МЕДИКТЫ АРВЫСТОЙ РЕАБИЛИТАЦИМÆ

Республикæйы цæрджыты æнæниздзинад фæхуыздæр кæныны фæдыл социалон программæйы фæлгæтты Президент Бибылты Анатолийы хæслæвæрдмæ гæсгæ  15 апрелы, коронавирусы инфекцийæ рынчын чи уыд, уыцы медицинон кусджытæй фыццаг къорд  16 адæймаджы скондæй, реабилитацимæ ацыд Есентукы горæтмæ. Уыдон дыууæ къуырийы уыдзысты медицинон центр  «Юность»-ы, цыран æппæт уавæртæ дæр арæзт æрцыд комфортон улæфынæн  æмæ æнæниздзинад фæхуыздæр кæнынæн.

 

Балцы тыххæй йæ тæлмæнтæ радзырдта Цхинвалы клиникон диагностикон лабораторийы дохтыр Цхуырбаты Маринæ. Уый бузныджы ныхæстæ загъта республикæйы сæргълæууæг æмæ Æнæниздзинад хъахъхъæныны министрады къухдариуæгадæн.

«Ахæм бынæтты, куыд Кавказы минералон дæтты, бæлвырддæрæй та Ессентукы, æнæниздзинад фæхуыздæр кæныны фадат адæймагмæ арæх не ‘рхауы. Махæй алчи дæр ацы балцæй стыр ныфс æвæры. Фидарæй нæ уырны æрмæст уый нæ, æмæ нæ балц æнтыстджын уыдзæн æмæ фæстæмæ æнæнизæй æрыздæхдзыстæм, фæлæ ма нæ ныфс ис, кæй æрыздæхдзыстæм æхсызгон тæлмæнтимæ дæр», – загъта уый.

Банысан кæнын хъæуы уый, æмæ Республикæ Хуссар Ирыстоны территорийыл цæрæг Уæрæсейы Федерацийы æмбæстæгтæн ахæм фадат радта Уæрæсейы Федералон медико-биологон агентад, æнæмæнгхъæуæг медицинон фæдзæхстады системæйы фæлгæтты.

Цæмæй медперсоналæй хос кæнынмæ æрвыст чи æрцыдаид, уыдон равзæрстаиккой, уый тыххæй Æнæниздзинад хъахъхъæныны министрад сарæзта сæрмагонд къамис, кæцыйы сконды сты дохтыртæ. Реабилитацимæ цы къорд арвыстæуыд, уый дæр æвзæрст æрцыд уыцы къамисы уынаффæмæ гæсгæ. Дарддæр фæнд цæуы, цæмæй реабилитацимæ æрвыст цæуой, Æнæниздзинад хъахъхъæныны кусджытæй коронавирусæй уæззау рынчын чи уыд æмæ афтæхуыйнæг «сырх зонæйы» чи куыста, æрмæст уыдон нæ, фæлæ ма  республикæйы цæрджытæй дæр уыцы вирусæй уæззау рынчын чи уыд, уыдон дæр.