Цӕмӕй кӕстӕры бӕллиц ӕмӕ курдиат ӕххӕстӕй райхӕла, уый тыххæй йӕ фарсмӕ ӕнӕмӕнг хъуамӕ ӕрбалӕууа йӕ хъуыддаджы дӕсны ӕмӕ арӕхстджын ахуыргӕнӕг. Нӕ республикӕйы ахӕмтæ сты Ӕвзӕнгты техникон станцы кусджытæ. Станц уӕвынад кӕны дӕргъвӕтин рӕстӕг ӕмӕ йын ӕнтысы кӕстӕр фӕлтӕры алыгъуызон зонындзинӕдтӕй схотыхджын кӕныныл. Ацы ахуыргӕнӕн уагдонӕн ныр цалдӕр азы разамынд кӕны йӕ хъуыддаджы арӕхстджын адӕймаг Къалаты Нариман ӕмӕ коллектив ӕппӕт тыхтӕй дӕр зӕрдиагӕй архайы ӕвзонг фӕлтӕрӕн иу кӕнӕ иннӕ дӕсныйад хуыздӕр ӕмӕ арфдӕр бацамоныныл.
Къалайы фырт куыд загъта, уымӕ гӕсгӕ ныртӕккӕ ардӕм цӕуынц ӕмӕ сӕхи фыссын кӕнынц, цы кружочы сӕ фӕнды сахуыр кӕнын, уырдæм ӕмӕ уый аххӕсдзӕн 15-20 сентябрмӕ. Уый фӕстӕ райдайдзысты ахуыр кӕнын. Станцы ис ахӕм кружоктӕ, куыд робототехникӕ, райдиан техникон ахуырад, хъӕдӕрмӕгыл нывӕфтыдтӕ кӕнын, арӕхстджын къухтӕ, электромеханикӕ, математикӕ, хими ӕмӕ ӕндӕртӕ. Ахуыргӕнджытӕ се ‘ппӕт дӕр сты, сӕ хъуыддагыл ӕнувыд чи сты, ахӕмтӕ. Уыдоны нымӕцмӕ ахӕссын хъӕуы Цхуырбаты Роланд, Плиты Инал, Табуты Георги ӕмӕ бирӕ ӕндӕрты. Зӕгъӕм, нырма ӕрӕджы байгом робототехникӕйы кружок, фӕлӕ тынг цӕуы ахуыргӕнинӕгты зӕрдӕмӕ ӕмӕ йӕм цӕуынц ӕнӕзивӕгӕй. Ацы кружокӕн разамынд кӕны, Плиты Инал ӕмӕ сын ныридӕгӕн ис хорз фӕстиуджытӕ. Цӕвиттон, фарон аз Дзӕуджыхъӕуы уагъд ӕрцыд турнир горӕты командӕты ‘хсӕн, уым хайад райстой Иналы иууыл цӕттӕдӕр ахуыргӕнинӕгтӕ ӕмӕ сӕ иу бацахста фыццаг бынат, иннӕ та рамбылдта дыккаг призон бынат. Фӕстӕдӕр та Цӕгат Кавказы командӕты ‘хсӕн цыдысты ерыстӕ, хайад дзы райстой 20 командӕйы. Уыцы нымӕцы уыд Цхинвалы Ӕвзӕнгты техникты станцы командӕ дӕр ӕмӕ бацахста ӕртыккаг призон бынат.
Зӕгъын ӕмбӕлы химийы кружочы куысты тыххӕй дӕр. Ис сын сæхи лаборатори. Банысан кӕнын хъӕуы, ахӕм лаборатори не скъолатӕй алы ран кӕй нӕй, уый та ӕнӕмӕнгхъӕуӕг у, уымӕн ӕмӕ ахуыргӕнинӕгтӕ теоретикон ӕрмӕг практикон ӕгъдауӕй бафидар кӕнын дӕр. Уыцы нысанӕн-иу, Нариманы ныхæстæм гæсгæ, ӕрбахондзысты горӕты скъоладзауты химийы кружокмӕ ӕмӕ зонгӕ кӕндзысты практикон фӕлварӕнтимӕ.
Къалайы фырт ӕхсызгонӕй банысан кодта, кӕй сӕм фӕзынд ног кружоктӕ дӕр ӕмӕ дзы разӕнгардӕй кӕй ахуыр кӕнынц ӕвзӕнгтӕ. Цӕвиттон, компьютеры ахуыргӕнӕг у Дочиты Инал, уый сывӕллӕтты ахуыр кӕны зындӕр программӕтимӕ кусыныл. Ацы кружочы баконд дӕр ныры рӕстӕджы у ӕнӕмӕнгхъӕуӕг, ахуыр дзы кӕнынц зӕрдӕргъӕвд сабитӕ, цы сын бацамоны, ууыл бакусынц зӕрдиагӕй ӕмӕ йыл уымӕ гӕсгӕ фӕхӕст вӕййынц цыбыр рӕстӕгмӕ. Зӕгъын ӕмбӕлы иннӕ ног радиокружочы тыххӕй дӕр, уымӕн та йӕ ахуыргӕнӕг у ӕвзонг специалист Джиголаты Георги. Уым ивгъуыд ахуыры аз уыд 15 ахуырдзауы ӕмӕ кружочы куысты ӕвдыстой хорз.
Станцы разамынад ӕмӕ кружочы ахуыргӕнӕджы фӕнд у, цӕмӕй зӕрдӕргъӕвддӕр ахуыргӕнинӕгтӕй бацӕттӕ кӕной командӕ ӕмӕ хайад райсой Уӕрӕсейы командӕты ‘хсӕн ерысты. Ноджы ма иу ног кружочы тыххӕй дӕр нӕй ӕнӕзӕгъгӕ, уый та у операторон кружок. Уымӕ дӕр тынг цымыдис кӕнынц ахуыргæнинæгтæ, ахуыр сӕ кӕндзысты камерӕимӕ кусыныл.
Зӕгъын ӕмбӕлы, ацы ахуыргӕ-нӕндон цалдӕр азы размӕ хорз цалцӕг кӕй ӕрцыд, уый тыххӕй ӕмӕ дзы ныр рухс кӕны адӕймаджы зӕрдӕ. У сӕм хъарм ӕмӕ райдзаст, ахуыргӕнӕн кабинеттӕ ифтонг сты хъæуæг æрмæджытæй. Цы ма сæ бахъæуы, уыдон самал кæныны къуылымпыдзинæдтæ нæ вæййы.
ХУЫБИАТЫ Никъала
Comments are closed, but trackbacks and pingbacks are open.