Спорт

ТЕННИС

Дунейы теннисы радон сенсаци баст у ирон теннисист Хъæрæцаты Асланы номимæ. Уый дарддæр дæр дисы æппары спорты ацы хуызы специалистты æмæ спортуарзджыты. Аслан Сербийы гом чепмионаты æрдæгфиналы фæуæлахиз дунейы рейтингы фыццаг теннисист Новак Джоковичыл. Джокович у серб æмæ йæ, кæй зæгъын æй хъæуы фæндыд йæ райгуырæн бæстæйы спортуарзджыты раз рамбулын.

Ацы дыууæ теннисисты ма февралы фембæлдысты Австралийы гом чемпионаты. Уæд Джокович уыд тыхджындæр. Фæлæ ныр ирон теннисист йæхи равдыста ноджы хъæддыхдæрæй. Хъазт цыд 3 сахат æмæ 27 минуты æмæ фæцис ахæм хыгъдæй 7:5, 4:6, 6:4. Афтæмæй Аслан ахызт финалмæ.

Финалы Асланы ныхмæлæууæг та уыд италиаг Маттео Берреттини.  Хъыгагæн, Асланы физикон уавæрыл бандæвта Джоковичимæ хъазт. Финал та цыд дыккаг бон æмæ æххæстæй нæ баулæфыд.

 

ФУТБОЛ

Национ футболон къорды 38-æм туры Дзæуджыхъæуы «Алани» уазæгуаты хъазыд Тольяттийы «Акрон»-имæ. Алайнæгтæн хъазт рауад уæззау. Зæгъæн ис æмæ  ууыл бирæбæрцæй бандæвтой тæрхонгæнæджы дызæрдыггаг уынаффæтæ. Афтæ ма дзæуджыхъæуккæгтæн цы бирæ хорз уавæртæ уыд пурти бакъуырынæн, уыдонæй дæр кæй нæ спайда кодтой, уый.

53-æм минутыл Гуырцъыты Батразæн бантыст хыгъд байгом кæнын. Фæлæ 75-æм минутыл тæрхонгæнæджы хъуыдымæ гæсгæ «Алани»-йы хъахъхъæнæг фæтк фехæлдта йæ иварон фæзуаты, зæгъгæ, сфæлдæхта «Акрон»-ы размæбырсæджы. 11-метрон цæфы фæстиуæгæн хыгъд ссис 1:1. Банысан кæнын хъæуы уый, æмæ раздæр фысымты хъахъхъæнæг къухæй кæй ахъазыд йæ иварон фæзуаты, фæлæ уый тæрхонгæнæг нæ федта.

Уыцы хъуыддаджы фæстæ дæр алайнæгтæ нæ ауагътой сæхи æмæ уæддæр бырстой размæ. Æмæ сын 90-æм минутыл бантыст дыккаг пурти бакъуырын. Расгуыхт Бутта Магомедов. Афтæмæй «Алани» æрæмбырд кодта 70 очкойы æмæ турнирон таблицæйы дарддæр дæр цæуы 4-æм бынатыл.

Радон туры алайнæгтæ 28-æм апрелы сæхи фæзуатыл хъаздзысты Краснодар-2»-имæ.

 

ЕРЫСТÆ ЛЕНК КÆНЫНÆЙ

Спорты галуан «Олимп»-ы уагъд æрцыд турнир «Золотая рыбка – 2021»-ы 4-æм этап. Йæ хайадисджытæ ерыс кодтой комплексон ленк кæнынæй 100 метры дистанцимæ. Турниры ма хайад райстой цæгатирыстойнаг командæ, кæцйы сконды уыд 17 спортсмены. Ерысты уæлахиздзаутæ систы: Уалыты Тамилæ (2012 азы гуырд æмæ уымæй кæстæртæ), Цхуырбаты Георги (2012 азы гуырд), Уалыты Валерия (2011 азы гуырд), Лалыты Арсен (2011 азы гуырд), Уалыты Даянæ (2010 азы гуырд), Уалыты Александр (2010 азы гуырд), Беджызаты Тамилæ (2009 азы гуырд, Дзæуджыхъæу), Никита Лягин (2009 азы гуырд), Тыджыты Дианæ (2008 азы гуырд), Тасойты Арсен (2008 азы гуырд), Гуыбаты Мария  (2007 азы гуырд) æмæ Чиаты Михаил (2007 азы гуырд).

«Иумæйагæй сисгæйæ хорз бæрæггæнæнтæ равдыстой. Уыдонмæ гæсгæ аргъ кæндзыстæм ивгъуыд азы бакæнгæ куыстæн. Разæй ма нæм июны мæйы æнхъæлмæ кæсынц квалификацион ерыстæ. Уым сывæллæттæ сæ цæттæдзинад æвдисдзысты цы дистанци æмæ ленк кæныны стиль равзарой, уымæй», – фехъусын кодта РХИ-йы ленк кæныны федерацийы президент Евгения Терлеева.

ХУРИТЫ Батрадз