Цæттæ сæ кæнынц асфальт кæнынмæ

Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты ацы аз нæ горæты уынгтæй хъуамæ арæзт æрцæуа аст. Развæлгъау уал уыдонæн ивд цæуынц газы, нуазыны доны æмæ канализацийы хæххытæ.

 Республикæйы Арæзтад æмæ архитектурæйы министры хæдивæг Гаглойты Сергей куыд зæгъы, афтæмæй уыцы аст уынгæй авд уынджы активонæй кусынц зæххы бын коммуникацитæ ивыныл. Газы хæтæлтæ ивыныл кусы паддзахадон унитарон куыстуат «Энергоресурс», доны æмæ канализацийы хæххытæ ивыныл та – паддзахадон унитарон куыстуат «Водоканал».

Нæ горæты Белинскийы уынджы ныртæккæ аразджытæ кусынц газ уадзыныл, магистралон трубæтæ æвæрыны фæдыл куыстытæ æххæст æрцыдысты 75 процентæ. Доны æмæ канализацийы фæдыл куыстытæ та – 80 процентæй.

Газуадзæн куыстытæ ныртæккæ фесты Хъайтарты æмæ Кимы уынгты. Ныртæккæ Кимы уынджы цæуынц хæрзарæзтадон куыстытæ – калынц ыл ставд цъæлдур æмæ лыстæг хуырдур. Тротуарты та цæттæ кæнынц плиткæ сыл сæвæрынмæ. Табуйы фырты уынджы уадзынц магистралон газы хахх, хæдзæрттæм бауагътой газ, æвæрд цæуынц газнымайæнтæ. Æвæрд æрцыдысты магистралон канализацион трубæтæ дæр æмæ аразджытæ хæдзæрттæм уадзынц канализацион æмæ донуадзæн хæххытæ.

Революцийы уынджы цæуынц газуадзæн куыстытæ, фæуд кæны канализацион хахх, кусынц доны хахх уадзыныл æмæ цъайтæ аразыныл дæр.

Базарадон уынджы æвæрынц магистралон газуадзæн, газ уадзынц хæдзæрттæм, æвæринаг ма сты газынымайæнтæ, доны æмæ канализацийы фæдыл куыстытæ фесты.

Нæузæххонты уынджы фæуд кæнынц газуадзæн куыстытæ, монтаж кæнынц газрегуляторгæнæн пункттæ. Куыст цæуы дон æмæ канализацийы хæххытæ хæдзæрттæм уадзыныл.

Гаглойты Сергей ма куыд зæгъы, афтæмæй Плиты Ароны уынджы дæр аразджытæ рæхджы æрывналдзысты хæрзарæзтадон куыстытæм.

Банысан кæнын хъæуы уый æмæ Инвестпрограммæмæ хаст объекттæй дарддæр ма «Водоканал»-æн хæсгонд у, цæмæй Джиоты Аланы проспекты кæрон 130, 130 а, 128,  128 а æмæ 128 б бирæфатерон корпусты территорийыл раивой, чи базæронд, уыцы канализацион трубæтæ. Азы райдианæй Сталины уынджы 96 æмæ 98-æм хæдзæрттæ. Фидауынгæнджыты уынджы 5, 6, 8 æмæ 10-æм хæдзæрттæ. Путины уынджы 2-æм хæдзары ма цалцæг æрцыдысты канализацион хæххытæ.

БЕСТАУТЫ Валя