2-æм октябры информацион агентад «Спутник Хуссар Ирыстон»-ы пресс-центры уазæг уыд Республикæ Хуссар Ирыстоны Æнæниздзинад æмæ социалон рæзты министры хæдивæг Сиукъаты Родион. Уый журналисттæн радзырдта, сæ куысты ахсджиаг кæй у адæмæн анкетæтæ бакæныны хъуыддаг. «Июлы мæйы мах ауагътам пилотон проект анкетæтæ саразыны тыххæй Знауыры районы централон рынчындоны базæйыл. Анкетæтæ бакæныны хъуыддаг уагъд цыдис дыууæ кары категориты æхсæн – 40-аздзыд æмæ уымæй уæлæмæ кары адæймæгтæн. Сæйраджыдæр уый уыдис хроникон, инфекцион, наркотикон æмæ психотропон буарадтæ сбæрæг кæныны тыххæй. Мах ныридæгæн бацæттæ кодтам 11 мин анкетæйы æмæ ма нæ зæрды ис, æнгæс куыст бакæнын нæ республикæйы иннæ районты дæр. Ацы куысты нын æххуыс кæнынц районты фельдшерон-акушерон пункты медицинон кусджытæ.
Банысан кæнын хъæуы уый, æмæ алы пациентмæ дæр кæй уыдзæн индивидуалон ахаст. Уымæй дарддæр ма мах сбæлвырд кæндзыстæм ФАП-ты медицинон кусджытæн сæ профессионалон æмвæзад», – банысан кодта Сиукъаты Родион.
Уый ма куыд банысан кодта, афтæмæй анкетæкæнынад практикон æгъдауæй аххæсдзæн Хуссар Ирыстоны хистæр кары адæмыл æмæ уыдзæн барвæндонæй.
Нæ уацх.
