РХИ-йы Президент Бибылты Анатоли йæхимæ айста Экономикон рæзты министр Кокойты Геннадийы. Уый паддзахады сæргълæууæгæн радзырдта  5-9-æм февралы Луганскы Адæмон Республикæмæ РХИ-йы Экономикон рæзты министрады делегацийы кусæгон балцы фæстиуджыты тыххæй.

Министр радзырдта, зæгъгæ, хуссарирыстойнаг делегацийыл фембæлд Луганскы Адæмон Республикæйы сæргълæууæджы хæстæ æххæстгæнæг Леонид Пасечник. Уый бахатыд, цæмæй Бибылты Анатолийæн зæгъой арфæйы ныхæстæ æмæ хуссарирыстойнаг паддзахады сæргълæууæджы фæхуыдта Луганскы Адæмон Республикæмæ.

«Балцы нысан уыд Луганскы Адæмон Республикæйы Хицауады экономикон блокимæ  контакттæ адарддæр кæнын, кæцытæ райдыдтой ивгъуыд аз сентябры кæрон Луганскы Адæмон Республикæйы дыккаг адæмон форумы. Æндæр ныхæстæй, уый уыд Луганскы Адæмон Республикæимæ æмахастытæ рæзын кæныны радон этап», – загъта Кокойты Геннади.

Йæ ныхæстæм гæсгæ, балцы рæстæджы хуссарирыстойнаг делегацийæн фембæлдтытæ уыд Луганскы Адæмон Республикæйы Адæмон Советы Сæрдар Денис Мирошниченко, горæт Луганскы администрацийы сæргълæууæг Манолис Пилавов, ацы республикæйы экономикон рæзты министры хæстæ æххæстгææг Елена Костенко, республикæйы сæудæджерад æмæ базарады министрады минæвæрттимæ, хъæууон хæдзарады министры хæдивæг, фæсивæды хъуыддæгты, спорт æмæ культурæйы фæдыл министр æмæ бангон структурæты минæвæрттимæ.

Кокойты Геннади куыд банысан кодта, уымæ гæсгæ фембæлдтыты рæстæджы æруынаффæ кодтой цардуагон архайды алыгъуызон фадгуыты республикæты ‘хсæн æмахастыты рæзты варианттыл. Хуссарирыстойнаг делегаци ма бабæрæг кодта Луганскы Адæмон Республикæйы къорд сæудæджерадон куыстуаты. «Мах уыдыстæм нæмыгонтæ сыгъдæггæнæн сепараторты кондады фæдыл сæудæджерадон куыстуат арæнгонд бæрндзинады æхсæнад «НПФ «Аэромех»-ы. Уый у тынг функционалон продукци, кæцыйы агурынц Уæрæсейы дæр. Сырддарды хæдзарады рæзты рæстæджы уыдонæй махмæ дæр гæнæн ис æнтыстджынæй спайда кæнын», – загъта уый.

РХИ-йы Экономикон рæзты министрады делегаци ма бацыд раззагон технологиты заводмæ, цыран, сæрмагондæй, уадзынц 3Dпринтертæ, афтæ ма Константин Сурины сæнуадзæн куыстуатмæ, кæцы равдыста уæлдæр гъæды продукци. «Константин Сурин загъта, зæгъгæ, кæцыфæнды рæстæджы дæр уын  мах бацамондзыстæм нæ технологиты, уый хынцгæйæ, æмæ Хуссар Ирыстон кæй у ахæм регион, цыран сæндонкуыст традиционæй у приоритетон фадгуытæй сæ иу.

Мах ма бацыдыстæм Луганскы Адæмон Республикæйы рагондæр куыстуæттæй иу  ликер-арахъуадзæн завод «Луга-Нова»-мæ. Ацы куыстуаты продукци хицæн кæны бæрзонд гъæдæй. Продукцимæ бæрзондгъæддджын домæнтæ фидар æрцыдысты уартæ советон Гостты æмвæзадыл æмæ уыцы домæнтæ бахъахъхъæд æрцыдысты æххæстбæрцæй. Балцы фæстиуджытæм гæсгæ къухты бафтыд сразыдзинад, зæгъгæ, завод «Луга-Нова» цæттæ у иумиаг архайдмæ, уыцы нымæцы иумиаг куыстуат саразыны фæдыл дæр», – банысан кодта Кокойты Геннади.

Уый ма загъта, зæгъгæ, иннæ куыстуæттæ дæр фехъусын кодтой, æмгуыстадмæ цæттæ кæй сты, уый тыххæй. «Уынаффæ цыд финансон архайдтыты тыххæй, кæцытæ гæнæн ис æххæст цæуой Республикæ Хуссар Ирыстон æмæ Луганскы Адæмон Республикæйы ‘хсæн. Нырма ацы фадыджы ис бæрæг проблемæтæ, кæцыты бахъæудзæн скъуыддзаг кæнын, уымæн æмæ æхцайы ресурсты змæлды æнæ организацийæ цахæмфæнды æмгуыстады дæр уыдзæн проблемæтæ», – загъта Экономикон рæзты министр.

Бибылты Анатоли æвæрццаг аргъ скодта Луганскы Адæмон Республикæимæ æмгуыстады динамикæйæн, дыууæ республикæйы ахæм кусæгон балцыты ахсджиагдзинад банысан кæнгæйæ.

«Æнæмæнгхъæуæг у контакттæ аразын, нæ республикæты цардуагон архайды æппæт фадгуытæ рæзын кæныны тыххæй. Мах æнгомæй кусдзыстæм ацы республикæйы къухдариуæгад æмæ бизнесимæ. Дарддæр мах хъуамæ нæ хъус дарæм ацы балцы фæстиуджытæм æмæ къухтыбафтгæ бадзырдтæм. Æз хъуыды кæнын афтæ, Геннади, æмæ уæм бирæ æнхъæлмæ кæсын кæй нæ бахъæудзæн», – загъта Президент.

Луганскы Адæмон Республикæмæ РХИ-йы Экономикон рæзты министрады делегацийы балц Хуссар Ирыстоны Президенты гуырæн бон  6-æм февралмæ кæй æрхауд, уымæ гæсгæ Кокойты Геннади паддзахады сæргълæууæгæн радта Луганскы Адæмон Республикæйы къухдариуæгады арфæйы адрестæ æмæ зæрдылдарæн лæвæрттæ, афтæ ма мотоклуб «Ночные волки»-йы хайадисджытæй дæр.

Comments are closed, but trackbacks and pingbacks are open.