Цалдæр уысмы бæрц паддзахадон автоинспекцийы кусæг, милицийы капитан Цхуырбаты Русланимæ чи аныхас кæна, уый æнæбанкъаргæ нæ фæуыдзæн йæ уæздандзинад æмæ къæмдзæстыгдзинад, фæтк æмæ ирон æгъдæуттæм йе стыр уарзондзинад.
Руслан райгуырд æмæ схъомыл Цхинвалы. Хорз æмæ иттæг хорз нысæнттимæ каст фæцис дыккæгæм астæуккаг скъола. Уыцы азты йæ хорз чи зыдта, уыдон абон дæр арæх æрымысынц Русланы. Руслан кæд йе ‘мкарæнтимæ хæларæй цард, кæрæдзиимæ сын æфсымæры ахастытæ уыд, уæддæр сæ бар никæмæн радтаид, цæмæй арæзтаиккой, цы не ‘мбæлд, ахæм митæ. Чидæртæ-иу æй йæ ахæм ахасты тыххæй, нæ милиционер дæр схуыдтой. Ссис сæ раздзог æмæ æнæ уый бафæрсгæйæ аразгæ дæр ницыуал кодтой.
Руслан ахæм хорз удыхъæд æвдыста скъолайы къæсæрæй бахизынæй йæ фæудмæ. Уымæй дарддæр ма æвзыгъд уыд ахуырмæ дæр. Уыцы азты уæлдæр ахуыргæнæндæтæм бацæуыны тыххæй рауагъдонтæн ницы хатырон бартæ æмæ фадæттæ уыдис, фæлæ Руслан спайда кодта, скъолайы цы зонындзинæдтæ райста, уыдонæй æмæ ссис Пермы индустриалон университеты студент.
Русланмæ уæды онг цы хорз хъуыдытæ æмæ фæндтæ уыдис, уыдон университетмæ бацæугæйæ фæфылдæр сты, фæлæ йын бинонты уавæр фæивта йæ фæндтæ. Ахуыр кæныны фадат ын кæй нал уыд, уый тыххæй ныууагъта йæ ахуыр æмæ кусынмæ бацыд Мæскуыйы метройы хæдзарадмæ. Фыццаг цалдæр мæйы æххæст кодта ахуыргæнинаджы хæстæ, уый фæстæ та ссис машинисты æххуысгæнæг. Æппæтмæ дæр йæ хорз ахаст æмæ арæхстдзинады фæрцы йыл баууæндыдысты куыстуаты разамынд æмæ йæ снысын кодтой метройы поезды машинистæй. Уæд Русланæн йæхицæн уыд æххуысгæнæг, йæ дæсныйад амыдта æндæртæн дæр.
Чи йæ зоны, цахæм хъысмæт æнхъæлмæ каст цхинвайлаг ирон лæппумæ Мæскуыйы, фæлæ фехæлд, къорд азты буц æмæ сæрыстыр кæмæй уыдыстæм, æнæхъæн дунейы сабырдзинад кæй фæрцы уыдис, уыцы Советон Цæдис. Бæргæ, алцы дæр ууыл куы баззадаид, фæлæ фехæлдысты адæмты адджын ахастытæ æмæ цыбыр æмгъуыдмæ систы кæрæдзийы знæгтæ. Тбилисæй Ирыстонмæ арæхæй арæхдæр хъуысын райдыдтой æфхæрæн æмæ фидисы ныхæс-тæ, стæй та æртхъирæнтæ. Уыцы маст, æрмæст Ирыстоны чи уыд уыдон не ‘нкъардтой, фæлæ ма Ирыстонæн æддейæ чи уыд, уыцы ирæттæ дæр. Руслан кад æмæ ном цы куыстуаты ссардта, уырдыгæй рацæуын ын æнцон нæ уыд, фæлæ йын ноджы зындæр та уыд æрвылбон дæр йæ райгуырæн къуым, Ирыстоны тыххæй мæгуырау хабæрттæ хъусын. Йæ куыст ныууагъта æмæ æрцыд йæ фыдыбæстæ, бирæ кæй уарзта, уыцы хæстæджытæ æмæ адæмы бахъахъхъæнынмæ.
Алы хæст дæр хъаугъа æмæ быцæутæй кæй райдайы, стæй æнæфæугæ дæр кæй нæ фæвæййы, уый Руслан дæр æнæмбаргæ нæ уыд æмæ куыддæр 2008 азы фондзбонон хæст фæцис, афтæ банкъардта, бирæ маст æмæ зындзинæдты фæстæ Ирыстонмæ кæй æрцыд æцæг цард, сæрибар кæй сты, цалдæр хатт ирон адæмы сæ фыдæлты зæххæй фæсурын чи сфæнд кодта, уыцы гуырдзиаг фашисттæй.
2009 азы Руслан кусынмæ бацыд паддзахадон автоинспекцимæ. Йæхæдæг куыд зæгъы, афтæмæй йæ автоинспекцийы разамонджытæ æмæ кусджытæ райстой хорз.
Уæдæй рацыд цалдæр азы æмæ Руслан банкъардта йæ зонындзинæдтæ æппæт домæнтæн дзуапп кæй нал дæттынц, уый æмæ 2019 азы каст фæцис Хуссар Ирыстоны паддзахадон университет.
Руслан æрвылбон дæр йæ разылæууæг хæстæ æнтысгæйæ кæй æххæст кæны, уый тынгдæр фæбæрæг, автоинспекцийы хистæр, милицийы инæлар-майор Джиоты Аланæн куы загътонтон, зæгъын мæ паддзахадон автоинспекцийы кусджыты боны цытæн уац ныффысын фæнды, йæ хæстæ хорз чи æххæст кæны, коллективы ‘хсæн хорз кад кæмæн ис æмæ æрыгтты фарсмæ арæхдæр чи балæууы, иу ахæм кусæгыл, уæд мын æнæгуырысхойæ йæ дзуапп уыд, зæгъгæ ахæм кусджытæ нæм ис бирæ, фæлæ уал дзы абон ракæнæм Цхуырбаты Русланы кой.
ГÆЗЗАТЫ Иван
Comments are closed, but trackbacks and pingbacks are open.