Адæймагæн йæ зæрдæйы равг афтæ арæх цæмæн фæивы? Зæгъæм, райсомæй уын уыдис хорз зæрдæйы равг, стæй бонæй та фехæлдис, изæрырдæм та уын фæзындис апати. Ахæм æвиппайды фæивд, кæй зæгъын æй хъæуы, æндавдзæнис уæ куыстыл, уæ цардыл иумæйагæй сисгæйæ. Уымæ гæсгæ сæйраг у бамбарын, цæй мидæг ис аххосаг æмæ йæ æмбæлон уагмæ куыд ис æркæнæн.
Адæймагæн йæ зæрдæйы равг, гæнæн ис, æмæ ива стрессы тыххæй дæр, уый бирæбæрцæй дæр баст у нæ хинкъарынадимæ. Исты хъыгаг уавæр куы сæвзæры, уæд йæ фæдыл фæзыны стрессон реакци дæр, уый фæстиуæгæн та адæймагмæ фæзыны фæлладдзинад, мæстыгæрдзинад æмæ фесæфы аппетит дæр. Диссаг дæр нæу, адæймаджы хорз равг ахæм фæстиуджыты фæстæ кæй фæивы.
Хроникон стресс у æппæты тæссагæр адæймаджы организмæн. Кæд æмæ арæх стрессы бын бахаут уæ куысты тыххæй кæнæ уæхи сæрмагонд царды проблемæты тыххæй, уæд сæйрагдæр у, цæмæй сахуыр кæнат уæхи уæ мидæггагон цардæвзарæнтимæ тох кæнын. Адæймаджы равг ма гæнæн ис æмæ афтæ раив-баив кæна, нозтимæ йын проблемæтæ куы уа, уæд. Уымæн æмæ нозтуарзаг адæймагæн фæзыны нозтмæ æгæр æмхицдзинад, тынг ыл сахуыр вæййы æмæ уый та йæ рады расайы психологион хæццæдзинад. Æппæт уыдæтты фæстиуджытæн адæймагæн тынг фæраив-баив кæны йæ равг æмæ йæ уымæ гæсгæ фæхъæуы «нæ» зæгъын ахæм зианхæссæг ахуырæн æмæ уайтагъддæр дохтырмæ бацæуын. Адæймагæн йæ равг гæнæн ис æмæ ива психикон хæццæдзинады тыххæй дæр. Ис бирæ ахæм низтæ, кæцытæ комкоммæдæр баст сты адæймаджы равгы фæивдыл.
Фыццаг — биополярон хæццæдзинад, кæцы тæссаг у уымæй, æмæ адæймагæн йæ равг тагъд кæй фæраив-баив кæны: нырма вæййы хорз, стæй æвиппайды фæивы æвзæрырдæм. Ахæм тæссаг фæивдтытæ гæнæн ис æмæ æркæной адæймаджы хи марынмæ дæр.
Дыккаг — хъусдарды дефициты синдром кæнæ та — гиперактивондзинад. Ахæм синдром арæхдæр фæзыны сывæллæттæм кæнæ та — æнахъомтæм. Ахæм сывæллæттæ арæх вæййынц импульсивон æмæ сæ равг дæр арæх фæраив-баив кæны, ахæм уавæры адæймагæн зын у лæмбынæг иу архайдмæ йæ хъус æрдарын, арæх фæиппæрд вæййы уыцы хъуыддагæй æмæ æппынæдзух кæны тæлфгæ.
Æртыккаг — арæйнаг хæццæдзинад. Ацы низы рæстæджы та адæймаджы равг райдайы ивын цалдæр сахатæй цалдæр къуырийы онг. Ацы хæццæдзинадимæ иумæ адæймагæн ивынц йæ цæстæнгас дунемæ, йæ хъуыдытæ æмæ ма уыимæ иумæ йæ æргъадтæ дæр.
Цыппæрæм — дистими кæнæ та йæ дохтыртæ куыд хонынц — фидар депресси. Ацы низы рæстæджы та адæймаджы равг ивы тынг æвзæрæй æлгъаг равгы онг. Ахæм уавæр гæнæн ис æмæ аххæсса бирæ азты дæргъы æмæ тынг хъыгдара адæймаджы.
Æрмæг мыхуырмæ бацæттæ кодта ДЫГЪУЫЗТЫ Зæринæ
Comments are closed, but trackbacks and pingbacks are open.