Кæд æмæ уæгъдибар хъæбысхæстæй Уæрæсейы Федерацийы æмбырдгонд командæйы уæлахизхæссæг ралæудтытæм стыр хайбавæрд хæссы йæ сæйраг тренер Тедеты Дзамболат, уæд грекъаг-римаг стилмæ та уæрæсейаг хъæбысæйхæцджыты æнтыстытæм уæзгæ хайбавæрд хæссы нæ иннæ æмзæххон Куымæридтаты Вадим. Уый 18 августы банысан кодта йæ 50-азы юбилей.
Вадим 2006 азы нысан æрцыд грекъаг-римаг хъæбысхæстæй Уæрæсейы Федерацийы æмбырдгонд командæйы хистæр тренерæй. Уый ма у командæйы генералон менеджер дæр.
Куымæридтаты Вадим райгуырд 1970 азы 18-æм августы горæт Цхинвалы. 10-аздзыдæй райдыдта архайын уæгъдибар хъæбысхæстæй Джиоты Руфины къухдариуæгады бын, кæцы фæхатыд йæ сыхаг лæппуйы хорз физикон бæрæггæнæнтæ æмæ йæ йæхимæ фæхуыдта тренировкæтæ кæнынмæ. Лæппуйæн хъæбысхæст фæцыд йæ зæрдæмæ, æмæ цымыдисæй аныгъуылд спортивон архайды. Æвзонг спортсмены тренер йæхицæн æхсызгонæй банысан кодта, зæгъгæ, Вадимæн хорз æнтысы хъæбысхæсты техникæ – дæсныйады бындуртæ сахуыр кæнын. Уыимæ тынг ахсджиаг уыд уый дæр, æмæ Куымæридтаты Вадим тынг бæрнон ахаст кæй дардта йæ тренировкæтæм.
«Вадим мæм тренировкæ кæнынмæ æрбацыд 4-æм къласы куы ахуыр кодта, уæд. Уый уыд тынг курдиатджын сывæллон æмæ йæ уайтагъд бамбæрстон, хорз сомбон ын кæй уыдзæн, уый. Алы хатт дæр уыдтæн йæ фарсмæ, æххуыс ын кодтон алыварсонæй. Уый цæвиттойнаг уыд æрмæст гауызыл нæ, фæлæ ма уымæй æддейæ дæр. Уымæ гæсгæ йæ снысан кодтон командæйы капитанæй. Бантыст ын Советон Гуырдзыстоны чемпионат рамбулын. Ныр ацы бынаты кусгæйæ, уый стыр æххуыс кæны, уым цы ирон лæппутæ тренировкæ кæнынц, уыдонæн», – загъта Джиоты Руфин.
«Куымæридтаты Вадим у аккаг адæймаг, кæцы бахаудта грекъаг-римаг хъæбысхæстæй Уæрæсейы æмбырдгондмæ, цыран уый равдыста бæрзонд профессионалондзинад. Банысан кæнын мæ фæнды уый дæр, æмæ йæ рæстæджы кæй архайдта уæгъдибар хъæбысхæстæй. Йæхи равдыста куыстуарзаг æмæ фæндвидарæй, фæлæ алкæмæн йæ бон не свæййы стыр фæстиуджытæ къухты бафтын кæнын, фæлæ Вадимы ном фыст æрцыд спортивон хъæбысхæсты историйы. Ахæм адæймæгты фæрцы дунейы чемпионатты æмæ Олимпион хъæзтыты рамбулынц сыгъзæрин майдантæ. Иууыл сæйрагдæр та у, Вадим йæ хуыддаг кæй уарзы æмæ командæйы лæппутæ сæ хистæрæй райгонд кæй сты, уый. Арфæ кæнын Вадим æмæ йæ бинонтæн, мæ зæрдæ йын зæгъы йæ разы æвæрд хæстæ сæххæст кæнын», – загъта уæгъдибар хъæбысхæстæй УФ-йы æмбырдгонд командæйы сæйраг тренер Тедеты Дзамболат.
«Æз æмбырдгонды куынæ ма уыдтæн, уæд уый уыд командæйы хистæр æмæ-иу мын дзырдта Олимпион чемпион кæй суыдзæн, уый тыххæй. Алыхатт дæр мын æххуыс кодта. Райдайгæ спортмсен куы уыдтæн, уæд мын арæзта æппæт дæр, цæмæй-иу хайад райстаин национ командæйы сборты æмæ мын афтæмæй уавæртæ арæзта мæхи равдисынæн. Номхуындæй мын уæд фæцис гæнæн æмбырдгонды лидертимæ тох кæнынæн æмæ-иу мæ къухты бафтыд рамбулын. Фæхатыд мæ командæйы сæйраг тренер дæр. Вадим у мæ хæлар æмæ æфсымæр. Уый у национ командæйы æнæфæхицæнгæнгæ хай. Æз æмбырдгонд командæйы æнæ Вадим нæ уынын», – загъта 2012 азы Олимпион хъæзтыты уæлахиздзау, РЦИ-Аланийы спорты министр Хуыгаты Алан.
«Куымæридтаты Вадим у командæйы егъау хай. Уый цæры æмæ улæфы хъæбысхæстæй, командæйæн аразы æппæт уавæртæ дæр. Афтæ ма у иузæрдион æмæ æууæнкджын адæймаг, кæцы æхсæвæй бонæй кусы æмбырдгонды хæрзиугæнæн. Нысан кæны йæ 50 азы юбилей æмæ йын мæ цæст уарзы фидар æнæниздзинад æмæ царды æппæт хæрзиуджытæ», – загъта грекъаг-римаг хъæбысхæстæй Уæрæсейы æмбырдгонд командæйы капитан Роман Власов.
Цхинвайлаг тренер хайад райста УФ-йы æмбырдгонд командæйы æртæ Олимпион циклы – Пекины Олимипион хъæзтыты (2008 аз), Лондоны (2012 аз) æмæ Риойы (2016 аз), цыран грекъаг-римаг стилы уæрæсейаг хъæбысæйхæцджытæ рамбылдтой 7 сыгъзæрин, 2 æвзист æмæ 3 бронзæ майданы. Уымæй дарддæр ма уыдон бирæ хæттыты систы дунейы, Европæйы æмæ алыгъуызон дунеон егъау турнирты уæлахиздзаутæ æмæ призертæ. Уæрæсейы спортивон хъæбысхæсты рæзтмæ йе стыр хайбавæрд æмæ иууыл бæрзонддæр æмвæзады дунеон ерысты уæрæсейаг хъæбысæйхæцджыты æнтыстджын ралæудтытæ хынцгæйæ, Куымæридтаты Вадимæн саккаг кодтой «Уæрæсейы сгуыхт тренер», «Республикæ Цæгат Ирыстон-Аланийы физикон культурæ æмæ спорты сгуыхт кусæг»-ы кадджын нæмттæ, хорзæхджын æрцыд «Фыдыбæстæйы раз лæггæдты тыххæй» II-аг къæпхæны майданæй, «УФ-йы Президенты арфæйы фыстæгæй», «Николай Озеровы», «Уæрæсейы спорты рæзтмæ хайбавæрды тыххæй», РЦИ-Аланийы «Ирыстоны кадæн»-ы майдантæй æмæ РХИ-йы «Хæлардзинады Орденæй». Афтæ ма хорзæхджын æрцыд Уæрæсейы Федерацийы Спорты министрады «Отличник физической культуры и спорта»-йы риуылдарæн нысанæй, УФ-йы Олимпион комитеты «За заслуги в развитии олимпийского движения в России»-йы кадджын нысанæй.
Мах дæр арфæ кæнæм Вадимæн йæ юбилейы цытæн. Нæ зæрдæ йын зæгъы фидар æнæниздзинад æмæ ноджы стырдæ æнтыстытæ йæ архайды.
ХУРИТЫ Батрадз
Comments are closed, but trackbacks and pingbacks are open.