ХИПУ-йы конференц-залы ауагъд æрцыдис, чиныг «Начальное учение человеком хотящимся учится книг божественного писания»-йы рацыдыл 220 азы кæй сæххæст, уый цытæн мадзал. Мадзал бацæттæ кодта университеты ректорат æмæ ирон филологийы деканат. Хайад дзы райстой университеты лектортæ, студенттæ, скъолаты ахуыргæнджытæ, культурæйы æмæ ахуырады минæвæрттæ. Мадзал райдыдта зæдтæ æмæ хуыцаумæ кувыны инсценировкæйæ. Уый фæстæ «Зарæг Хуыцауыл» сæххæст кодт Цхинвалы Чырыстон аргъуаны кусджытæ æмæ университеты студентты иу къорд. Зонадон хайы размæ ма мадзалы музыкалон номыртæ сæххæст кодтой ХИПУ-йы кафджыты къорд «Сæрмæт», гуымсæгыл цæгъдджыты къорд, паддзахадон ансамбль «Айзæлд». Цхинвалы музыкалон ахуыргæнæндоны фæндырдзæгъдæг Къæбысты Сæрмæт та фæндырыл аив сæххæст кодта цалдæр ирон музыкалон номыры.
Университеты ректор Тедеты Вадим банысан кодта, зæгъгæ, Хетæгкаты Къостайы фыст спектакль «Фатимæ»-йы фæстæ исты ахæм цымыдисон фендзынæн уый мæ уырнгæ дæр нæ кодта. Сæ арæхстдзинады тыххæй бузныг зæгъын куыд спектаклы архайджытæн, афтæ ма кафджыты къордæн дæр.
Вадим ма арфæйы ныхæстæ загъта мадзал бацæттæгæнæг æмæ уадзæг ирон æвзаг æмæ литературæйы кафедрæйы декан Тыбылты Ингæйæн.
Йæ раныхасы ирон литературæйы историйы хистæр ахуыргæнæг Плиты Серго банысан кодта, зæгъгæ, абоны равдыст у ахуырад æмæ хæрзæгъдаудзинады хъомыладон мадзал, монон культурæ парахатгæнæн архайд. Сергойы хъуыдымæ гæсгæ хъомылад æмæ ахуырад абон сценæйыл равдыстой, зонад уидæгтæ æмæ таутæ кæцæй рауагъта, уыцы дуджы. Æрмæстдæр ахæм ахуырадон-методикон амæлттæй баххæст кæндзыстæм рæзгæ фæлтæры удварн хъомыладон хæрзиуджытæй.
Университеты ирон литературæйы историйы кафедрæйы сæргълæууæг, профессор Плиты Гацыр та йæ раныхасы банысан кодта, зæгъгæ, абоны мадзалмæ цы бирæ адæм æрбацыд, уыдон æнкъарынц æнцой æмæ æхсызгондзинад. «Æмæ уый афтæ дæр хъуа-мæ уа. Уымæн æмæ абон мах цы чиныджы кой кæнæм, уымæй райдыдта ирон фыссынад. Цæмæй ахæм чиныг рацыдаид уыцы хæс бабæрн кодтой Такъаты Гайозæн. Уый та йæхицæн æххуысгæнæгæй равзæрста сауджын Хъесаты Паулейы. Чиныг бирæ фæахъаз нæ адæмæн. Уæдмæ кæсын – фыссынмæ тырнджытæ уыдысты хæрз цъус. Уый фæстæ азæй азмæ кодтой фылдæр. Цасдæрбæрцæй зæгъæн ис æмæ уæлдæр загъдгонд чиныджы фæрцы, сæ фыццаг къахдзæфтæ æвзаг æмæ литературæйы сарæзтой ахæм зындгонд гоймæгтæ, куыд Æгъуызаты Иуане, Мамсыраты Темырболат, Хъаныхъуаты Инал, Хетæгкаты Къоста, Гæдиаты Секъа, Гæдиаты Цомахъ, Къубалты Александр æмæ æндæртæ. Уыдон се ‘ппæт дæр архайдтой æмæ хъæздыгæй хъæздыгдæр кодтой ирон æвзаг æмæ ирон аив дзырды хæзнадон», – загъта уый.
Гацыр ма æрсидт, цæмæй фыццаг не ‘взагæн базонæм аргъ кæнын, уый фæстæ та йæ, куыд æмбæлы афтæ бауарзæм æмæ йæ амонæм нæ кæстæртæн.
Æвзагыл дзургæйæ ма Плиты Гацыр банысан кодта, зæгъгæ,- цы ирон уырыссагау нæ зоны уый ирон нæу æмæ цы ирон иронау нæ зоны уый та йæхи ирон ма хъуамæ хона. Уымæн æмæ, зæгъгæ, æвзаджы нæ зонын йæ фæдыл сайы æгъдæутты ницæмæ дарын дæр.
Мадзалы ма раныхас кодтой университеты ирон æвзаг æмæ æвзагзонынады кафедрæйы сæргълæууæг, професор Битарты Зоя, Галаты Барисы номыл хæдзар-музейы разамонæг Гæбæраты Андрей æмæ æндæртæ. Андрей ма университетæн балæвар кодта 100 рагон ирон зарæджы бæрц.
ГÆЗЗАТЫ Иван
Comments are closed, but trackbacks and pingbacks are open.