Нæ республикæйы эпидемиологон уавæр кæй февзæрдæр ис, уый фæдыл ист цæуынц алыгъуызон мадзæлттæ, цæмæй цæрджыты бахизой ацы æнæхайыры низæй. Хуыздæр рæстæг ныллæудмæ æргъæвд æрцыдысты алыгъуызон культурон-массон мадзæлттæ, бирæ уагдæтты райстой коронавирусæй хи бахизыны мадзæлттæ.
Мидхъуыддæгты министрады оперативон æмбырды дæр æрдзырдтой ацы карз низы тыххæй æмæ рахастой фæндон, цæмæй ист æрцæуой æппæт мадзæлттæ дæр коронавирусы ныхмæ æмæ бахъахъхъæной ведомствойы кусджыты низæй. Уымæн æмæ фарон пандемийы рæстæджы милицийы кæцыдæр дæлхæйтты рæнхъон сконды фылдæр хай фæрынчын сты æмæ куыст ныкъуылымпы. Цæмæй ахæм уавæр мауал æруадзой, уый тыххæй развæлгъау хъуамæ цæттæ уой карздæр уавæрмæ. Ӕмæ ведомство республикæйы цæрджытæн цы паддзахадон лæггæдтæ кæны, уыдон та кæддæриддæр æххæст хъуамæ цæуой æнæкъуылымпыйæ.
Фыццаджыдæр уал Мидхъуыддæгты министрад сиды нæ республикæйы цæрджытæм, цæмæй исты хъуыддаджы фæдыл цæугæйæ, пайда кæной индивидуалон хъахъхъæнæн дзаумæттæй. Маскæтæй чи нæ пайда кæна, уыцы æмбæстæгтæн фадат нæ уыдзæнис милицимæ сæ хъуыддаджы фæдыл бацæуынæн. Ацы бардзырд фыццаг рады æххæст цæудзæнис ахæм дæлхæйтты, куыд Паспортон-визæйон службæйы, Миграцийы фæдыл фарстаты управленийы, Фæндагон змæлды æдасдзинады инспекцийы æмæ Информацион-координацион центры. Ацы дæлхæйтты кусджытæ æдзух пайда кæндзысты маскæ-тæй, æрмкъухтæй æмæ ма дезинфекцигæнæн донгъæдтæй.
Республикæйы иумæйаг эпидемиологон уавæрмæ гæсгæ дарддæр ист цæудзысты æмбæлон мадзæлттæ.
ДЖИОТЫ Алыксандр
Comments are closed, but trackbacks and pingbacks are open.