Цайдагъ сæ кæнынц музыкалон аивадыл

Ацы хъуыддаджы Цхинвалы горӕты Тедеты Георгийы номыл фыццаг музыкалон скъола йӕ дуӕрттӕ байгом кодта 1931 азы. Йæ коллектив уал азы дӕргъы йе ‘ппӕт тыхтӕ ӕмӕ зонындзинӕдтӕ не вгъау кӕны ӕвзонг фӕлтӕры музыкалон аивадыл цайдагъ кæныныл. Йӕ раздӕры хъомылгӕнинӕгтӕй иутӕ сӕ дарддӕры архайдӕн равзӕрстой аивады ацы хуыз ӕмӕ кад ӕмӕ радимӕ дарддӕр кӕнынц сӕ раздӕры ахуыргӕнджытӕ-хъомылгӕнджыты арфӕйаг хъуыддаг.

Скъолайы къорд азты ӕнӕзӕрдӕхудт куыст кӕны Хуссар Ирыстоны адӕмон ахуыргӕнӕг ӕмӕ культурӕйы сгуыхт архайӕг Тедеты Маринӕ. Ӕнгом коллектив йӕ разамындӕй кӕддӕриддӕр тырны ӕрвылбонон хӕстӕ ӕнӕзӕрдӕхудтӕй ӕххӕст кӕнынмӕ. Уыдон та сты нӕ республикӕйы сгуыхт ахуыргæнджытæ Ӕлборты Мананӕ, Гӕджиты Жаннӕ, Маркарян Лили, Харебаты Татьянӕ, Ломидзе, Гаглойты Маринӕ, Харебаты Додо, Куымӕ-ридтаты Тинӕ, Дзадтиаты Иринӕ, Маринӕ, Котолиты Тамарӕ, Тасойты Валентинӕ, Жуйкова Наталья ӕмӕ иннӕтӕ.

Скъолайы ахуыр кӕнынц ахӕм дӕсныйӕдтыл, куыд фортепиано, скрипкӕ, аккордеон, ирон фӕндыр, вокалон ӕххӕсткӕнынад, эстрадон зард, домрӕ ӕмӕ гитарӕ. Ӕхсызгон у уый, ӕмӕ алы аз дӕр кӕй фылдӕр кӕны ахуыргӕнинӕгты нымӕц. Цӕвиттон, кӕд ивгъуыд ахуыры аз скъола райста 60 ахуыргӕнинаджы, уӕд ног ахуыры аз та сӕ нымӕц у 66. Директор Тедеты Маринӕ куыд радзырдта, афтӕмӕй сӕ хъомылгӕнинӕгты бацӕттӕ кӕнынц алыгъуызон бӕрӕгбонон мадзӕлттӕм ӕмӕ сӕ ралӕудӕй барухс кӕнынц  аивадуарзджыты зӕрдӕтӕ. Уымӕй дарддӕр ма апрелы мӕйы фӕнд кӕнынц Дзау ӕмӕ Знауыры районтӕм ацӕуын, уым бынӕттон аивадуарзджыты сӕ арӕхстдзинадимӕ базонгæ кæнын. Уыцы балцытӕн уыдзӕн стыр нысаниуӕг, базонгӕ уыдзысты иуӕй сӕ аивадимӕ, стӕй ахуыр кӕндзысты кӕрӕдзийы фӕлтӕрдзинадыл дӕр. Коллектив буц у йӕ хорз кӕстӕртӕй, уыдон хорз ахуыры ӕмрӕнхъ активон хайад райсынц бӕрӕгбонон концертты дӕр. Уыдон та сты Бибылты Савели, Гасситы Мария, Гӕззаты Мадинӕ, Дзабиты Моникӕ, Санахъоты Анастасия, Наниты Лидӕ, Гатыгкоты Линӕ, Зассеты Михаил, Гасситы Нинӕ, Гӕззаты Аленӕ, Плиты Аннӕ ӕмӕ ӕндӕртӕ.

Скъолайы библиотекӕ хъӕздыг у хъӕуӕг литературӕйӕ ӕмӕ сӕ ахуыр-гӕнинӕгтӕ пайда кӕнынц. Ацы ран йӕ хӕстӕ намысджынӕй ӕххӕст кӕны, музыкалон ахуырдзинад кӕмӕ ис, ахӕм кусӕг – Гаглойты Альбинӕ. Уый кӕддӕриддӕр аудгӕ ахаст дары, чи йӕм ӕрбацӕуы, уыдонмӕ ӕмӕ сын литературӕ ссарыны бакӕны ӕмбӕлон ӕххуыс.

Ӕнӕмӕнгхъӕуӕг та куыднӕ сты музыкалон инструменттӕ ӕмӕ уыцы хъуыддаджы дӕр скъолайы разамынад архайы. Æрæджы сӕхи ӕхцайы фӕрӕзтӕй балхӕдтой адаргӕ пианино. Хорз ӕххуыс банкъардтой Цхинвалы горӕты администрацийы сӕргълӕууӕг Коцты Аланӕй ӕмӕ самал кодтой ног пианино ӕмӕ цыппар та скрипкӕтӕ, Культурӕйы министрад та сын сфӕрӕз кодта ирон фӕндыр.

Хӕрзиуӕгон у сӕ куыст ӕмӕ сын ноджыдӕр ӕнтысӕд.

Хуыбиаты Никъала