Паддзахадон ветеринарон æмæ фито-санитарон цæстдарды службæйы сæргълæуæг Мæргъиты Алан куыд фехъусын кодта, афтæмæй «Югосельхознадзор»-ы лаборатори ӕрӕджы ифтонг ӕрцыд ног сæргонд ветеринарон ифтонгадтæй. Уыдон фæрцы эффективонæй бӕрӕг цæудзæнис фыдызгъæл, урсаджы гъӕд, фосыл цы низтæ фæзыны, уыдон. Нырмӕ ахæм лабораторион иртæстытæ арæзт цыд Крапоткинæйы ветеринарон лабораторийы.
Мæргъиты Алан куыд зæгъы, афтæмæй куыд адӕм афтæ фос дæр рынчын кæнынц алыгъуызон низтæй. Низыхатт бæлвырд куынæ зонай, уæд мадзæлттæ ист дæр нæ фæцæуы. Парахат æрцæуы цыбыр рæстæгмæ æмæ ратты æвзæр фæстиуæг.
Цалдæр азы размæ Знауыры районы фæзынд африкæйаг емынæ цалынмæ «Юго-сельхознадзор» фосы анализтӕ Крапоткинæйы ветеринарон лабораторимæ ласта æмæ уым хатдзæгтæ арæзтой, уæдмæ низ апарахат æмæ ныццагъта æрмæст Дзагъинайы хъæуы 130 сæры хæдзарон фос.
«Фосы æнæниздзинадмӕ æмæ продуктивондзинады хъус дарынны сæйраг хæс ис ветеринарон кусæгыл. Цæмæй фос алыгъуызон низтæй хызт уой, уый тыххæй сын ана-лизтæ кæнын æрмæстдæр куы фæрынчын уой, уæд нæ хъæуы, фæлæ алы сезоны дæр. Махæн нырмæ уыцы уавæртæ нæ уыд. Мах базӕртты, магазинты арæх фенæм уæййаг, хисæрмагонд фосы æмæ фермерон хæдзарадты фыдызгъæл, афтӕ ма урсаджы про-дукттæ уæйгæнгæ дӕр. Фæлæ нæ зонæм, уыцы æхсыры гъæд цахӕм у, уый. Ныр вете-ринарон лабораторийы цы сæрмагонд ифтон-гӕдтӕ фæзынд уыдоны руаджы нæ бон уы-дзæн æхсыры сойады бæрц, СОМО æмæ лак-тоза сбæрæг кæнын», – зæгъы Мæргъиты Алан.
Уый ма загъта, зæгъгæ, лаборатори ифтонг у PH-метрæй дæр, кæцы рабæрæг кæны адæй-маджы организмæн тæссаг цы низ у æмæ йыл фосæй æнцонтæй цы низ бахæцы, ома, трихи-налы уыцы бациллæтæ. Трихиналæй рынчын фыдызгъæл бахæргæйæ адæймаджы буары æрцæрынц паразиттæ æмæ расайынц аллер-гийы низтæ. Раздæр нæхимæ арæзт нæ цыд ахæм анализ, фæлæ ныр трихинеллоскопы фæрцы бæрæг цæудзæн низы хатт. Ацы ифтонгады фæрцы бæрæг цæудзæн фы-дызгъæлы сæкæры бæрæггæнæн дæр. Фосы уыцы низтæм комплексонæй хъусдард куы цæуа æмæ лабораторион æгъдауæй иртæст куы цæуой, уæд ветеринарон дохтыр зондзæн цы препараттæй хос кæнын хъæуы хæдзарон фосæн, уый.
Ветеринарон лаборатори ма ифтонг æрцыд нæмыгон культурӕты мыггæгты низтæ бæ-рæггæнæнæй дæр. Минералон хъацæнты руаджы ис хъæздыг тыллæг райсæн. Нæ климатон уавæртæ фадат дæттынц, уымæн. Фæлæ, сæйраг у, уый фæстæ уыцы хойраг цы уавæрты æфснайд æрцæуа. Халсæрттæ æмæ дыргътæ дæр кæм æмæ куыд æфснайд цæуой, уымæй бирæ кæнгæ у. Нæмыгон культурӕты тауинæгтæ бæзгæ сты æви нæ, уый чи бæрæг кæны, уый та хуыйны Термостат. Уымæй дæр ифтонг æрцыд «Югосельхознадзор». Мæргъиты Алан куыд зæгъы, афтæмæй æппæт ацы анализтæ дæр ветеринарон лабораторийы арæзт цæудзысты æнæаргъæй. Фермерон хæдзарадтæ, арендатортæ æмæ не ‘мбæстæгтæй фосдард чи райтынг кодта, дыргъкуыст, халсæрттæ æмæ хойраджы куыст чи кæны, уыдонæй алкæмæн дæр бар уыдзæн лабораторийы лæггæдтæй пайда кæнынæн.
«Нырмæ дæр нæ лабораторийы цы ифтонгадтæ уыд, уым арæзт цыд хицæн æмæ хицæн низты ныхмæ анализтæ. Уый тыххæй реактивтæ хицæн цæуы Паддзахадон эпизоотологион рафæлгъауыны хайады. 2019 азы иртасæнтæ сарæзтой 10 500 хатты. 2018 азы та ахæм анализтӕ сарæзтам æрмæстдæр 3 100 хатты», – зæгъы «Югосельхознадзор»-ы сæргълæууæг
Уый ма загъта лабораторийы кæй ис квалификациджын кусджытæ. Хорз кусæгон ахастытæ сын ис Цæгат Ирыстон-Алани æмæ Крапоткинæйы ветлабораторитимæ. Уыдон фæрцы, зӕгъгӕ, нæ лабораторийы кусджытæ систематикон æгъдауæй сæ квалификаци фæбæрзонддæр кæнынмæ ацæуынц курсытæм. Тагъд ветеринарон лабораторийы кусджытæй цалдæр ацæудзæн уырдæм, цæмæй сæ сæ коллегæтæ сахуыр кæной, ногæй цы ифтонггӕрзтӕ æрластой, уыдоныл кусын.
Уазæгты Марфа
Comments are closed, but trackbacks and pingbacks are open.