ЭПИДЕМИОЛОГОН УАВӔР ХУЫЗДӔРХЪУАГ У

Специалисттӕ куыд амонынц, уымӕ гӕсгӕ омикроны штамм коронавирусы ӕндӕр хуызтӕм абаргӕйӕ адӕймаджы рӕуджытӕ къаддӕр хъыгдары. Фӕлӕ уыйхыгъд омикрон цырддӕр парахат кӕны ӕмӕ рынчынты нымӕц бирӕ фылдӕр кӕны. Ахуыргӕндты ныхӕстӕм гӕсгӕ вирусы ацы хуыз адӕймаджы иммунон системӕйы иувӕрсты ахизы ӕмӕ тагъддӕр бахауы организммӕ. Ацы штамм тынг у гриппы ӕнгӕс, фӕлӕ йын ис иу хорз миниуӕг – пневмони нӕ сайы йӕ фӕдыл.

Бӕрӕг куыд у, уымӕ гӕсгӕ Хуссар Ирыстоны территорийыл хынцыд ӕрцыдысты хуссарафрикӕйаг вирусы штамм омикронӕй рынчынтӕ. Уый тыххӕй фехъусынчындӕуыд бӕстӕйы Ӕнӕниздзинад хъахъхъӕныны министрадӕй. Уымӕ гӕсгӕ ныртӕккӕ алы ӕмбӕстаджы хӕс дӕр у, цӕмӕй фыццаджыдӕр ауда йе ‘нӕниздзинадыл, стӕй та йӕ алфӕмблай ӕмбӕстӕгтыл. Низы миниуӕг банкьаргӕйӕ рынчын адӕймаг хиизоляцийы хъуамӕ ацӕуа цӕмӕй низ парахат кӕнынӕн уавӕртӕ ӕмӕ фадӕттӕ ма уа.

Уый фӕдыл ӕмбӕлон мадзӕлттӕ ист ӕрцыд низ апарахат кӕнын ма бауадзыны фӕдыл Хуссар Ирыстоны Оперативон штабы фӕстаг рабадты. Уыцы хъуыддаг ӕнӕмӕнгхъӕуӕг уымӕн у, ӕмӕ фӕстаг рӕстӕджы ног коронавирусон инфекцийӕ рынчынты нымӕц бӕрӕг фылдӕр кӕны. Ӕмӕ нӕ бӕстӕйы территорийыл санитарон-эпидемиологон хӕрзвадатдзинады ӕмӕ низ дарддӕр апарахат кӕнынӕн фадӕттӕ ма радтыны нысанӕн Оперативон штабы уынаффӕмӕ гӕсгӕ урӕд ӕрцыдысты ахуырадон процесс, къорд массон ӕмӕ ӕндӕр мадзӕлттӕ.

Рынчынты нымӕц бӕрзонд у

Хуссар Ирыстоны Югосетпотребнадзоры лаборато-рийы уагъдцӕуӕг бӕрӕггӕнӕнтӕм гӕсгӕ та знон нӕ бӕстӕйы рабӕрӕг 146 коронавирусон инфекцийӕ рынчыны. Ацы рынчынты нымӕц ивы, куы фылдӕр вӕййынц, куы къаддӕр – фӕлӕ сӕ нымӕц фӕстаг бонты хызт у сӕдӕйӕ.

Бӕстӕйы сӕйраг санитарон дохтыр Коцты Маринӕ информацион агентад «Рес»- ӕн куыд хъусын кӕны, уымӕ гӕсгӕ дохтырты хъусдарды бын сты республикӕйы 1200 ӕмбӕстаджы, 38 ист ӕрцыдысты ӕнӕнизгӕнӕн уагдоны хыгъдӕй.

Ацы низ рапарахатӕй уӕлдай уӕз ӕрӕнцад медицинӕйы къабазы кусджыты уӕхсчытыл. Сӕрмагонд хибахъахъхъӕнӕн дзаумӕтты уыдон бахизынц ӕмӕ дӕргъвӕтин рӕстӕджы уӕхскуӕзӕй кусынц «сырх зонӕйы» коронавирусӕй рынчынтӕн ӕнӕмӕнгхъӕуӕг медицинон ӕххуыс бакӕныны тыххӕй. Ӕнӕрынцой куыст кӕнынц Югосетпотребнад­зоры ӕмӕ уый дӕлбар ПЦР лабораторийы кусджытӕ, раздӕры гуырӕн хӕдзары бӕстыхайы коронавирусӕй рынчынты исӕн хайады кусджытӕ.

Ацы хайады кусджытӕ бынаты рынчынтимӕ кусынӕй дарддӕр цӕуынц, чи сӕм бахаты, ахӕм уӕззау рынчынтӕм дӕр хӕдзӕрттӕм. Ам медицинон персонал исынц гриппы ӕндӕр хуызы рынчынты дӕр. Ацы хайады кусджытӕ ӕрмӕст рынчынты нӕ басгарынц, фӕлӕ вирусы иуӕг рабӕрӕг кӕныны нысанӕн аразынц ПЦР-тестытӕ дӕр. Рынчыны уавӕрмӕ гӕсгӕ уыдон ӕрвыст цӕуынц компьютерон томографи, науӕд та стационары уавӕрты хос кӕнынмӕ. Рогдӕр рынчынтӕн та хос кӕнын нысан цӕуы хӕдзарон уавӕрты.

Ахӕм ахсджиаг ӕмӕ бӕрнон куыст ӕххӕст кӕнынц ныртӕккӕ ацы хайады кусджытӕ.

Вакцинӕ – низы ныхмӕ сӕйраг фӕрӕз

Банысан кӕнын хъӕуы уый, ӕмӕ алы рӕстӕджыты дӕр инфекцион низтӕ ахӕссынц адӕймаджы цард. Уыдон ныхмӕ медицинӕ лӕууы цӕхгӕр ӕмӕ аразы вакцинӕ. Ацы ног коронавирусон инфекцион низы хъуыддаг дӕр у афтӕ: цӕмӕй йыл фӕтых уӕм, уый тыххӕй нӕ сӕйраг фӕрӕз у вакцинӕ ӕмӕ цас фылдӕр адӕм саразой уый, уый бӕрц тагъддӕр фӕтых уыдзыстӕм ацы ӕнӕхайыры низыл дӕр.

Къæбулты Марина