Кæронмæ бахæццæ физикон культурæйы сгуыхт кусæг Бежанты Зелимы номарæн турнир футболæй. Ерыстæ уагъд æрцыдысты ныр 5-æм хатт. Хайад дзы райстой республикæйы скъолаты командæтæ. Æдæппæтæй сæйраг призыл тох кодтой 10 командæйы. Спортуарзджытæ федтой бирæ цымыдисон хъæзтытæ. Уæлдай тынгдæр рахицæн кæнын хъæуы финалон хъазты, цыран фембæлдысты 1-æм æмæ 12-æм скъолаты командæтæ. Хъазт рауад тынг æндыгъд. Сæйраг рæстæг фæцис æмдыхæй – 3:3 хыгъдæй æмæ уæлахиздзау сбæрæг кæныны тыххæй футболистты бахъуыд пеналтитæ цæвын. Ам спортивон амонд бахудт фыццæгæм скъолайы хъазджытæм æмæ систы ерысты уæлахиздзаутæ. 12-æм скъола та бацахста дыккаг бынат. Æртыккаг бынатмæ та рахызтысты 5-æм скъолайы ахуырдзаутæ.
Уæлахиздзауты схорзæхджын кæныны церемонийы ерысты хайадисджытæн раарфæ кодтой Дзауы районы администрацийы сæргълæууæджы хæдивæг Тедеты Альберт, Фæсивæдон политикæ æмæ спорты фæдыл комитеты сæрдар Хубежты Руслан, Хуссар Ирыстоны сгуыхт тренер Тедеты Владимир, футболы федерацийы президент Пухаты Владимир, Бежанты Зелимы фырт, Уацамонгæйы ордены кавалер Алан.
Сæрмагондæй ацы турнирмæ æрцыд делегаци Лабæйæ.
Бежанты Зелим республикæйæн уæззау рæстæджыты нæ ныууагъта йæ уарзон куыст æмæ йæ фæрцы районы фæсивæдæн фадат уыд спортæй архайынæн.
Турниры ма фæбæрæг сты хуыздæр хъазджытæ. Арæхстджындæр кулдуаргæсы приз райста Тедеты Давид, Хуыздæр хъахъхъæнæгыл æмæ æрдæгхъахъхъæнæгыл нымад æрцыдысты Мæргъиты Дмитри æмæ Гаглойты Арсен. Хуыздæр размæбырсæгыл Тедеты Владислав, иууыл фылдæр пуртитæ та ныхмæлæууæджы кулдуары бакъуырдта æмæ хуыздæр бомбардир ссис Хъуылымбегты Феликс.
Хуриты Батрадз
