КУСЫНЦ, АРХАЙЫНЦ

Цхинвалы районы администрацийы цæрæнуатон-коммуналон хæдзарад цахæм куыстытæ бакодта ацы аз æмæ ма йын бакæнинаг цы ис, уый тыххæй нын радзырдта йæ хистæр Уазæгты Мевлуд:

– Районы цы 15 хъæууон администрацийы ис, уыдонæй алкæмæн дæр ис йæхи проблемæтæ, фæлæ мах рахицæн кæнæм фыццаградонты æмæ нæм цы æхцайы фæрæзтæ ис, уыдонæй бавналæм се скъуыддзаг кæнынмæ. Районы хистæр Мамытаты Вахтангы хæсмæ гæсгæ, хъæуты цæрджыты раз цы проблемæтæ сæвзæрынц, уыдон аскъуыддзаг кæнæм рæстæгыл. Хъæутæм уагъд цæуы доны хæтæлтæ, сцалцæг кæнæм фæндæгтæ æмæ хъæуты цы административон бæстыхæйттæ ис, уыдонмæ нæ хъус дарæм. Скъолаты цы хъармгæнæн системæтæ ис, уыдон арæх фехæлынц æмæ уыдон дæр сцалцæг кæнæм. Дон рауагътам Гуджабармæ, донуадзæны хæтæлтæ цалцæг æрцыдысты Къостайыхъæуы. Фæндæгтæ тынг фехæлынц уалдзæджы къæвдаты фæстæ, цæугæдæтты сæрты цы хидтæ ис, уыдонæн разианчындæуы. Уыдон саразынмæ цырд куынæ фæлæууой, уæд цæрджытæ февзарынц зындзинæдтæ. Хатт бахъæуы техникæ ракæнын, цы куысты куыстой, уый ныууадзгæйæ. Уый фæстæ та аздæхынц фæстæмæ сæ куыстмæ. Техникæйы цухдзинад куы нæ уыдаид, уæд районы цæрæнуатонком-муналон хæдзарадæн фылдæр куыстытæ бакæнын æнтысид. Кæцы хъæуы фæкусæм, кусджытæ дæр уыцы хъæуккæгтæ вæййынц. Уыцы фæлтæрддзинад нæм рагæй ис, кусæг куы зона йæхицæн æй аразы, уæд лæмбынæгдæр, зæрдиагæйдæр бавнала куыстмæ.

Уый ма куыд загъта, афтæмæй майы мæйы цалцæггæнæн куыстытæ цыд Сатихъары хъæуы скъолайы. Уым фембæлд уыд, цыппор азы размæ скъола каст чи фæци, уыцы рауагъдонтæн. Уыдон ацы фембæлд рагацау снывæстой, цæмæй скъолайы цы цалдæр рауагъдон ис, уыдон дæр сбуц кодтаиккой. Бахатыдысты Цхинвалы районы сæргълæууæгмæ, цæмæй сын бар радтаид бæрæгбон уæрæх масштабы  банысан кæнынæн. Уый сæ фарсмæ дæр балæууыд æмæ ма скъолайы цалцæггæнæн куыстытæ дæр сарæзта.

Фæстаг азты зынгæ фæфылдæр сты районты ФАП-тæ. Уыдон хосгæнæн фæрæзтæй ифтонг кæнынц дæрддзæф хъæуты цæрджыты. Ацы медицинон уагдæтты дæр арæх бахъæуы цæрæнуатон-коммуналон хæдзарады æххуыс.

Уазæгты Мевлуд зæгъы, зæгъгæ, цæрæнуатон-коммуналон хæ-дзарад ацы бонты æрæвналдзæн, Сатихъар æмæ Хелцуайы хъæутæм цы донхæры къанау цæуы, уый сыгъдæг кæнынмæ дæр.

УАЗÆГТЫ Марфа