Цæцæйнаг кинокомпани «Грозный» исы Цхинвалы аивадон киноныв «Хъайтар». Ацы компани йæ куыст райдыдта Абхазы Республикæйæ. Уый фæстæ йæ адарддæр кæндзысты Хуссар Ирыстоны. Исæн къорды иуæй-иу хайадисджытæ куыд загътой, афтæмæй ацы дыууæ республикæйы баззадис хæсты фæдтæ æмæ уымæ гæсгæ кинонывы æфсæддон архæйдтытæ ист цæудзысты махмæ.
Кинонывы райдианы æвдыст цæудзысты Цæцæны республикæйы æфсæддон архæйдтытæ, уыцы хаймæ хаст æрцæудзысты Хуссар Ирыстон æмæ Абхазы ист кадртæ.
Режиссер Руслан Магомадов куыд загъта, афтæмæй сын Цæцæны Республикæйы иуæй-иу кадртæ сисæн нæ уыд. Уымæн æмæ сæм пырх бæстыхæйттæ нал ис. Хæстон архæйдтыты моменттæ сисынвæнд скодтой Сухум æмæ Цхинвалы.
Сюжеты дзырд цæуы æвзонг нывгæнæджы историйыл, кæцы цæры Парижы, фæлæ фæстæмæ æрыздæхт йæ фыдыбæстæмæ, Цæцæнмæ, цæмæй ссара йе сфæлдыстады иууыл фыццаг ныв. Дарддæр дзырд цæуы ацы лæппуйы хъысмæтыл, кæцы схъомыл ис фыццаг æмæ дыккаг цæцæйнаг компаниты ‘хсæн. Уый фæстæ уый ссис зынгæ нывгæнæг, æмæ сценаримæ гæсгæ, ныртæккæ цæры Европæйы. Уымæн ис æнтыстджын карьерæ, царды йын бантыст бирæ саразын – равдыстытæ, йе сфæлдыстадæн ис бирæ табугæнджытæ.
Кинонывы сценарист æмæ продюсер у Зелимхан Изиев: «Куыддæриддæр Хуссар Ирыстоны нæ куыст бакæнæм, афтæ дарддæр киноныв исдзыстæм Европæйы. Куыстытæ бакæнын нæ зæрды ис ацы мæйы кæронмæ. Уый фæстæ æрæвналдзыстæм æппæт ист æрмæг монтаж кæнынмæ. Киноныв уæрæх прокаты рацæудзæн иннæ аз».
Кинойы нывтæ сисынæн пайда цæуы Цхинвалы раздæры автобустæ цалцæггæнæн заводы территорийæ. Исæн къордæн æххуыс кæнынц бынæттон организацитæ æмæ ведомствотæ – Культурæйы министрад, Сырх Дзуары комитет æмæ Уæлвæткон уавæрты министрады зынгсирвæзты ныхмæ тох кæныны кусджытæ. Хуссар Ирыстоны киностуди «Allonfilm»-ы директор Мамиты Григори куыд загъта, афтæмæй уыдон дæр сæ цæцæйнаг коллегæтæн æххуыс кæнынц, куыд сæ бон у, афтæ.
Comments are closed, but trackbacks and pingbacks are open.