Бибылты Анатоли хайад райста фыдохы мадзæлтты

Республикæ Хуссар Ирыстоны Президент Бибылты Анатоли хайад райста Донецкы Адæмон Республикæйы сæргълæууæг Александр Захарченкойы амæлæты дыууиссæдз боны охыл, Хуыцаумæ цы бакуывд æмæ фыдохы митинг уагъд æрцыд уым.

Донецкы информагентад куыд хъусын кæны, афтæмæй мадзалы хайад райстой Донецкы Адæмон Республикæйы къухдариуæггæнæджы хæстæ æххæстгæнæг Денис Пушилин, Луганскы Адæмон Республикæйы сæргълæууæджы хæстæ æххæстгæнæг Леонид Пасечник, афтæ ма УФ-йы Паддзахадон Думæйы æмæ Донецкы Адæмон Республикæйы Адæмон Советы депутаттæ, бынæттон хицауады минæвæрттæ, Захарченкойы хиуæттæ æмæ æмкусджытæ.

Фыдохы мадзæлттæ райдытой Хуыцаумæ бакуывдæй. Æрæмбырдуæвджытæ Донецкы сæргълæууæджы рухс ном ссардтой иу минут æдзæмæй алæугæйæ.

Пушилин куыд банысан кодта, афтæмæй Донецкы Республикæйыл Захарченкойы амæлæтæй æрцыд, баххæстгæнæн кæмæн нæй, ахæм зиан.

«Уый у æнæбаххæстгæнгæ зиан. Мах дарддæр хъуамæ тох кæнæм, Республикæйæ ахæм бæстæ саразын, Захарченкойы бæллиц цахæм бæстæмæ уыд æмæ цæмæ тырныдта», – загъта Пушилин.

Александр Захарченкойæн цы стыр бынат уыд киеваг режимимæ Донбасы сæрибар æмæ хæдбардзинады сæрыл тохы, уый ма банысан кодта Хуссар Ирыстоны Президент дæр.  «Захарченкойы ном уыдзæн куыд Республикæйы тырыса æмæ сæриабры символ», – загъта Бибылты Анатоли.

Бибылты Анатолийы ныхæстæм гæсгæ, Захарченко уыд патриот, йæ адæмы, йæ республикæ уарзта æмæ тырныдта йæ хорз фæрныг цардмæ.

«Уый уыд тынг ныфсджын, хъаруджын адæймаг, кæцыимæ æнцон уыд куыд кусын, афтæ ныхас кæнын дæр. Мах канд дыууæ республикæйы къухдариуæггæнджытау нæ ныхас кодтам, фæлæ куыд хæлæрттæ, афтæ дæр. Мах æнгом кодта, кæй зæгъын æй хъæуы, нæ республикæты æмхуызон истори, агрессоры, терроризмы, паддзахиуæгад сæндидзын кæныны истори», – банысан кодта Хуссар Ирыстоны Президент.

Мадзалы кæрон уагъд æрцыд дидинджытæ сæвæрыны церемони Захарченкойы ингæныл.