7-æм декабры Цхинвалы районы Дменисы Культурæйы хæдзармæ æрбацыд бирæ адæм. Се ʻхсæн уыдысты районы администрацийы культурæйы управленийы хистæр Гаглойты Ростик, фысджытæ, ахуыргæнджытæ, скъоладзаутæ æмæ хъæуы цæрджытæ. Нысан кодтой фыссæг, поэт, публицист æмæ æхсæнадон архайæг, Хетæгкаты Къостайы номыл паддзахадон премийы лауреат Хъазиты Мелитоны 75 азы юбилей. Мадзал бацæттæ кодтой Культурæйы хæдзары директор Икъаты Ануси æмæ библиотекæйы кусджытæ Джиголаты Заремæ æмæ Æлборты Мадинæ.
Хъазиты Мелитоны цард æмæ сфæлдыстады тыххæй доклад бакаст Дменисы астæуккаг скъолайы 9-æм къласы ахуыргæнинаг Уалыты Аслан. Уый банысан кодта, зæгъгæ, Мелитон æрмæст æнтыстджын сфæлдыстадон кусæг нæу, фæлæ ма у иттæг хорз æмбæстаг дæр. Цы бирæнымæц чингуытæ рауагъта, уыдон дзурæг сты фыдыбæстæ, рæстдзинад æмæ адæммæ йæ хорз æмæ уарзон ахастыл. Стыр аргъ кæны йæ фыдæлтæн, йæ адæмæн æмæ уыдæттыл йæ фыстыты цайдагъ кæны кæстæр фæлтæры дæр.
Хъазиты Мелитоны æмдзæвгæтæ аив бакастысты Дменисы скъолайы ахуыргæнинæгтæ Хацырты Каролина æмæ Лолоты Дауыт.
Ирыстоны фысджыты цæдисы уæнг Гæбæраты Юри та йæ раныхасы банысан кодта, зæгъгæ, «абон ардæм уыйбæрцæй кæй æрбацыдыстут уый дæр дзурæг у ууыл æмæ стыр аргъ кæй кæнут Мелитонæн, кæй уарзут ирон литературæ æмæ ирон поэзи».
Уыимæ ма банысан кодта, зæгъгæ, Мелитон хæрзæвзонгæй райдыдта сфæлдыстадон куыст, бирæ бакуыста, фæлæ афтæ никуыма загъта фаг мын у. Йæ разы цы стыр æмæ ахсджиаг хæстæ æвæры, уыдон æххæст кæнынмæ абон дæр æрывналы раппæлинаг фæндон æмæ тырнындзинæдтимæ. Иу хорздзинад та йæм раныхасгæнæг уый рахуыдта æмæ Мелитон дæрдтыл дзурын нæ уарзы, зæгъын æй цы фæфæнды, уый фæзæгъы цыбыртæй.
Мелитоны сфæлдыстадон изæры ма раныхас кодтой æмæ сæ цымыдисон хъуыдытæ дзырдтой районы администрацийы культурæйы управленийы хистæр Гаглоиты Ростик, Культурæйы хæдзары директор Икъаты Ануси æмæ Дменисы хъæуы цæрæг, Мелитоны скъолайон æмгар Лолоты Владимир.
Культурæйы хæдзары хæдархайгæ къорд (йæ разамонæг Козаты Радион) сæххæст кодта цалдæр ирон кафты. Æвзонг зарæггæнæг Тыджыты Мадинæ та йæ аив зарджытæй барухс кодта залы уæвæг æмбæстæгты зæрдæтæ.
Кæронбæттæны Мелитон бузныджы ныхæстæ загъта мадзал бацæттæгæнджытæн, чи йæм æрбацыд æмæ дзы хайад чи райста, уыдонæн æмæ ныфс бавæрдта, дарддæр дæр йе сфæлдыстадон хуынтæй кæй лæггад кæндзæнис бирæ кæй уарзы, уыцы Ирыстонæн, йæ адæмæн.
Гæззаты Иван
