163 азы размæ ссыгъд Хетæгкаты Леуаны фырт Къостайы рухс стъалы. Рацыд æнус æмæ æрдæгæй фылдæр гениалон поэты райгуырды бонæй фæстæмæ, фæлæ абоны онг йæ рæстдзæф хъуыдытæ сты актуалон. Уый фæдзæхста: «Цæйут, æфсымæртау, радтæм нæ къухтæ, абон кæрæдзимæ Иры лæппутæ!..».
Æгас Ирыстоны скъолатæ æмæ уæлдæр ахуыргæнæндæтты æмрæнхъ Тыбылты Алыксандры номыл Хуссар Ирыстоны паддзахадон университеты дæр ссардтой ирон æвзаг æмæ литературæйы бындурæвæрæг Хетæгкаты Къостайы ном. Ам уагъд æрцыд цымыдисон мадзал поэты райгуырдыл 163 азы сæххæсты боны цытæн, кæцыйы бацæттæ кодта университеты уырыссаг филологи, фæсарæйнаг æвзæгты æмæ журналистикæйы факультетты декан Биазырты Аллæ. Бæрæгбонон мадзалмæ фæуазæг сты университеты профессортæ, ахуыргæнджытæ æмæ студенттæ, кæцытæ æрдзырдтой генийы цард æмæ сфæлдыстадыл.
Мадзалы хайадисæг студенттæ бакастысты докладтæ, профессортæ Плиты Гацыр æмæ Хъазиты Мелитон Къостайы тыххæй цы чингуытæ ныффыстой, уыдоны фæдыл. Афтæ ма уыдон аив бакастысты поэты æмдзæвгæтæ. Университеты ахуыргæнджытæ дæр сæ хъуыдытæ æмæ æнкъарæнтæ райхæлдтой уæрæх аудиторийы раз, сæ раныхæсты банысан кодтой фыссæджы куырыхон æмæ гениалондзинад.
Хетæгкаты Къостайы ном хъуыстгонд кæй у æппæт дунейыл, уымæй сæрыстыр сты ирон адæм. Йæ æмдзæвгæтæ тæлмацгонд æрцыдысты 105 æвзагмæ. Цæй мидæг уыд йе сфæлдыстады тых æмæ цæмæй æлвæста йæхимæ дзыллæты? Къоста зарыд сæрибарыл, тох кодта æмæ агуырдта рæстдзинад, уыд мæгуыр адæмы сæрылхæцæг. Йæ хъуыдытæ кæддæриддæр æвдыста æргом: йæ гæрзтæ – фыссæн сис æмæ гæххæт. Йæ ныхас – комкоммæ, хаст та æрцыд дыууæ хатты. Фæлæ Иры сæрхъызой нæ уагъта йæ тох. Ныры рæстæджы Къостайау ныфсхаст æмæ рæстдзинады сæрыл дзурæг адæймæгтæ уæлдай тынгдæр хъарынц адæммæ.
БАГАТЫ Элинæ,
ХИПУ-йы æхсæндунеон журналистикæйы хайады студенткæ
Comments are closed, but trackbacks and pingbacks are open.