Мæскуыйы уыд Республикæ Хуссар Ирыстоны Президент Гаглойты Алан æмæ Уæрæсейы Федерацийы Экономикон рæзты министр Максим Решетниковы фембæлд. Максим Решетников раарфæ кодта Гаглойты Аланæн Президенты бынтамæ æвзæрст кæй æрцыд, уый тыххæй æмæ банысан кодта, зæгъгæ, Уæрæсе æмæ Хуссар Ирыстоны ‘хсæн ис фидар экономикон æмæ культурон бастдзинæдтæ.
Дыууæ фарсы æруынаффæ кодтой æмархайды дард-дæры рæзты иумæйаг куысты приоритеттыл.
«Нæ бæстæты ‘хсæн æмгуыстад цæуы алыгъуызон фадгуыты – медицинæйæ ахуырадмæ, базарадæй æдасдзинадмæ. Нысæнттæ фæстæмæ сты ахæм. Ориентаци кæнæм Æмцæдисад æмæ интеграцийы тыххæй сразыдзинадыл», – загъта Максим Решетников.
13 азы дæргъы Хуссар Ирыстонмæ æрвыст æрцыд социалон-экономикон проблемæтæ аскъуыддзаг кæнынæн æхцайы фæрæзтæ. Афтæ, скъуыддзаг æрцыд сæйраг фарст – бюджетон фадыджы кусджытæн куыстмызд фæфылдæр кæнын. Фæстаг 6 азы республикæйы ахуыргæнджыты, дохтырты, паддзахадон службæгæнджыты æфтиаг фæфыл-дæр ис дыууæ хатты.
Егъау куыст уагъд æрцыд социалон æмæ инженерон инфраструктурæйы объекттæ сцалцæг кæныны. Инвестицион программæйы фæрцы 2012 азæй арæзт æрцыд 300 км фæндæгтæ, 18 – сабидæттæ æмæ скъолатæ. Цхинвалы байгом ис нырыккон медицинон кластер, кæцымæ хауы сывæллæтты рынчындон, операцион-хирургион комплекс æмæ ног гуырæн хæдзар. Арæзт æрцыд хуссарирыстойнаг паддзахадон университет.
Уымæй уæлдай ма, 2021 азы нысаниуæгджын цаутæй сæ иу у республикæ æнæкъуылымпыйæ электроифтонгады резервон хахх байгом кæнын.
«Республикæ Хуссар Ирыстоны социалон-экономикон рæзты фæдыл куыст дарддæр кæны. Уыимæ иумæ, нæ разылæууæг хæстæ вазыгджындæр кæнынц. Ныртæккæ, социалон фадыджы фæстиуджытæм куы рахызтыстæм, уæд æнæмæнгхъæуæг у экономикон боны фæтк сфидар кæнын. Ахсджиаг у инвестицитæ бакæнынæн уавæртæ саразын, цæмæй бизнес гом цæуа, фылдæр кæной кусæн бынæттæ», – банысан кодта Максим Решетников.
Растдæр ацы нысæнттæ фыст сты Хуссар Ирыстоны Парламенты райсгæ 2022-2025 азты социалон-экономикон рæзты Паддзахадон программæйы.
Максим Решетников банысан кодта, зæгъгæ, æввахс рæстæджы Уæрæсе æмæ Хуссар Ирыстоны ‘хсæн къухтæ фыст æрцæудзæн ацы программæ сæххæст кæныны финансон æххуысы тыххæй æхсæнпаддзахадон сразыдзинадыл.
Йæ рады, Гаглойты Алан бузныджы ныхæстæ загъта уæрæсейаг коллегæтæн æмгуыстады тыххæй æмæ ныфс бавæрдта, райдайгæ куыст æнæмæнгæй кæй адарддæр уыдзæн.
Фембæлды кæрон бадзырдтой Хуссар Ирыстонмæ Уæрæсейы Экономикон рæзты министрады делегацийы визит . Йæ къухдариуæггæнæг уыдзæн Министры хæдивæг Дмитри Вольвач.
«Мах цæттæ стæм æххуыс кæнынмæ, æмбарынгæнæн куыстытæ уадзынмæ. Зæгъæм, таможнæйон закъондæттынад æрбæстон кæнын. Уый у зын процесс. Нæ таможнæйон службæтæ ифтонг кæнынц таможнæйон процедурæты макмималонæй фæхуымæтæгдæр кæнын, транспортон фæрæзтæ, товартæ ласын. Кæй зæгъын æй хъæуы, бизнес хъуамæ æрхæсса пайда», – загъта Дмитри Вольвач.
Comments are closed, but trackbacks and pingbacks are open.