Сыгъдæгдзинад æмæ рæсугъддзинад кæрæдзийыл афтæ æнгом баст сты, æмæ æнæ сæ иу иннæ дæр цæсты нал фæахады. Фæстаг азты нæ горæт кæй фæсыгъдæгдæр æмæ фæрæсугъддæр, уый йæ цæрджытæ æнæуынгæ не сты. Ацы фарстыл ныры хуызæн куыст никуы цыдис. Уый тыххæй куыд паддзахады разамонджытæ, афтæ цæрджытæ дæр буц æмæ сæрыстыр сты горæты хæрзарæзтадон комбинаты кусджытæй. О, фæлæ уыцы хорздзинæдтæм горæты цæрджытæй алчи иугъуызон цæстæй нæ кæсы æмæ уый бирæбæрцæй горæты рæсугъддзинадыл æндавы мæгуырауæрдæм.
Горæты цъус нæ сырæзт, адæймаг кæм æрбада, аууоны кæм аулæфа, ахæм бы-нæттæ. Уыдонæй сæ иу уыд Октябры уынг. Уыд уымæн зæгъын, æмæ кæд йæ сырæзтæй нырма æртæ азы дæр нæ рацыд, уæддæр æвзæрæрдæм фæивта йæ хуыз. Нал кæндзынæн, цы рухсытæ, бронкалæнтæ æмæ дзы бандæттæ сæ-вæрдæуыд, уыдон абон цы уавæры сты, уый кой. Уымæн æмæ уыдоны тыххæй нæ газет фыста цалдæр хатты. Ныр та мæ зæгъын фæнды, чи дзы фæтезгъо кæны, уыдоны ахасты тыххæй. Æрмæст æвзонг фæсивæд нæ, фæлæ ма дзы арæх фæбадынц æмæ фæтезгъо кæнынц æмбис-кары сылгоймæгтæ æмæ нæлгоймæгтæ дæр. Сæ фылдæр фехсынынц æхсынæнтæ, сæ цъæрттæ сын фæкалынц сæ къæхты бынмæ æмæ бакæс æмæ ды уыдонмæ. Уæлдай тынгдæр зæрдæ фæхуды æвзонг сылгоймæгтыл. Кæм фæбадынц, уым сæ алыварс æхсынæнты цъæрттæй зæхх нал фæзыны. Кæмæндæрты уайдзæф дæр бакæнын, зæгъын сын, ирон сылгоймагæн ахæм митæ кæнын худинаг кæй у, уый дæр.
Ахæм æнæзæрдæхцон нывтæн фенæн ис, нæ горæты бандæттæ æвæрд кæм æрцыд, уыцы бынæттæй алы ран дæр.
Уыдонæй дарддæр ма горæты уынгтæ æвидыц кæнынц, сæ хæдзæртты раз арæзтадон брон бирæ рæстæджыты чи ныууадзы, уыдон дæр. Кæд сæ алкæмæн дæр вæййы, арæзтадон æрмæджытæ кæм æрæвæра ахæм бынæттæ, уæддæр сæ æркалынц тротуартыл, кæннод та фæндагæн бацахсынц йæ иу хай æмæ уым фæлæууынц афæдзгæйтты. Дымгæ æмæ сæ къæвдатæ ныппырх кæнынц алырдæм æмæ æвидыц кæнынц уынгтæ.
Уынгты сыгъдæгдзинадыл æвзæрæрдæм æндавынц, тротуартыл цы хæлд машинæтæ ис, уыдон дæр, фæлæ сæ чи аппæрста, уыдон фæрсæг нæй æмæ ахæм фæткхалæн цаутæ кæнынц фылдæр.
Горæты абон цас бронкалæн асыччытæ ис, уыйбæрц дзы никуы уыдис, фæлæ бирæтæ сæ брон асыккмæ нæ, фæлæ изæрыгæтты рахæссынц тротуартæм, ома сæ бронласæн машинæ аласдзæн райсом. Æхсæвы сæ куыйтæ æмæ гæды-тæ ныппырх кæнынц æмæ дыккаг бон ууылты ацæуæнтæ дæр нал вæййы.
Иууылдæр зонæм, горæты уынгтæ но-гæй арæзт кæй цæуынц, уый. Уый нæ алкæмæн дæр хæссы æхцондзинад, фæлæ асфальткæныны куыстытæ æх-хæст кæм нæма цæуынц, уыцы уынгтæ дæр бынтон рохуаты ма хъуамæ уаиккой. Цæвиттон, Нæузæххонты уынгыл, 7-æм сывæллæтты рæвдауæндонмæ бацæуæны асфальт афтæ ныдзыхъхъытæ æмæ адæм тыхсынц ныр дæс азы бæрц. Ахæм бынæттæ нæ горæты иу æмæ дыууæ раны нæй, фæлæ сæ бирæ ницы хъæуы, ис сын рæстæгмæ хуырæй сæмвæз кæнæн дæр.
ГÆЗЗАТЫ Иван
Comments are closed, but trackbacks and pingbacks are open.