РХИ-йы Паддзахадон æдасдзинады комитеты пресс-службæ куыд фехъусын кодта, афтæмæй 6-æм ноябры Ленингоры районы Æмдзæрины хъæумæ æввахс Хуссар Ирыстоны паддзахадон арæн фехалыны рæстæджы арæнхъахъхъæнджытæ кæй æрцахстой, Гуырдзыстоны уыцы æмбæстаг Леван Дотиашвилийы цыппæрæмы радтой гуырдзиаг фарсæн.
«Оперативон-фæдысгарæн мадзæлтты рæстæджы куыд сбæрæг, афтæмæй арæнхалæг у Гуры муниципалитеты Кирбалийы хъæуккаг Леван Дотиашвили, 1990 азы гуырд.
Хуссар Ирыстоны территоримæ æрбахизыны аххосагыл дзургæйæ, Дотиашвили куыд фехъусын кодта, афтæмæй йæхæдæг дæр æмæ йе ‘мбал Гинтури Тамази дæр зыдтой, паддзахадон арæны хахх кæуылты цæуы, уый, фæлæ йæ барæй фехæлдтой. Михаил Саакашвилийы фарсхæцæг, оппозицион парти «Иууон националон змæлд»-ы архайæг, 2008 азы августы Гуырдзыстоны гарзджын тыхты сконды Хуссар Ирыстоны территорийыл хæстон архайдтыты хайадисæг, бынæттон активист Гинтури Тамазийы æндæвдадæй», – фехъусын кодта РХИ-йы Паддзахадон æдасдзинады комитеты пресс-службæ.
Уый банысан кодта, зæгъгæ, Гуырдзыстоны уыцы расыг æмбæстæгтæ хуссарирыстойнаг-гуырдзыстойнаг паддзахадон арæн фехалгæйæ, арæнхъахъхъæнджытæм лæбурдтой, уый фæстиуæгæн тæссаг уавæр сæвзæрын кодтой арæнхъахъхъæнæг службæгæнджыты цард æмæ æнæниздзинадæн. Гинтурийы фæндыд Ломисы дзуармæ бацæуын. Дзуары дуар батоныныл дæр уый архайдта.
«Банысан ма хъæуы уый дæр, æмæ арæнхалджытæ дзуармæ цыдысты автомашинæйыл. Маши-нæ тынг расыгæй скъæрдта Гинтури. Фæдысгарæн мадзалы рæстæджы Дотиашвили басаст йæ фыдракæндыл æмæ бамбæрста йæ рæдыд. Уый басаст, уыцы инцидент гуырдзиаг къухдариуæгады æбæрн ахасты аххосаг кæй уыд, ууыл. Уымæн æмæ уыдон æмбарынгæнæн куыст нæ кæнынц бынæттон гуырдзиаг цæрджытæн, Хуссар Ирыстонимæ паддзахадон арæн кæуылты цæуы, æмæ йæ халын кæй нæ хъæуы, уый фæдыл», – банысан кодтой ведомствойы.
Куыд загътой, афтæмæй фæдысгарæн мадзæлттæ оперативон æмæ æххæстбæрцæй, уыимæ иумæ гуманитарон æмбарынад хынцгæйæ кæй ауагътой, уый фæстиуæгæн аскъуыддзаг кодтой Дотиашвилийы Гуырдзыстонмæ арвитын.
«Уыцы контексты, ацы уавæрæн анализ аразгæйæ, РХИ-йы Паддзахадон æдасдзинады комитет радон хатт зæрдыл лæууын кæны, паддзахадон арæнхалджыты гæнæнуæвæг æрбацæуæнтæ иууылдæр сты Хуссар Ирыстоны арæнхъахъхъæнæг тыхты контролы зонæйы æмæ архайды секторы», – банысан кодта ведомствойы пресс-службæ.
