Ныртæккæ, хъыгагæн, зарæджы текстты мидисмæ зарæггæнджытæ уадиссаг сæ хъус нал дарынц. Æрмæст, музыкæ зæрдæмæ цæуæд, уый йедтæмæ, зæгъгæ, ныхæстæн ницы нысаниуæг ис. Æмæ фылдæр зарæггæнджытæ цыдæр далум-уалумтæ æрымысынц. Нæдæр сæ хъуыды вæййы, нæдæр – рифмæ, нæдæр дзырдтæ кæрæдзийыл баст вæййынц …
Продюсер Skif Bazzaty (Бӕззаты Скиф) ӕмӕ зарӕггӕнӕг Shaanti (Хъодалаты Мария) ныммыхуыр кодтой сӕ фыццаг зарӕг “Between US” (Нӕ дыууӕйы ‘хсӕн).
Хъодалаты Мария у Хуссар Ирыстоны паддзахадон университеты фӕсарӕйнӕг ӕвзӕгты факультеты студенткӕ. Фыссы зарджытӕ ӕмӕ музыкӕ. Йӕ зарджытӕй цалдӕримӕ ивгъуыд аз Цӕгат Ирыстоны телеуынынады конкурсы ралӕууыд ӕндӕр курдиатджын студенткӕ Джиоты Любæ ӕмӕ райста сӕйраг призтӕй иу. Йӕхӕдӕг, Хъодалаты Мария райста сфӕлдыстадон фæсномыг Shaanti.
Мария, æрыгон уæвгæйæ, Ирыстонæн йæхи бауарзын кодта йæ зарджытæй. Уый æрмæст уникалон хъæлæсы хицау нæу, фæлæ ма у цæвиттойнаг хæрзæгъдауы миниу-джытыл хæст дæр.
«Фыццæгæм июны рацыд нӕ фыццаг иумӕйаг зарӕг, ӕз дзы ралӕууыдтӕн вокалисткӕйӕ, Скиф та дзы райгуырын кодта ӕнӕнхъӕлӕджы ӕнахуыр зарӕг. Мӕ композици уыд уарзондзинадыл ӕмӕ уымӕ гӕсгӕ уыд сабыр, мелодикон. Уымӕй продюсер скодта радиойы зарӕг клубон мелодийы ӕууӕлтимӕ», – загъта Хъодалаты Мария.
«Мах фӕнд кӕнӕм не ‘мгуыстад адарддӕр кӕнын ӕмӕ ныффыссын ног зарджытӕ ирон ӕвзагыл дӕр. Бӕззаты Скиф у аив зӕлтимӕ кусыны дӕсны. Хъӕлӕс ныффыссын ХИПУ-йы студийы, дарддӕр ыл архайы уый», – йæ ныхасмæ бафтыдта чызг.
Зарӕгмӕ байхъусӕн ис ӕппӕт музыкалон фӕзуæтты дӕр интернеты.
Йӕ ныхӕстӕм гӕсгӕ, сфӕлдыстадон тандемӕн уый йӕ иунӕг куыст нӕ уыдзӕн.
Бӕззаты Скифимӕ ӕмгуыстадӕй дарддӕр ма æрыгон чызг фыссы иумӕйаг альбом дæр Джиоты Любæимӕ.
ДРИАТЫ Лейла
Comments are closed, but trackbacks and pingbacks are open.