20-æм декабры нæ горæты Ногдзауты парчы байгом адæмон æрмдæсныты фыццаг ногазон армукъæ «Ногазон сюрприз», зæгъгæ. Хайад дзы райстой 30 адæймагæй фылдæр. Армукъæ уагъд цыд æртæ боны дæргъы – 20, 21 æмæ 22-æм декабры. Сорганизаци йæ кодтой РХИ-йы Культурæйы министрад æмæ ацы министрады цур Адæмон сфæлдыстады центр.
Центры директор Гуыцмæзты Эльзæ куыд банысан кодта, афтæмæй армукъæ уагъд цæуы фыццаг хатт, æмбæстæгтæн Ног азы размæ бæрæгбонон зæрдæйыуаг саразын æмæ адæмон æрмдæснытæн баххуыс кæныны нысанæн.
«Тагъд нæ къæсæрыл æрбалæудзæн Ног, 2024 аз, æмæ уадз, алкæмæндæр уæд бæрæгбонон хорз зæрдæйыуаг. Адæмон æрмдæснытæн та фадат уыдзæн сæ куыстытæй ауæй кæнынæн. Уый та у уæлæмхас разæнгардгæнæн мадзал алыгъуызон куыстытæ сфæлдисыны тыххæй. Куырдиæттæ æрбалæвæрдтой бирæ адæймæгтæ, фæлæ алкæмæн йæ бон не ссис армукъæйы хайад райсын», – радзырдта Гуыцмæзты Эльзæ.
Стъолтыл равæрд æрцыдысты æрмдæсныты алыгъуызон куыстытæ: хъæдæй скульптурæтæ, згъæрæй куыстытæ, адæмон хъазæнтæ, бисерæй куыстытæ æмæ къухæй конд æндæр куыстытæ.
Армукъæйы нысæнттæ уыдысты декоративон-прикладон сфæлдыстады дзаумæттæ пропагандæ кæнын, адæмон æрмдæсныты дзаумæттæ Ног азы размæ среализаци кæнын. Хайад дзы истой куыд хицæн адæймæгтæ, афтæ культурæйы къабазы организацитæ, скъолайон уагдæттæ, кæцытæ кусынц нывкæнынады, прикладон, ювелирон æмæ адæмон сфæлдыстады æндæр хуызты здæхтыты, афтæ ма Æвзонг техникты республикон станцы хъомылгæнинæгтæ дæр сæ директор Къалаты Нариманы сæргълæудæй.
Армукъæйы æртыккаг бон афарстам, æрмдæсныты сæ уæййæгтæй сæ зæрдæтæ куыд барухс сты, уымæй. «Бузныг зæгъын, ацы армукъæ чи сорганизаци кодта, уыдонæн. Ауæй кодтон мæ куыстытæй, уыцы нымæцы бисерæй конд чысыл хызынтæ сылгоймæгтæн. Кæй зæгъын æй хъæуы, райгондæй баззадтæн», – загъта æрмдæсны сылгоймаг Джыккайты Заринæ.
Райгондæй баззад Тедеты Фатимæ дæр. Банысан кодта, зæгъгæ, уый дæр ауæй кодта йæ куыстытæй. Æгæрыстæмæй, дзы уыд шоколадæй хиаразгæ алыгъуызон адджинæгтæ рæсугъд къоппыты.
Центры директоры ныхæстæм гæсгæ ногазон армукъæ фæнд кæнынц æрвылазон æй саразын.
Нæ уацх.
