Республикæйы ветеринарон службæ ацы бонты ауагъта фосы инфекцион низты ныхмæ комплексон-профилактикон мадзæлттæ.
Сæрмагонд дезинфекцион ба-рьер æвæрд æрцыд Гуырдзыстонæй Цхинвалмæ æрбахизæнты.
Хъæууон хæдзарады министр Пухаты Лев куыд зæгъы, афтæмæй ахæм барьертæ æвæрд æрцæудзæнис Ленингоры районы уадзæн пункт «Раздахæн» æмæ Дзауы район Карзманы ахизæнты дæр.
Пухаты Левы ныхæстæм гæс-гæ низы ныхмæ тох кæнынæн ис æндæр амал дæр:
«РХИ-йы хъæууон хæдзарады фосдард æмæ ветеринарийы хайад уадзынц профилактикон мадзæлттæ хуыты африкæйаг емы-нæйы ныхмæ. Ацы низ нæ республикæйы фæзынд цалдæр азы размæ æмæ кæд рæстæгæй-рæстæгмæ æрнымæг вæййы, уæддæр та ногæй фæзыны. Уымæн æмæ æнæниз фосыл дæр бахæцы æмæ кæд уайтагъд нæ, уæддæр фæстæдæр раргом кæны йæхи.
Фосы хицау куыддæр бафиппайа, йæ хуытæй исчи рарынчын, уæд уайтагъд хъуамæ фехъусын кæна ветеринарон дохтырæн. Ветеринарон дохтыр та уадид фосдарæгæн хъуамæ радта æмбæлон инструкцитæ, фос кæм дарынц, уым та территори дезинфекци скæной.
Цы фос амардысты, уый тыххæй дæр æнæмæнг зæгъын хъæуы ветдохтырæн, цæмæй сын уый сæ мæлæты аххосаг рафæлгъауа æмæ се скуынæг кæныны тыххæй райст æрцæуа æмбæлон мадзæлттæ», – зæгъы хъæууон хæдзарады министр.
Ныридæгæн Знауыр æмæ Дзауы районты хуытæ чи дары, уыдоны хуыдæттæ æмæ сæ алфæмблай дезинфекци æрцыд, цы сæрмагонд машинæ сæм ис, уый фæрцы. Ахæм куыст æрцæудзæн æгас республикæйы территорийыл дæр.
Республикæйы ветеринарон службæйы специалист Лолоты Владимир куыд зæгъы, афтæмæй сæм африкæйаг емынæйы ныхмæ тохы тыххæй ис сæрмагонд инструкци.
Фадыгон ветеринарон дохтыртæ цæрджыты ‘хсæн уадзынц фæдзæхсæн беседæтæ, цæмæй сæ хуыты æддæмæ ма уадзой, кондæй сæ дарой. Иуæй-иу хъæуты хуытæ рацу-бацу кæнынц дыууæрдæм æмæ афтæмæй низ парахат кæны.
Уый зæгъы, зæгъгæ, цæрджытæй чидæртæ сæ фосæн нæ фæуадзынц вакцинæ аразын. Вакцинаци та фосæн аразын хъæуы аз иу хатт. Ветеринар вакцинæ аразы æнæаргъæй. Уымæ гæсгæ хуыздæр у афоныл фосы низæй бахизын.
УАЗÆГТЫ Марфа
Comments are closed, but trackbacks and pingbacks are open.