Фæндаджы, адæмы æдасдзинадæн

Паддзахадон автоинспекцийы бон у профессионалон бæрæгбон æмæ йæ нысан кæнынц куыд Уæрæсейы Федерацийы, афтæ – Хуссар Ирыстоны дæр, 3 июлы.

 ССР Цæдисы Мидхъуыддæгты министрады Паддзахадон автоинспекци арæзт æрцыд 1936 азы 3 июлы. Уыцы аз Адæмон къамисариаты советы уынаффæмæ гæсгæ фидар æрцыд «ССР Цæдисы Мидхъуыддæгты адæмон къамисариаты кусæгон-зæхкусæгон милицийы сæйраг управленийы Паддзахадон автоинспекцийы тыххæй уагæвæрд». 1998 азæй Паддзахадон автоинспекци ссис Уæрæсейы Федерацийы Мидхъуыддæгты министрады Фæндæгтыл цæуыны æдасдзинады паддзахадон инспекци. 2002 азы 2 июлы ведомство райста йæ дыккаг официалон историон ном – Паддзахадон автоинспекци. 2009 азы 3 июлы Уæрæсейы Федерацийы Мидхъуыддæгты министр, армийы инæлар Рашид Нургалиев йæ къух æрфыста «Уæрæсейы Федерацийы Мидхъуыддæгты министрады Фæндæгтыл цæуыны æдасдзинады паддзахадон инспекцийы бон снысан кæныны тыххæй» УФ-йы Мидхъуыддæгты министрады бадзырдыл. Уыимæ Паддзахадон автоинспекцийы ном ивд æрцыдис Фæндæгтыл цæуыны æдасдзинады паддзахадон инспекцийæ (ФЦÆПИ – ГИБДД).

Паддзахадон автоинспекцийы кусæджы куыст у вазыгджындæртæй сæ иу æмæ   сæ хæстæ æххæст кæныны рæстæджы ведомствойы кусджытæ хъуамæ къухдариуæг кæной æрмæстдæр закъонæй æмæ сæ службæйы цы фæтк биноныг æрцыд, уымæй.

Азæй-азмæ машинæтæ кæнынц фылдæрæй-фылдæр æмæ вазыгджындæр кæны фæндаггон змæлд. Зындзинæдтæ рæзынц, уынгты æмæ фæндæгтыл транспорты нымæц куыд рæзы, уымæ гæсгæ. Фæндаггон змæлды архайынц фылдæрæй-фылдæр адæм. Æмæ иудадзыг рæзы фæндаггон-транспортон фыдбылызтæ ма ‘руадзыны ахадгæ мадзæлттæ аразыны домæн.

Нырыккон царды фæндагон-патрулон службæйы кусджыты æрвылбонон куыстæн зын у аргъ скæнын фæндаджы æдасдзинад бахъахъхъæныны хъуыддаджы. Æрвылбон дæр уыдон архайынц аваритæ ма ‘руадзыныл, ифтонг кæнынц цæрджыты æдасдзинад æмæ бæстон кæнынц æппæт автотранспортон комплексы куыст.

Хæсты фæстæ азты Паддзахадон автоинспекци æппæт адæмимæ иумæ куыста бæстæйы хæлд хæдзарад йæ къахыл слæууын кæныныл. Канд фæндагон змæлды æдасдзинадыл нæ, фæлæ ма уæзæгтæ афойнадыл ласыныл, транспортæй, æртагæй ахадгæйæ пайда кæныныл æмæ афтæ дарддæр.

Уæ куыст у бæрнджын æмæ зын, хаттæй-хатт та – тæссаг. Уымæ гæсгæ уын нæ цæст уарзы æнтыстытæ æмæ фидар æнæниздзинад. Бузныг уын уæ куысты тыххæй, кæцы здæхт у не ‘мбæстæгты  æдасдзинад бахъахъхъæнынмæ.