3-ӕм февралӕй 10-æм февралмæ Хуссар Ирыстоны территорийыл фыдракæнд не ‘рцыдис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы.
Фӕндагон змӕлды ӕдасдзинады инспекци къуырийы дӕргъы сбӕлвырд кодта 210 фӕткхалӕн цауы. Уыдонӕй 11 уыдысты нозтджынӕй машинӕ скъӕрыны цаутӕ.
Милицийы экономикон фыдракӕндтӕ ма ӕруадзыны управленийы кусджытӕ нӕ республикӕйы афтекты рейдон мадзӕлттӕ ауадзыны фӕстиуӕгӕн сконфискаци кодтой Гуырдзыстоны уагъд медицинон препараттӕ. РХИ-йы Хицауады Уынаффӕмӕ гӕсгӕ 2007 азӕй фӕстӕмӕ нӕ республикӕйы территорийыл уӕй кӕныны бар нӕй гуырдзиаг медицинон препараттӕн.
Наркотикон буарадты æрзылд контроль кæныны кусджытæ баурæдтой 45-аздзыд горӕттаг цӕрӕджы, кӕцымӕ сӕ зӕрдӕ фехсайдта ӕнӕзакъонӕй наркотикон буарад «марихуанайӕ» спайда кӕнынмӕ.
67-аздзыд Цхинвалы цӕрӕджы автомашинӕ «ВАЗ-2106»-ы бын бахаудта 50-аздзыд горӕттаг цӕрӕг. Бӕлццоны уӕлӕнгай цӕфтимӕ аластой рынчындонмӕ. Шофыр разынд нозтджын.
38-аздзыд горӕттаг цӕрӕг нозтджынӕй нӕ сарӕхст йӕ автомашинӕ «ВАЗ-2109» скъӕрын, фехӕлдта фӕндагон æдасдзинады фӕткойтӕ ӕмӕ сӕмбӕлд ӕндӕр автомашинӕ «Mitsubishi Pajero»-йыл, кӕцыйы шофыр дӕр разынд горӕты 38-аздзыд цӕрӕг. Аварийы фӕстиуӕгӕн ма бахъыгдард сты фӕндаджы фӕсвӕд лӕууӕг дыууӕ машинӕйы.
Джиоты Аланы проспектӕй Тасойты Иналы уынгмӕ азилӕны ӕрцыд фӕндагон-транспортон цау. Нӕ горӕты 24-аздзыд цӕрӕг йӕ автомашинӕ «Nissan» скъӕргӕйӕ сӕмбӕлд ӕндӕр автомашинӕ «Toyota»-йыл, кӕцыйы шофыр разынд 30-аздзыд Цхинвалы цӕрӕг. Аварийы фӕстиуӕгӕн «Toyota»-йы шофыр уӕлӕнгай цӕфтимӕ бахауд рынчындонмӕ. Фӕндагон змӕлды ӕдасдзинады инспектортӕ бӕрӕг кӕнынц аххосджыны, уымӕн ӕмӕ дыууӕ шофыр дӕр зӕгъынц, зӕгъгӕ, светофоры цъӕх рухсыл ахызтысты.
Comments are closed, but trackbacks and pingbacks are open.