Барадхъахъхъæнæг органты кусджытæ рейдтæ уадзынц, цæмæй бæрæг кæной, карантины режим чи халы, ахæм магазинты хицæутты.
Уыдоныл арæзт æрцæуы административон акттæ, кæцытæ барвитынц «Югосетпотребнадзор»-мæ. Уым нын куыд загътой, афтæмæй йын карантины режим фехалыны тыххæй административон бæрндзинадмæ æркодтой цалдæр магазины хицауы. Кæд æмæ официалонæй сæ магазинтæ æхгæд сты, уæддæр сæ рæстæгæй-рæстæгмæ бирæтæ фегом кæнынц. Ивар æрцыд цалдæр адæймаджы дæр, кæцытæ нæ хъахъхъæдтой хиизоляцийы режим.
Нæ горæты машинæты хæйт-тæ уæйгæнæн магазинтæй сæ иуы хицау разы нæу ацы ма-дзæлтты.
«Ныр æртыккаг къуыри нæ кусæм, бæрæг нæу, кæд скусдзыстæм, уый дæр. Æртагуæйгæнæн станцтæ кусынц æмæ цæмæннæ хъуамæ кусæм мах дæр. Машинæтæ уынгты дыууæрдæм кæнынц æмæ сæ хицæутты бахъæуы, кæй зæгъын æй хъæуы, маши-нæты хæйттæ балхæныны сæр».
Æнгæс уавæрты сты, дарæсæй чи базар кæны, уыцы амалиуæггæнджытæ дæр. Астæуккаг нымадмæ гæсгæ, нæ горæты цы магазинтæ ис, уыдон иу хатæнæн фидынц 10 мин сомæй 25 мин соммæ. Хицауад уынаффæ рахаста, цæмæй æфснайæн бангæй бизнес кæныны тыххæй, кредиттæ чи рахаста, уыдонæн сæ хæс фидыны æмгъуыдæн саразой каникултæ. Фæлæ хисæрмагонд хæдзæртты тыххæй нæй уый зæгъæн, уыдон сæ фиддонтæ, нæ ивынц.
«Æз уæй кæнын машинæтæн сæрдæн æрмæджытæ. Мæ магазины дæр мын сæхгæдтой, кæд машинæты бензинау, сæрдæн æрмæг дæр хъæуы, уæддæр. Маслатæ дæр æртаджы номхыгъдмæ хауынц», – равдыста йе ‘нæразыдзинад магазины хицау дæр.
Уый ма загъта, зæгъгæ, арендæйæ дарддæр, куыстмызд фидын хъæуы специалист-консультантæн дæр.
Куыд зонæм, афтæмæй йæ куысты график нæ аивта БТК-4. Уый кусы раздæрау, фæлæ хъахъхъæны санитарон-дистанцион нормæтæ.
Сæнуадзæн завод «Ирон сæн»-ы генералон директор Алексей Цапаев куыд зæгъы, афтæмæй COVID-19-ы пандемийы тасы тыххæй ивындзинæдтæ æрцыд сæ куыстуаты дæр. «Хицауад цы мадзæлттæ бакодта коронавирусы тыххæй, уыдон æнæбандавгæ нæ фесты нæ куыстуатыл дæр. Мах нæ сæнтæ цы объектты уæй кодтам, уыдон ныртæккæ сты æхгæд. Арæн æхгæд у Уæрæсеимæ дæр. Цæгат Ирыстонмæ нæ продукци æрмæст уæй кæнынмæ нæ ластам, фæлæ ма уырдыгæй ластам бирæ æрмæджытæ дæр, кæцытæ æнæмæнгхъæуæг сты нæ кондадæн. Ныр «Иронсæн» кусы рæстæмбис режимы».
Амалиуæггæнæг ма банысан кодта, завод ныртæккæ, сæйраджыдæр, кæй кæны монтажон куыстытæ. Куыстмæ рахизынц æрмæстдæр цалдæр специалисты. Иннæ кусджытæ та сты сæ хæдзæртты.
УАЗÆГТЫ Марфа
Comments are closed, but trackbacks and pingbacks are open.