«Хуссар Ирыстоны цæрджытæ дзулæй нæ фæцух уыдзысты, Уæрæсеимæ арæн рæстæгмæ æхгæд куы æрцæуа, уæд. Цхинвалы дзулфыцæн комбинаты цы ссады фæсауæрцтæ ис, уыдон сты æввахсдæр мæйты фаг», – загъта куыстуаты директор Цхуырбаты Вадим.
Уый банысан кодта, зæгъгæ, Уæрæсеимæ арæныл бæрцыл товартæ уадзын нæ бандавдзæн хæлцадон товартыл. «Махмæ ис ссады æмæ дзулы тыххæй æнæмæнгхъæуæг ингрединтты фæсауæрцтæ иу мæй æмæ æрдæджы фаг. Уымæй дарддæр ма, ноджы æртæ машинæ ссадимæ абон 31 марты, хъуамæ æрцæуой, æмæ уæд ссады фæсауæрцтæ уыдзысты дыууæ мæйы æмæ, гæнæн ис, фылдæры фаг дæр. Хæсты рæстæджы дæр мах цæрджыты ифтонг кодтам дзулæй æмæ карантины рæстæджы дæр уый саразын нæ бон суыдзæн…», – банысан кодта директор.
Йæ ныхæстæм гæсгæ, ма уыдон ссадæй сифтонг кодтой республикæйы районты архайæг дзулфыцджыты, цæмæй æнæкъуылымпыйæ кусой. Вæййы афтæ æмæ ссад ласынмæ æрцæуынц хъæууон администрациты сæргълæуджытæ, цæмæй цæрджыты сифтонг кæной.
Цхуырбаты Вадим банысан кодта, зæгъгæ, карантины рæстæджы куыстуаты баконд æрцыд цыбыр кусгæ бон уыцы кусджытæн, кæцытæн ис чысыл сывæллæттæ. «Алы адæймаг дæр, фæнды ацæргæ, фæнды æвзæнгтæй искæцыйæн, йæ бон куыстмæ рацæуын куынæ суа карантины рæстæджы, уæд ма рацæуæт. Фæлæ нырма куырдиæттæ райстам, чысыл сабитæ кæмæ ис, уыцы кусджытæй æмæ сын мах сарæзтам цыбыр кусгæ бонтæ. Ацæргæ кусджытæ сты патриоттæ, æгæрыстæмæй, сæ карантины рæстæджы дæр нæ фæнды сæ куыст ныууадзын», – загъта куыстуаты директор.
Уый ма банысан кодта, зæгъгæ, пандемийы тыххæй Уæрæсейы ссад тынг фæзынаргъ. «Ссад фæзынаргъдæр 20, 50 сомы, æмæ иуæй-иу куырæйтты та 100 сомы дæр. Уымæ нæ кæсгæйæ, мах спекуляци нæ кæнæм ацы уа-вæрæй æмæ нæ фæфылдæр кодтам æргътæ», – йæ ныхасмæ бафтыдта уый.
Куыстуаты сæргълæууæг ма банысан кодта, зæгъгæ, æввахс рæстæджы план кæнынц ссад æмæ сæкæр ласыны тыххæй ног контракттæ саразын.
«Стыр партиты сæкæры тых-хæй цы контракттæ саразæм, уыдонмæ гæсгæ сæкæры аргъ бæрæг фæасламдæр уыдзæн», – банысан кодта уый.
Comments are closed, but trackbacks and pingbacks are open.