Ныры фæсивæд чингуытæ кæсын тынг нал уарзынц. Техникон прогресс бонæй-бонмæ размæ цæуы, бауромæн ын нæй, æмæ сæ цæмæй бынтон ма фæиппæрд уой, æрбаввахсдæр сæм уой уый тыххæй сын ныр бакæсæн ис электрон хуызы дæр.
ХИПУ-йы студентты æмæ горæты хистæр кълæсты ахуырдзауты ‘хсæн ауагътам æрфарст, Интернеты дуджы мыхуыргонд чиныг æвзарынц æви электрон хуызы чиныг.
Кæй зæгъынц æй хъæуы, хуыздæр у гæххæттыл мыхуыр чиныг кæсын. Электрон чингуытæй цæстытæ риссынц. Телефоны кæнæ компьютерты экрантæм кæсгæйæ, цæстытæ фæллайгæ кæнынц.
Мыхуыр чиныг куы райсæм, уæд нын уый удæнцой фæдæтты, уымæн æмæ йæ дæ къухмæ райсгæйæ, йæ сыфтæ йын фæлдахгæйæ, ды архайыс бæлвырд предметтимæ, кæцы дын у зынаргъ, райсдзынæ йæ кæдфæнды дæр æмæ кæмфæнды дæр, электроэнерги ис æви нæ, уымæ нæ кæсгæйæ. Электрон чиныгмæ уыцы миниуджытæ нæй, адæймагмæ æцæгæлондæр кæсы.
Фæлæ, хъыгагæн, афтæ чи хъуыды кæны, ахæмтæ бирæ нæ разындысты… Сæ фылдæр та чиныджы бæсты равзарынц компьютерон хъæзтытæ, соци-алон хызæгтæ. Дыууæ хуыз чиныгæн дæр стыр ахадындзинад ис царды æмæ йæ хъуамæ кæстæртæн æмбарын кæной сæ ныййарджытæ.
Иуæй-иу мыхуыргонд чингуытæн сæ гъæд полиграфион æгъдауæй бæрзонд нæ вæййы. Аив фæлгонц чиныгæн та стыр нысаниуæг ис. Бирæ ныййарджытæ хъæуæгыл дæр нæ нымайынц цымыдисон æмæ пайда чингуытæй сæ сабиты сбуц кæнын.
Уыимæ ма хорз чиныг абон аслам аргъæй нал балхæндзынæ æмæ уый дæр кæрæдзийæ дард кæны чиныг æмæ чиныгкæсæджы, алкæйы къухы не ‘фты йæ балхæнын.
Интернетæн йæ гæнæнтæ фылдæр сты, уый руаджы конд æрцыдысты алыгъуызон фадæттæ. Интернетæй чи пайда кæны, уымæн дзы йæ бон у 400 чиныгæй фылдæр бакæсын ирон æвзаджы, ирон æгъдæутты тыххæй, уыдонæй уæлдай ма, бирæ æндæр ахсджиаг æрмæджытæ.
Ноджыдæр ма конд æрцæудзысты ирон æвзаг æмæ литературæйæ тестытæ, цæмæй ахуырдзаутæн сæ бон уа бæрæг кæнын, куыд зонынц ирон æвзаг æмæ литературæ, уый. Ахуыргæнæн чингуытæ, семæ ма кусæн тетрæдтæ дæр ивд æрцæудзысты электрон хуызмæ. Фæзындзæн фыццаг уырыссаг-ирон электрон тæлмацгæнæг, уыимæ мобилон дзырдуæттæ.
Фæзæгъынц, зæгъгæ, къухæй фыст нæ судзы. Уый та ууыл дзурæг у, æмæ сæ электрон хуызы чингуытæ никуы баивдзысты, – ахæм у сæ хъуыды библиотекæты кусджытæн. Чиныгкæсæгæн чиныг у удварны хæлц æмæ æнæ уымæй йæ бон цæрын нæ уыдзæн. Уымæ гæсгæ адæймагад цасфæнды ма ацæуа йæ рæзты фæндагыл, уæддæр æнæмæнг зæлдзысты мыхуыр чиныджы сыфты музыкалон зæлтæ. Уымæн стыр тых ис, фæлтæрты кæрæдзийыл бæтты.
ДРИАТЫ Лейла
Comments are closed, but trackbacks and pingbacks are open.