Нæ республикæйы сывæллæтты республикон рынчындонмæ Цæгат Ирыстон-Аланийæ æрцыдысты медицинон кусджытæ, специалисттæ – неонатологтæ. (Неонатолог – ноггуырд сывæллæтты дохтыр) Уый тыххæй нын фехъусын кодтой Республикæ Хуссар Ирыстоны Æнæниздзинад хъахъхъæнын æмæ социалон рæзты министрады пресс-службæйы.
«Дыууæ неонатологы Цæрыкъаты Зæринæ æмæ Дзотты Лаурæ кусдзысты сывæллæтты республикон рынчындоны, цæмæй бынæттон медицинон кусджытæн баххуыс кæной неонаталон куысты хъуыддаг фæхуыздæр кæнынæн. Æрхонгæ специалисттæ ахуыр кæндзысты бынæттон неонатологы», – загъта пресс-службæйы кусæг.
Уый ма куыд загъта, уымæ гæсгæ ма æндæр бæрзондквалификациджын специалист – анестезиолог-реаниматолог, кæцы æрæджы æрцыд нæ республикæмæ, райдыдта кусын сывæллæтты рынчындоны. «Дохтыр анестезиолог-реаниматолог Гасситы Зауыр – йе ʻмкъай Дзотты Лаурæимæ иумæ æрцыдысты Цæгат Ирыстонæй. Æхсызгонæй банысан кæнинаг у уый æмæ нæ республикæмæ кусынмæ кæй æрцыдысты æнæхъæн бинонтæй, уый», – банысан кодтой ведомствойæ.
Пресс-службæйы ма куыд загътой, афтæмæй сывæллæтты республикон рынчындоны хирург Алексей Бубин æрæджы райдыдта йæ хуссарирыстойнаг коллегæты ахуыр кæнын лапароскопийыл архайын. Уый æрцыд Тюменæй. «Ацы дохтыр ныридæгæн райдыдта исын чысыл пациентты рынчындоны поликлиникæйы хайады. Лапароскопийыл кусыныл уæрæсейаг специалист цайдагъ кæндзæнис нæ хирургты æмæ кæстæр медперсоналы. Ацы аппараты дохтыр æрласта йемæ æмæ æвæрд æрцыд», – загътой пресс-службæйы. Куыд ма нын фехъусын кодтой, афтæмæй тагъд рæстæджы нæ республикæмæ æрцæудзысты æндæр профилы специалисттæ дæр.
Банысан кæнын хъæуы уый æмæ уæрæсейаг дохтыртæ нæ республикæмæ кæй æрцæуынц æнæниздзинад хъахъхъæныны къабазы уæрæсейаг специалисттимæ æмархайды сæрмагонд программæмæ гæсгæ.
Comments are closed, but trackbacks and pingbacks are open.