Дыууæ республикæйы сæргълæуджыты фембæлд

Республикæ Хуссар Ирыстоны Президент Бибылты Анатоли фембæлд Луганскы Адæмон Республикæйы сæргълæууæджы хæстæ æххæстгæнæг Леонид Пасечникимæ.

Хуссарирыстойнаг паддзахады сæргълæууæджы цæст бауарзта Леонид Пасечникæн æнтыстытæ æмæ йын раарфæ кодта æрæввахсуæвæг бæрæгбон – Республикæйы боны цытæн, кæцы Луганскы Адæмон Республикæйы нысан кæнынц 12 майы.

Бибылты Анатоли загъта ахæм фæндон, цæмæй Республикæ Хуссар Ирыстон æмæ Луганскы Адæмон Республикæйы ‘хсæн ахастытæ фæарфдæр кæной.

«Нæ республикæты ‘хсæн цы ахастытæ рæ-зынц, уыдон сты зæрдæмæдзæугæ. Сымах æй хорз зонут, ныртæккæ Луганскы Адæмон Республикæ æмæ Донецкы Адæмон Республикæ цы фæндагыл цæуынц, уыцы фæндагыл мах дæр кæй рацыдыстæм. Фæлæ йæ æз алыхатт дæр банысан кæнын, кæд адæм сæ фидæн равзæрстой, æмæ Донбассы цы адæм цæры, уыдоны хъæбатырдзинад нымайгæйæ, фидарæй зæгъæн ис, уæ разы цы хæстæ æрæвæрдтат, уыдон скъуыддзаг кæй æрцæудзысты. Æмæ мах та кæддæриддæр уæ фарсмæ æрбалæудзыстæм, цæттæ стæм æххуысмæ. Æмæ мæ ныфс ис, тагъд рæстæджы нæ къухтæ кæй æрфысдзыстæм паддзахадон сразыдзинадыл, цæмæй нын барадон бындур уа ахастытæ райрæзын кæныны хъуыддаджы», – загъта Президент.

Леонид Пасечник йæхи фарсы ‘рдыгæй, ныфс бавæрдта, Луганскы Адæмон Республикæ æмæ Республикæ Хуссар Ирыстонæн иумæйагæй бирæ цыдæртæ кæй ис æмæ нæ ахастыты райрæзт кæй уыдзæн дыууæ адæмы хæрзиуæгæн.

«Мах хъæуы æнгомдæрæй кусын, куыд æхсæнадæмон, афтæ хæларадон ахастыты фæдыл. Æмæ куыд тагъддæр баиу кæнæм нæ тыхтæ, афтæ тагъддæрæй фæуыдзысты хæстон конфликттæ дæр. Ныфс мæ ис, ацы визит æмæ хъарм ныхас кæй уыдзысты ахастыты райрæзты быдур, уыцы нымæцы экономикон сферæйы дæр», – загъта Луганскы Адæмон Республикæйы сæргълæууæджы хæстæ æххæстгæнæг.

Уый ма бузныджы ныхæстæ загъта Хуссар Ирыстоны къухдариуæгад æмæ адæмæн, Луганскы Адæмон Республикæйы хæд-бардзинад кæй банымадтой, уый тыххæй.

Банысан кæнын хъæуы, Хуссар Ирыстоны делегаци Луганскы кæй ис иубонон визитимæ. Делегацийы сконды сты Республикæ Хуссар Ирыстоны Парламенты æдтагон бастдзинæдты фæдыл комитеты сæрдар Коцты Игорь, депутат Плиты Александр æмæ РХИ-йы Президенты уынаффæгæнæг Гæззаты Давид.