Цхинвалы районы Культурæйы управленийæ хистæр Гаглойты Ростислав, алы хатт дæр æндæр æмæ æндæр культурон æмæ бæрæгбонон мадзæлттæм бацæттæ кæны лæмбынæг, æмæ барухс кæнынц сценæмæкæсджыты зæрдæтæ. Гаглойы фырты разамындæй Республикæ Хуссар Ирыстоны бонмæ районы культурæйы кусджытæ дæр сæхи бацæттæ кодтой æмбæлон уагыл.
Хъæлдзæг æмæ цины бæрæгбон банысан кодта Къостайыхъæуы Культурæйы хæдзар дæр (йæ директор Мамиты Дзерассæ). Æрæмбырдуæвджытæн уый ракодта зæрдиаг арфæтæ, бафæндыд æй уыдонæн, цæмæй сабыр арвы бын кæддæриддæр амондджынæй æрвитой нæ республикæйы бæрæгбон. Хъæууон администрацийы сæргълæууæг Бигъуылаты Олег та æрдзырдта не ‘взонг республикæ йæ сырæзтæй фæстæмæ кæй цæуы рæзты фæндагыл. Бæрæгбон циндзинадæй фидауы æмæ сæхи арæхстджынæй равдыстой бынæттон хæдархайгæ къорды уæнгтæ. Разамынд ын кæны йæ хъуыддаджы дæсны Куыдзеты Янæ. Уый æвзонг æххæстгæнджытимæ нырма кæд бирæ рæстæг нæ кусы, уæддæр ын ис æнтыстытæ. Концертдзаутæ æхсызгонæй бакастысты «Æнæнкъуысгæ кафт», «Хонгæ», «Чызджыты кафт», «Ерысы кафт», «Аджайраг кафт», «Ерысы кафт» æмæ æндæртæм. Сæ ралæудæй сценæмæкæсджыты зæрдæтæ барухс кодтой Цъæхилты Вадим, Хуыбиаты Аслан, Азæмæт, Саулохты Ланæ, Джиоты Кристинæ, Хуыбиаты Миланæ, Марат æмæ æндæр кæфтытæм. «Æнæнкъуысгæ кафт» тынг зæрдæмæдзæугæ сæххæст кодтой Мæлдзыгаты Аслан æмæ Джиоты Миланæ. Уымæй дарддæр ма ахуырдзаутæ кастысты ирон поэтты æмдзæвгæтæ. Концерты хъуыстысты дæсны фæндырдзæгъдæг Дудайты Сæрмæты цæгъдтытæ.
Культурæйы хæдзар æмæ хъæууон библиотекæйы ( йæ сæргълæууæг Бæззаты Маринæ) кусджытæ æвзонг артисттæ уый фæстæ та, 20 сентябры – районы культурæйы иннæ кусджытимæ хайад райстой, горæт Цхинвалы цы цымыдисон ирон хæринæгты къæбиц равæрдтой, уым. Уыдон се ‘ппæт дæр сæхи бацæттæ кодтой зæрдиагæй æмæ сæ бæркадджын ирон фынгæй алы æрбацæуæгæн дæр уыдысты фысымтæ.
ХУЫБИАТЫ Никъала
Comments are closed, but trackbacks and pingbacks are open.