Дохтыры професси нымад цæуы кадджындæр професситæй сæ иуыл. Уæлдайдæр та йæ чи равзары, уый зæрдæхæлар адæймаг куы уа, уæд. Абон нæ ныхасы сæр у Республикон бирæпрофилон медицинон уагдоны исæн хайады терапевт Санахъоты-Захарова Тинатин.
«8-æм къласы ахуыргæнгæйæ аскъуыддзаг кодтон дохтыр суæвын. Уымæн æмæ мæ ныййарджытæ арæх рынчын кодтой. Мæ мад сæкæрнизæй рынчын уыд. Стæй мæ фыд дæр æрбарынчын, уымæн дæр ахæм симптомтæ уыд. Тынг æнкъард кодтон мæ ныййарджытæм кæсгæйæ. Мæхицæн фидар дзырд радтон, цыфæнды зын мын уа, уæддæр æнæмæнг дохтыр кæй суыдзынæн», – зæгъы Тинатин Захарова.
Медицинон институтмæ раздæр æмæ ныр дæр æнцон нæ уыд, иуæй дзы конкурс бирæ вæййы, иннæмæй та æххæст хъуамæ уай хъæуæг зонындзинæдтæй. Иу ахæмы йын йе ‘мкъласон чызг бауынаффæ кодта, цæмæй ацæуой Челябинскы горæтмæ, медицинон ахуыргæнæндонмæ фæлварæнтæ радтынмæ. Уым цард йæ фыдыфсымæр.
Астæуккаг ахуыр куы фесты дыууæ чызджы, уæд дзырд куыд уыдысты, афтæ хъуамæ ацыдаиккой Челябинскмæ, фæлæ Тинатины чызг æмбалæн йæ хъуыддæгтæ афтæ рауадысты æмæ йын фадат нал уыд ацæуынæн. Ныййарджытæ иунæгæй уый дæр нал уагътой, фæлæ Тинатин фидарæй лæуд кæй у ахуырмæ ацæуыныл, уый æмбаргæйæ, фыд йемæ араст Челябинскмæ. Уырдæм бæргæ ныххæццæ сты, фæлæ сæ бирæ фыдæбæттæ бавзарын бахъуыд æцæгæлон горæтмæ ныццæугæйæ. Уыимæ уыцы аз хаугæ дæр нæ бакодта мединститутмæ. Йæ чызгæмбалы фыдыфсымæр бацархайдта æмæ йæ Челябинскы рынчындæттæй иумæ бакодта кусынмæ санитарон хойæ, цæргæ та кодта семæ. Тинатин æмткæй йæхи снывонд кодта ахуырæн, æппынæдзух йæ къухы уыд чиныг æмæ та фæлварæнтæ дæттын афон куы æрцыд, уæд бахауд Челябинскы медицинон институтмæ. Институты ахуыргæнгæйæ Тинатин иууыл хуыздæр бахъуыды кодта йæ профессор Лефинцайы ныхæстæ: «Дохтыр хъуамæ йæ алы пациентмæ дæр дара хорз ахаст. Рынчын адæймаджы уавæры цæуынхъом хъуамæ уа, фæлмæн ныхас ма хæлæг кæна рынчынæн. Пациент та дохтыры хъуамæ уына зондыкъуыбар, хъуамæ йæ уырна, кæй йæ сдзæбæх кæндзæнис».
Захарова Тинатинимæ 24 азы медицинон хойæ кусы Гаглойты Маринæ, уый зæгъы, зæгъгæ йæ дохтыр у тынг зæрдæхæлар адæймаг, йæ хъæрныхас никуы райхъуыст пациенттимæ дзургæйæ. Уæлдай æвæллайгæ куыст та кодта ирон-гуырдзиаг хæсты рæстæджы. Рынчындон æхсын куы райдыдтой æмæ рынчынты ныккæндмæ хæссын куы хъуыд, уæд Тинатин уыд иууыл активондæр медицинон кусджыты ‘хсæн.
«Рынчындон куы æхстой, уæд бирæ дохтыртæ æрцардысты рынчынтимæ иумæ ныккæнды. Медицинон хотæ рагацау рыстуромæн ампулæтæ систой шприцтæм, семæ сæ рахæсс-бахæсс кодтой æмæ-иу куыддæр цæф адæймаг æрбаластой, афтæ-иу уадид судзин сарæзтой, цæмæй сæ рыстæй ма утæхсæн кæной.
Тинатины дыууæ фырт дæр уыцы рæстæг хæцгæ кодтой. Фæстæдæр æй, иу хатт Андрей бафарста, нæ дам тарстæ, махæй дæр, дам, искæй цæфæй куы баластаиккой. «Æз ын сабырæй сдзуапп кодтон, тæрсын æмæ мын хъуыдытæ кæныны рæстæг нæ уыд. Алкæцы цæф дæр кæйдæр хъæбул уыд. Уыдонæн æххуыс кæ-ныныл куыд архайдтон, сымахæн дæр афтæ кодтаин».
Рынчындоны травматологион хайады медицинон хо нын Заха-ровайы тыххæй афтæ радзырдта: «Тинатин ма кусы Зары хъæуы фадыгон дохтырæй дæр. Уымы адæмæй исчи рынчындонмæ куы æрбахауы, уæд йе сменæ куынæ вæййы, уæддæр æй æрцагурынц».
УАЗÆГТЫ Марфа
Comments are closed, but trackbacks and pingbacks are open.