Цæмæй H1N1-ы хуызы грипп ма æрбахиза Хуссар Ирыстонмæ, уый тыххæй ист цæуы мадзæлттæ

Бæрæг куыд у, афтæмæй Гуырдзыстоны фæзынд H1N1 хуызы грипп (хуыты грипп). Ис дзы  уды зиæнттæ дæр. 18 январы официалон бæрæггæнæнтæм гæсгæ, уды зиæнтты нымæц уыд 18 адæймаджы.

H1N1 хуызы грипп цæмæй Хуссар Ирыстонмæ ма  æрбаивæрза æмæ ма апарахат уа, уый фæдыл цы  мадзæлттæ ист цæуынц, уый тыххæй «Спутникы» пресс-центры ауагъдæуыд пресс-конференци. Хайад дзы райстой РХИ-йы Паддзахадон æдасдзинады комитеты Арæнхъахъхъæнæг службæйы  сæргълæууæджы хæстæ рæстæгмæ æххæстгæнæг Алиханты Валерьян, Цхинвалы централон поликлиникæйы дохтыр – иммунолог Мæргъиты Маринæ æмæ инфекционист Годжыцаты Лали.

Алиханты Валерьян куыд радзырдта, афтæмæй Паддзахадон æдасдзинады комитеты Арæнхъахъхъæнæг службæ æппæт дæр аразы, цæмæй  H1N1-ы хуызы грипп ма æрбахиза нæ республикæйы территоримæ. Уый банысан кодта,  зæгъгæ, Республикæ Хуссар Ирыстоны Президент Бибылты Анатоли уынаффæ райста, цæмæй Гуырдзыстонимæ паддзахадон арæныл цы хизæн пункттæ ис, уыдон 11 январæй æхгæд æрцæуой, цалынмæ сæрмагонд уынаффæ райст æрцæуа, уæдмæ. Ома, цалынмæ низы уавæр нæ  æрнывыл уа, уæдмæ.

Уый фæстиуæгæн æхгæд æрцыдысты Синагур, Карзман, Пъереу æмæ Раздæхæны уадзæн пункттæ. «О, фæлæ, иуæй-иу æмбæстæгтæ халынц паддзахадон арæныл цæуыны фæтк æмæ сæ куы æрцахсæм, уæд фæсидæм тагъд медицинон æххуысы службæмæ, кæнæ та сæ нæхæдæг бакæнæм республикон рынчындонмæ, цыран сæ басгарынц дохтыртæ», – банысан кодта Алиханты  Валерьян. Йæ ныхæстæм гæсгæ контроль цæуы гуманитарон коридор «Цхинвал Ергнет»-ыл дæр, кæцыйыл, бæрæг куыд у, афтæмæй Сырх Дзуары Дунеон Комитеты руаджы иуæй-иу экстренон рынчынты хос кæнынмæ аласынц Гуырдзыстонмæ, æмæ фæстæмæ.

Уыимæ ма банысан кодта, зæгъгæ, инфекцийы тыххæй регулярон æгъдауæй æмбарынгæнæн куыст кæнынц арæнгæрон хъæуты цæрджытимæ æмæ чысыл дызæрдыгдзинады тыххæй дæр фехъусын кæнынц æмбæлон службæмæ.

Ацы гриппы ныхмæ профилактикон куыст æмæ райсгæ мадзæлтты тыххæй радзырдтой медиктæ дæр.

Дохтыр-иммунолог Мæргъиты Маринæ куыд банысан кодта, афтæмæй адæймæгтæ мæ-лынц, гриппæн йæхицæй нæ, фæлæ уый фæстиуæгæн организмы цы вазыгджын процесстæ æрцæуы, уымæй. Тæссаг къорды сты æнхъæлцау сылгоймæгтæ, 60-65 азæй уæлæмæ кæуыл цæуы, ахæм ацæргæ адæймæгтæ, 6 азы онг кæуыл цæуы, уыцы сывæллæттæ, уæззау потологи кæмæн ис, ахæм æвзонг адæймæгтæ, лæмæгъ иммунитетимæ адæймæгтæ. Уый тыххæй ацы къорды адæймæгтæм ис уæлдай хъусдард.

Йæ ныхæстæм гæсгæ, Хуссар Ирыстоны Æнæниздзинад хъахъхъæныны министрад развæлгъау æппæт мадзæлттæ  дæр исы, цæмæй республикæйы территорийыл инфекцийы артдзæстытæ ма фæзыной. Ацы мадзæлттæ фыццаг аз ист нæ цæуынц. Фæстаг 5-6 азы дæргъы республикæйы уагъд цæуы активон вакцинаци.

«Ацы гриппæй цæрджытæ хуыздæр хъахъхъæд цæуынц вакцинацийы руаджы. Вакцинæ вирусы ныхмæ ратты фидар иммунон дзуапп. Вакцинæ саразыны фæстæ – 8-12 боны фæстæ – гриппы ныхмæ иммунитет фæтыхджындæр вæййы. Вакцинæйæн æмгъуыд кæй  ис, уый тыххæй вакцинæ аразын хъæуы афæдз иу кæнæ дыууæ хатты, аразын æй хъæуы октябрь-ноябры. Уыцы мæйты йæ чи нæ сарæзта, гæнæн ис, уый йæ сараза декабры мæйы  цалынмæ гриппы сезон нæ райдайы, цæмæй уæдмæ иммунитет сфидар уа.

Вакцинацигонд чи не ‘рцыд, уый, цæмæй йæхи æмæ йæ хæстæджыты низæй бахиза, уый тыххæй хъуамæ æххæст кæна бæрæг фæткойтæ. Фыццаджы фыццаг хъуамæ дара маскæ, йæхи хиза, бирæ адæм кæм æмбырд кæнынц, уыцы бынæттæй, йæ къухтæ æхса арæх, къухæй салам ма дæтта. Цæмæй вирусæй механикон æгъдауæй асæрибар уа, уый тыххæй хæдзармæ æрбацæугæйæ, хъуамæ ныхса йæ фындз», – банысан кодта Мæргъиты Лали.

Йæ ныхæстæм гæсгæ, абоны онг республикæйы H1N1 хуызы гриппæй рынчыны иунæг цау дæр нæ уыд, фæлæ 2018 азы ноябрæй абоны онг карз респираторон вирусон инфекцийæ фæрынчын 215 адæймаджы.

Йæ рады инфекционист Годжыцаты Лали та банысан кодта зæгъгæ, республикæйы планон вакцинаци  арæзт цæуы фæстаг фондз азы. Вакцинаци арæзт цæуы сентябрæй декабры онг.

«2018 азы фæззæгæй, ныры онг Хуссар Ирыстоны вакцинацигонд æрцыд 1332 адæймаджы. Пайда кæнæм уæрæсейаг вакцинæйæ, уый йæхи хорз равдыста, организм æй хорз исы, ницы фæрсаг эффект расайы», – загъта инфекционист.

Осиаты Индирæ