӕ, ӕмӕ сӕхи цӕттӕ кӕнынц сӕрды улӕфтытӕм. Гурбангулы Бердымухамедов ма бафӕдзӕхста, цӕмӕй ӕппӕт паддзахадон бӕрӕгбонтӕ раздӕрау нысан ӕрцӕуой ӕмбӕлон уагыл ӕмӕ дзы бынӕттон цӕрджытӕ активон хайад райсой. Иннӕ азтау дзы 9 майы дӕр уагъд ӕрцыдис ӕфсӕддон парад. Футболы националон чемпионат дӕр уагъд цӕуы графикмӕ гӕсгӕ ӕмӕ дзы вӕййынц ацы спортӕн табугӕнджытӕ дӕр.

Гурбангулы Бердымухамедов, дохтыр уӕвгӕйӕ, тынг хорз ӕмбары коронавирусы тӕссагдзинад. Ацы низ Китайы куы фӕзынд, уӕд Туркменистаны президент бардзырд радта, цӕмӕй йе ‘мбӕстӕгтӕй фӕсарӕнты чи ис, уыдон ӕвӕстиатӕй ӕрыздӕхой сӕ райгуырӕн бӕстӕмӕ. Китайы уӕлдӕр ахуыргӕнӕндӕтты тынг бирӕ фӕсивӕд ахуыр кӕны Туркменистанӕй ӕмӕ уыдоны дӕр цыбыр рӕстӕгмӕ ӕркодтой. Уый фӕстӕ сӕхгӕдтой сӕ арӕнтӕ ӕмӕ никӕй уагътой мидӕмӕ. Цы товартӕ сӕм ласынц фӕсарӕнтӕй, уыдоны ныры онг дӕр кӕнынц дезинфекци.

Ахӕм сӕвзӕргӕ уавæры бӕстӕйы президент растыл банымадта, зӕгъгӕ, карантинон режимы фӕстиуджытӕ низӕй карздӕр уыдзысты ӕмӕ уый фӕстиуӕгӕн райста ахӕм мадзӕлттӕ. Раст къахдзӕфтӕ сарӕзта Гурбангулы Бердымухамедов ӕви фӕрӕдыдис, уый рӕстӕг равдисдзӕнис.

Мыхуырмæ йæ бацæттæ кодта

ДЖИОТЫ Александр