5-æм сентябры йе 60 азы юбилей банысан кодта зындгонд ирон хъæбысæйхæцæг æмæ политик, дунеон спорты легендæ Фадзайты Арсен Сулейманы фырт. Уый у Олимпион хъæзтыты дыууæ хатты чемпион (1988, 1992), дунейы æхсæз хатты чемпион, Европæйы цыппар хатты чемпион, дунейы Кубокы хицау, историйы мидæг «Золотая борцовка»-йы фыццаг призы хицау (1985), турнир «Дружба-84»-йы уæлахиздзау, ССР Цæдисы адæмты Спартакиадæйы чемпион (1983).
Фадзайты Арсен райгуырдис Цæгат Ирыстоны Ирæфы районы Чиколайы хъæуы. Уый 14-аздзыдæй уæгъдибар хъæбысхæстæй цæттæ кодта зындгонд сгуыхт тренер Бичилов Рамзан. Фæстæдæр Арсен йæ тренировкæтæ адарддæр кодта ССР Цæдисы сгуыхт тренер Дедегкаты Хъазбегмæ. 1985 азы каст фæцис Узбекистаны паддзахадон институты физикон культурæйы факультет æмæ 1997 азы та – Цæгат Ирыстоны паддзахадон институт.
Фидæны чемпион курдиатджын кæй уыдис æмæ спорты бæрзæндтæм кæй схиздзæнис, уыцы æвзыгъддзинад æм рахатыдысты дыууæ тренер дæр æмæ йæ ноджы тынгдæр разæнгард кодтой спорты ацы хуызмæ, кæддæриддæр лæууыдысты йæ фарсмæ. Арсен спорты æцæгдæр разынд æнтыстджын. 1983 азæй 1989 азмæ легендарон спортсмен иу хатт дæр нæ фембылд йæ ныхмæлæуджытæн. Уымæ гæсгæ Фадзайы фырт 1991 азы нымад æрцыдис Советон Цæдисы хуыздæр спортсменыл. Йæ спортивон карьерæ куы фæцис, уæд 1993-1996 азты ссис ЦСКА-йы командæйы хистæр æмæ Уæрæсейы уæгъдибар хъæбысæйхæсты æмбырдгонд командæйы сæйраг тренер. 1997 азы ма уый Дзæуджыхъæуы бакодта уæгъдибар хъæбысхæсты клуб «Аланы». Уыцы клуб схъомыл кодта æмæ рауагъта, дунейæн зындгонд чи систы, уыцы ирон богалты плеядæ. Уыдоны æхсæн сты Таймæзты А., Фæрниаты И., Гацалты Х. æмæ æндæртæ.
Фадзайты Арсенæн æнтыстытæ ис политикæйы дæр. Уый уыд Уæрæсейы Федерацийы Паддзахадон Думæйы цыппæрæм æмæ фæндзæм æрсидтыты депутат. 2003-2007 азты та уыд Паддзахадон Думæйы физикон культурæ, спорт æмæ фæсивæды хъуыддæгты фæдыл комитеты сæрдары хæдивæг. 2004-æм азæй нысангонд æрцыд Паддзахадон Думæйы Цæгат Кавказы проблемæты фæдыл къамисы уæнгæй. Ныртæккæ уый у Уæрæсейы Федерацийы Советы уæнг Республикæ Цæгат Ирыстон-Аланийæ. Уымæй дарддæр ма Фадзайы фырт у Уæрæсейы спортивон хъæбысхæсты Федерацийы вице-президент дæр.
Фадзайты Арсены ном дардыл хъуыстгонд у. Уымæй дæнцæг исынц Ирыстоны мингай æрыгон спортсментæ. Йæ ном сыгъзæрин дамгъæтæй фыст æрцыд спортивон историйы. Фадзайты Арсен куыд зынгзæрдæ патриот, афтæ кæддæриддæр активонæй архайдта Хуссар Ирыстоны хæдбардзинад банымайыныл. Уымæ гæсгæ йын нæ газеты редакци хуссарирыстойнаг адæмы номæй арфæ кæны йæ 60 азы юбилейы цытæн. Нæ зæрдæ йын зæгъы фидар æнæниздзинад æмæ æнтыстытæ йæ куысты мидæг.
ЦХУЫРБАТЫ Ларисæ
Comments are closed, but trackbacks and pingbacks are open.