Хъæрæсе-Черкесийы Республикæйы æмæ горæт Черкесскы боны цытæн ацы бонты цæуы аивæдты дæсныты дунеон фестиваль «Мир Кавказу». Уый тыххæй нын фехъусын кодтой Цхинвалы администрацийы пресс-службæйы.
Фестивалмæ фæхуыдтой нæ республикæйы дæр æмæ дзы ныртæккæ хайад исынц горæт Цхинвалы администрацийы цур хореографион ансамбль «Ирон» Хуыгаты Дианæйы къухдариуæгадæй æмæ популярон зарæггæнæг, Республикæ Хуссар Ирыстоны сгуыхт артисткæ Гатыгкоты Нинæ. Артистты гастролон балц организацигонд æрцыд нæ республикæйы Культурæйы министрады æххуысы руаджы. Финансон æххуыс та сын бакодта нæ бæстæйы сæргълæууæг Гаглойты Алан.
14 æмæ 15 сентябры хуссарирыстойнаг ансамбль «Ирон» фестивалы сæххæст кодтой дæс кафты. Фæстиваль «Мир Кавказу» финалы уыдзæн гала-концерт æмæ æппæт хайадисджытæ дæр сæрмагондæй сæххæст кæндзысты сæ бацæттæгонд музыкалон номыртæ. Гала-концерты ансамбль «Ирон» адæмы рæгъмæ рахæсдзæнис кафт «Симд».
Фестивалы фæлгæтты ма хайадисджытæн ауадздзысты мастер-къластæ æмæ тымбыл фынг. Мадзæлтты кæронбæттæн та барæсугъд кæндзысты сæ рацыдæй Хæлардзинады парады.
Нæ уацх.
