Ивгъуыд къуырийы кæрон Хуссар Ирыстоны паддзахадон университеты уагъд æрцыдис поэт, прозаик, драматург, революционер æмæ æхсæнадон архайæг Беджызаты Дауыты фырт Чермены райгуырды 125 азы юбилейон изæр. Хайад дзы райстой бæрнон адæймæгтæ, ахуыргæндтæ, студенттæ, фысджытæ æмæ Беджызаты мыггаджы минæвæрттæ. Юбилейон изæр байгом кодта филологон зонæдты кандидат, доцент Биазырты Аллæ. Уый бузныджы ныхæстæ загъта ирон литературæйы кафедрæ æмæ университеты ректоратæн ирон литературæ æмæ Ирыстоны фысджытæм сæ хорз ахасты тыххæй. Рæстæгæй-рæстæгмæ ахæм мадзæлттæ арæх уагъд кæй цæуы, уый тыххæй æмæ ныхасы бар радта ирон литературæйы кафедрæйы сæргълæууæг Плиты Гацырæн. Гацыр æрдзырдта Черменæн, куыд йæ царды хабæрттæ, афтæ ма йæ сфæлдыстадон куыст æмæ æнтыстыты тыххæй дæр.
Юбилейон изæры хайадисджытæн Хуссар Ирыстоны Президенты арфæ бакаст Беджызаты Чермены æрвад Беджызаты Батыр.
Уый фæстæ ма фыссæджы цард æмæ сфæлдыстады тыххæй сæ хъуыдытæ дзырдтой Хъазиты Мелитон, Плиты Серго, Бекъойты Майя, Битарты Зоя, Годжыцаты Нелли, Икъаты Мадинæ æмæ Плиты Инал.
Йæ раныхасы Тедеты Ливæ та банысан кодта, зæгъгæ, кæд ирон æвзаг æмæ литературæйы рæзт æмæ размæцыды тыххæй арæх фæуадзæм алыгъуызон æнæмæнгхъæуæг мадзæлттæ, уæддæр нæ иуæй-иу хъуыддæгтæ сты рох.
Цæвиттонæн Ливæ банысан кодта, зæгъгæ, нæ классиктæ сты бирæ, фæлæ дзы иуæн дæр йæ чингуытæй нæй Цхинвалы чиныгуæйгæнæн дуканиты. Уый нымайы мæгурау, рарасткæнинаг хъуыддагыл æмæ мадзалы хайадисджытæм æрсидт, цæмæй ацы рарасткæнинаг фарсты равдисой сæ хъæппæрис.
Мадзалы Беджызаты Чермены фыст æмдзæвгæтæ кастысты студенттæ: Жажиты Кристинæ, Тыбылты Аннæ, Табуты Дианæ æмæ Зæгъойты Дианæ.
Гæззаты Иван
