Дунейы философийы бæрæгбоны цытæн 25 ноябры Тыбылты Алыксандры номыл Хуссар Ирыстоны паддзахадон педагогон университеты конференц-залы уагъд æрцыдис зонадон конференци. Бацæттæ йæ кодта университеты философи æмæ культурологийы кафедрæ. Конференцийы бацæуæн ныхасæй байгом кодта философи æмæ культурологийы кафедрæйы сæргълæууæг, философон зонæдты кандидат, доцент Гæбæраты Анатоли. Уый конференцимæ æрцæуджытæн раарфæ кодта æмæ ныхасы бар радта университеты ректор Тедеты Вадимæн. Вадим банысан кодта, зæгъгæ, нæ университет цал философы радта уал философы, раздæры Советон Цæдисы республикæтæй алкæй бон нæ бацис. Университет дарддæр дæр кадимæ æххæст кæндзæн паддзахад æмæ йын хицауад йæ разы цы хæстæ æвæры, уыдон. Уыимæ ма банысан кодта, зæгъгæ, æввахс рæстæджы нæ паддзахадмæ æнхъæлмæ кæсы ахсджиаг фарстатæ аскуыддзаг æмæ æрбæстон кæныны хæстæ æмæ æппæт фарстыты дæр университеты коллектив сты паддзахады ныры разамонджыты фарс. Дарддæр ма уый банысан кодта, зæгъгæ, бирæ мæгуырау дугтæ æмæ азты фæстæ нæ адæммæ æрцыд сабырад æмæ сæрибардзинад, æдæрсгæйæ сулæфыдысты сæ риуы дзаг æмæ уыцы хорздзинæдтæн ныхдуртæ чи аразы, уыдон хъуамæ зоной, сæ хъуыдытæй кæй ницы рацæудзæнис, уый.
Уый фæстæ конференци сфидар кодта боны фæтк æмæ дзы фыццаг доклад сарæзта философон зонæдты кандидат, доцент Дзугаты Къоста: “Райдианы мæ зæгъын фæнды, æз дæр æххæстæй кæй дæн, ректор цыдæриддæр загъта, уыцы ныхæстæ æмæ хъуыдыты фарс. Дарддæр Къоста æрдзырдта ирон философон хъуыдыкæнынадыл æмæ банысан кодта, зæгъгæ, 60-70 азты Хуссар Ирыстоны 70 мин цæрæджы ‘хсæн уыд 5 философон зонæдты докторы”. Абоны уавæрæй нал ис раппæлæн, дарддæр дзырдта Къоста æмæ фæндоны хуызы загъта ахæм хъуыды, зæгъгæ, саразæм XXI æнусы ирон философи æмæ уый бындурыл амайæм ирон философийы аразинæгтæ. Дунейы философимæ куы æркæсæм, уæд æппæтварсонæй дæр разæй ис грекъаг философи. Абайты Васойы ныхæстæм гæсгæ грекъаг философимæ æппæтæй æнгомдæр лæууы скифаг-алайнаг философи, фæлæ, хъыгагæн, XIII æнусы нæ фыдæлтæ уæззау уавæрты кæй бахаудтой, хæхтæм кæй схызтысты, уый аххосæй æрхауд нæ философийы æмвæзад. Ирон философи уый фæстæ æмхуызон нæ рæзт, уыд ын æнтыстытæ æмæ цухдзи-нæдтæ дæр. Иугъæдонæй рæзын райдыдта Стыр Фыдыбæстæйон хæсты фæстæ. Фæзынд бирæ æвзонг, стыр ныфс æвæрæн кæмæй уыд, ахæм философтæ æмæ уыдон ногæй стыхджын кодтой ирон философи.
Конференцийы ма докладтæ сарæзтой æмæ докладты фæдыл раныхас кодтой: философон зонæдты кандидат, доцент Гæбæраты Анатоли, ХИПУ-йы хистæр ахуыргæнæг Хуыбиаты Соня, ХИПУ-йы доценты хæстæ æххæстгæнæг Котолиты Валентинæ, ЦИПУ-йы историон зонæдты доктор, професор Дзидзойты Валери æмæ ЦИПУ-йы философон зонæдты кандидат, доцент Бестауты Эмма.
Дзидзойты Валери ма раарфæ кодта æмæ Дзугаты Къостайæн зæрдылдарæн лæвар бакодта йæ юбилейон гуырæнбоны цытæн.
Гæззаты Иван
Comments are closed, but trackbacks and pingbacks are open.