Кусынц аварион бæстыхайы

Ацы бæстыхайы фæрсты чи фæцæйцæуы, уымæн йæ хъустæ æнæмæнг ацахсдзысты музыкæйы æхцон зæлтæ.

Музыкæйы ахадындзинад æгæрон у æмæ йæ цырынгæнджытæ та алкæмæн дæр хæссынц хъæлдзæгдзинад, уæнгрогдзинад. Музыкалон аивады уыцы пайдайаг æвæрæнтæй кæстæрты, нæ сомбоны музыкантты, чи цæттæ кæны, уыдонæй у Цхинвалы Битеты Павелы номыл 2-аг музыкалон скъола дæр. Ам цæстуарзонæй лæггад кæнынц йæ ахуырдзаутæн. Скъолайы директорæй къорд азты дæргъы кусы йæ хъуыддаджы дæсны специалист Æлборты Дианæ. Уымæн коллективимæ ис хъарм ахастытæ, алчи дæр сæ йæ куыстмæ кæсы бæрндзинады цæстæй, сæ зонындзинæдтæ æнæвгъауæй амонынц кæстæртæн æмæ сын ис æнтыстытæ дæр.

Æрæджы фембæлдтæн Æлборты чызгимæ æмæ мæ базонгæ кодта, ахуыры фæстиуджытæ æмæ ма цухдзинæдтимæ. Цухдзинадыл фыццаджыдæр коллектив нымайы, сæ бæстыхайы аварион уавæр. Раздæр ам уыд профтехахуыргæнæндон æмæ 26 азы размæ ацы агъуыст радтой музыкалон скъолайæн. Раст зæгъгæйæ, дзы ницæмæй барухс сæ зæрдæ, 2019 азы иу къласы цар дæр æркалд æмæ уымæ гæсгæ иу афæдз скъола уыд æхгæд. Уый фæстæ кусын райдыдта, кæд йæ уавæр нæ фæхуыздæр, уæддæр. Бæргæ тыхсынц ахуыргæнджытæ, сæ уавæр æмбарын кæнынц æмбæлон органтæн, фæлæ йæ Инвестпрограммæмæ нæ бахастой. Ныр та сæ рæстагон домæн хъуамæ æрæвæрой республикæйы ног Президент Гаглойты Аланы раз. Ныфс сæ ис, сæ фарст сын æвæрццагæй кæй аскъуыддзаг кæндзæн, уымæй.

Скъолайы æдæппæт ахуыр кæны 200 ахуыргæнинаджы æмæ сæ алчи дæр равзæрста , йæ зæрдæмæ тынгдæр цы музыкалон аивад цæуы, уый. Ам иууыл иумæ ис 7 хайады: пианино, скрипкæ, ирон фæндыр, аккордеон, доули, домрæ æмæ зарыны хайад. Кусы дзы, йæ хъуыддаг хорз чи зоны, æвзонг фæлтæры музыкæйыл чи цайдагъ кæны, ахæм 30 ахуыргæнæджы. Сæ фылдæр сты Республикæ Хуссар Ирыстоны сгуыхт ахуыргæнджытæ: Æрсойты Светланæ, Ингæ, Пухаты Нинæ, Мкртчян Иннæ, Босыкты Гиули, Санахъоты Ларисæ, Тедеты Аленæ, Цъæритты Дзерассæ, Хъæцмæзты Иринæ амонынц фортепьяно, фæндыры ахуыргæнджытæ сты Хъуызилты Ноннæ, Тедеты Аленæ æмæ Къæбысты Сæрмæт, аккордеоныл цæгъдын сын амонынц Усович Маринæ æмæ Бекъойты Марфа. Скрипкæйы ахуыргæнджытæ нæ республикæйы дыууæйы йедтæмæ нæй æмæ сæ иу, республикæйы сгуыхт ахуыргæнæг Котолиты Кетино, кусы ацы скъолайы. Æлборты Феликсы номыл Цхинвалы музыкалон ахуыргæнæндоны скрипкæйы хайад нæй æмæ дарддæр ахуыр кæй бафæнды ацы хаххыл, уыдон ацæуынц Дзæуджыхъæумæ. Доулийы (гуымсæг) ахуыргæнæгæй та кусы Дудайты Къоста. Дарддæр Æлборты чызг куыд банысан кодта, афтæмæй сæм ис теоретикон хайад дæр æмæ дзы кусы 5 сгуыхт ахуыргæнæджы. Азы кæрон ахуырдзаутæн ахуыры вæййы хыгъдон концерттæ æмæ сæ хъомылгæнинæгтæй кæддæриддæр баззайынц разыйæ. Уымæй дарддæр ма бæрæгбонон изæрты дæр сæхи равдисынц хорз. Ацы азы апрелы мæймæ аккордеоны ахуыргæнæг Бекъойты Марфа цæттæ кæны мысæн изæр Битеты Павелы номыл.

Скъолайы куысты æнæмæнгхъæуæг у нотæты алыхуызон литературæ, фæхай сын кæнынц, фæлæ уыдон фаг не сты. Уымæ гæсгæ ахуыргæнинæгтæ хъæуæг литературæ бацагурынц интернеты.

ХУЫБИАТЫ Никъала