РХИ-йы Президент Бибылты Анатоли фембæлд Сербийы Парламенты депутаттæ – Ялтайаг Æхсæнадæмон экономикон форумы хайадисджытимæ. Фембæлды хайад райста Хуссар Ирыстоны Фæсарæйнаг хъуыддæгты министр Медойты Димитр дæр.
Фембæлды райдиан хуссарирыстойнаг паддзахады сæргълæууæг банысан кодта Ялтайы форумы эффективондзинад, цыран фадæттæ ис хæларадон æмæ хъуыддагон ахастытæ æрбæстон кæнынæн, ног партнертæ ссарынæн. Уый ма банысан кодта Серби æмæ Хуссар Ирыстоны ‘хсæн ахастыты рæзты перспективондзинад, кæцыты адæмтæн ис иугъуызон монон æмæ хæрзæгъдауы æргъадтæ æмæ сын ис иумиаг стратегион партнер – Уæрæсе.
Бибылты Анатоли Сербийы Парламенты депутаттæн радзырдта Сербаг Республикæмæ йæ æрæджыйы балцы æмæ Президент Мирослав Додикимæ йæ бадзырдты тыххæй.
Сербийы Парламенты депутат Бошко Обрадович фæндвидарæй банысан кодта, зæгъгæ, Хуссар Ирыстонимæ ахастытæ дзуапп дæттынц дыууæ паддзахады интерестæн.
«Хуссар Ирыстонмæ махæн хæлар ахаст ис, уымæн æмæ махæн æнгæс æгъдæуттæ æмæ цæстæнгæстæ бирæ ис. Мах фæнды Хуссар Ирыстонмæ æрцæуын æмæ нæ ахастытæ рæзын кæнын», – загъта депутат.
Уымæй размæ ма Бибылты Анатоли фембæлд Италийы делегациимæ сенатортæ æмæ бизнесменты къордимæ.
Дыууæ фарсы кæрæдзийæн сæ хъуыдытæ загътой фарстаты уæрæх спектры фæдыл, банысан кодтой кæрæдзийæн цымыдисон фарстатæ æмæ уынаффæ кодтой иумиаг проектты реализацийы фадæттыл.
Ялтайаг æхсæнадæмон экономикон форум уагъд цыд 19 апрелæй 21 апрелмæ.
Хуссар Ирыстоны делегацийы сконды уыдысты Медойты Димитр, Экономикон рæзты министр Кокойты Геннади, транспорт æмæ сæудæджерады комитеты сæрдар Бекъойты Геннади, Уæрæсейы Федерацийы Республикæ Хуссар Ирыстоны Уæлвæткон æмæ æххæстбарджын минæвар Гасситы Знауыр.
Comments are closed, but trackbacks and pingbacks are open.