25-æм майæ Хуссар Ирыстоны ист цæуынц, карантины домæнтæ.

Къуырийы райдианы  байгом сты æмæ сæ куыст сног кодтой спортивон объекттæ, библиотекæтæ, сывæллæтты хиирхæфсæн центртæ, уазæгдæттæ, хосгæнæндæттæ, кафетæ, ресторантæ. Афтæ ма йæ куыст сног кодта æхсæ-надон транспорт дæр.

Уыдон кæд се ‘ппæт дæр штатон режимыл кусдзысты, уæддæр «Югосетпотребнадзор»-ы амындтытæ хъуамæ æххæст кæной карзæй. Чи сæ хала, уыдон цæудзысты ивар.

Уæрæсеимæ арæныл ахизыны бар дарддæр хаст æрцыд 30 июнмæ. РХИ-йы Президент фехъусын кодта, фæндаг кæй байгом уыдзæн, Цæгат Ирыстоны эпидемиологон уавæр куы фæхуыздæр уа, æрмæстдæр уæд. Уæрæсейы Федерацийы консулон агентадыл не ‘мбæстæгтæй чи рахиза арæныл æмæ Уæрæсейы горæтты уæлдæр ахуыргæнæндæтты студенттæй йæ райгуырæн бæстæмæ чи здæхы, уыдо-нæн та æнæмæнг уыдзæн дыууæкъуырион карантины уæвын.

РАЙДЫДТОЙ ТРЕНИРОВКÆТÆ

Спортивон комплекс йæ дуæрттæ байгом кодта Ирыстон сæрыстыр кæмæй у, Уæрæсейы, дунейы æмæ Европæйы ерысты уæлахиздзаутæ, Зассеты Арсæмæг, Бестауты Андрей æмæ Дзæгъиаты Сосланæн. Уыдон ныр сæ иннæ æмсекционтимæ сæхи цæттæ кæндзысты спортивон комплекс «Олимп»-ы. Цæмæй сæ спортивон формæ ма фесæфтаиккой, уый тыххæй спортсменты сæ тренер Коцты Тамерлан цæттæ кодта Тулдзы къохы. «Æвзонг æмæ фидар лæппутæ сты, дыууæ мæй сын ницы ракодтаид, фæлæ уæддæр тренировкæтæ уагътам Тулдзы къохы, бон дыууæ хатты. Æцæг, гауызыл тренировкæтæ бынтон æндæр сты», – зæгъы тренер.

Тулдзы къохы ма уæгъдибар хъæбысæйхæцджытæй дарддæр тренировкæтæ уагътой æрмхæцджытæ дæр. Спорты хуызы дæр нæм ис Уæрæсейы æмæ Европæйы чемпионтæ. Уы-дон та тренировкæ кодтой спортскъолайы. «Ацы дыууæ мæйы рæстмæ тренировкæ кæд нæ кодтам, уæддæр цæмæй бынтон иуран ма бадтаиккам, уый тыххæй иу ссыдыстæм Тулдзы къохмæ. Æргъæвд æрцыдысты ерыстæ, фæлæ кæд æппæт дæр хорз уа, уæд хайад райс-дзыстæм сентябры мæйы Цæгат Ирыстоны æмæ уый фæстæ та Уæрæсейы чемпионаты», – зæгъы армрестлеры тренер Джиоты Валери.Хуссар Ирыстоны спорты иууыл стырдæр секцитæй иу у бокс. Спортсменты цæттæ кæнынц куыд Боксы скъолайы æмæ Спорты галуан «Олимп»-ы, афтæ Уæлдæр спортивон дæсныйады скъолайы дæр. Уым та карантины рæстæджы тренировкæтæ цыд дистанцион формæйы. «Хæслæвæрдтæ лæвæрдтон телефонæй, фæлæ-иу хатт мæ хъомылгæнинæгтимæ фембæлдтæн æрдзы хъæбысы дæр. Бирæ ерыстæ ныффæстиат сты, фæлæ куыддæр уыдон штатон режимы скусой, афтæ мах цæттæ хъуамæ уæм», – зæгъы Боксы скъолайы директоры хæдивæг æмæ тренер Кокойты Ирбег.

Сæ куыст райдыдтой Кекусин-кан каратейы спортсментæ дæр. Ацы хуызы спортæй архайджыты ‘хсæн дæр ис Уæрæсейы æмæ Дунейы чемпион. Уыдон дæр сæ куыст кодтой дистанцион формæйы. «Тынг нæ бакъуылымпы кодта, бæстæйы цы пандемийæ ис, уый. Мæ спортсментæ хъуамæ хайад райстаиккой майы мæйы Европæйы чемпионаты. Дудайты Донна, кæцы ивгъуыд аз ссис дунейы чемпион, хъуамæ ацыдаид Европæйы чемпионаттæй дыууæмæ. Иу Кекусинкайæ, иннæ та Æппæтстилон каратэйæ. Ныр ацы ерыстæ хаст æрцыдысты октябры мæймæ. Мах архайдзыстæм, цæмæй уæдмæ хорз спортивон формæйы уæм», – зæгъы РХИ-йы каратэйы спортивон федерацийы президент Созайты Владимир.

Республикæйы Аивадон гимнастикæйы федерацийы президент Цхуырбаты Земæ дæр нын радзырдта, æвзонг гимнасткæтæ дæр цы зындзинæдтæ æвзæрстой карантины рæстæджы. «Мах карантины ацыдыстæм марты кæрон æмæ хиизоляцийы уавæрты тренировкæ кодтам хæдзæртты. Хæдзарон тренировкæтæн нæй абарæн залы ахуыртимæ, фæлæ уæддæр сывæллæттæн сæ бон куыд уыд, афтæ архайдтой. Хæдзарон ахуыртæн мæхæдæг мысыдтæн хæслæвæрдтæ æмæ ма мастер-къластæ та истам интернетæй, кæцытæ уагъта зындгонд спортсменкæ Ирина Виннер-Усманова УФ-йы гимнастикæйы центрæй. Цхуырбаты Земæ куыд зæгъы, афтæмæй сывæллæттæ æмæ сæ ныййарджытæ тынг æнхъæлмæ кастысты спортивон объекттæ  бакæнынмæ.

Скуыста сывæллæтты центр «Джуманджи»

Кæстæр кары сывæллæтты хиирхæфсæн центр «Джуманджи»-йы хицау Плиты Яна зæгъы, зæгъгæ, уыдон карантины ацыдысты иууыл раздæр. «Дыууынæм марты радта рекомендаци Республикæйы Сæйраг санитарон дохтыр, цæмæй æруромæм нæ куыст. Нæ хиирхæфсæн центр сæххæст кодта домæн. Æмæ ма куыстам æрмæстдæр «æддæмæ хæссыны» режимыл. Ныр къуырийы райдиан байгом стæм. Сывæллæтты центр æххæст кæны эпидемиологон нормæтæ».

Скуыста æхсæнадон транспорт

Æхсæнадон транспорт къуырисæрæй  райдыдта кусын штатон режимы. Автотранспорты хайады хистæр Дудайты Альберт куыд зæгъы, афтæмæй коронавирусы ныхмæ тохы нысанæн республикæйы территорийыл рæстæгмæ æрурæдтой æхсæнадон транспорты куыст. Горæты автобустæ цыдысты æрмæстдæр ахæм маршруттыл куыд «Хурзæрин» æмæ «Цæгаттаг» районтæм. Хъæутæм та æхсæнадон транспорт цыд къуыри æр-мæстдæр дыууæ хатт. «Ныр карантины домæнтæ ист æрцыдысты æмæ горæт æмæ районтæм дæр транспорт кусдзæнис штатон режимы», – загъта Дудайты Альберт.

Уый ма загъта, зæгъгæ, кæд транспорт скуыста, уæддæр хъуамæ хъахъхъæд цæуой изоляцийы нормæтæ. Транспорт та, зæгъгæ, алы рейсы фæстæдæр цæудзæн дезинфекцигонд.

УАЗÆГТЫ Марфа

Comments are closed, but trackbacks and pingbacks are open.