20 бинонтæ уал райстой фатертæ, абон æмæ райсом сæ нымæц дзæвгар фæфылдæр уыдзæн
Нæ горæты цæрджытæй 20 бинонтæ Ног азыл стыр цины æнкъарæнтимæ сæмбæлдзысты. 27-æм декабры Ирæтты уынгыл цы цыппар бирæуæладзыгон хæдзары арæзт æрцыд, уым ног цæрджытæн фатерты дæгъæлтæ цытджын æгъдауæй радта горæты администрацийы цæрæнуатон къамис. 27 декабры фатертæ чи райстой, уыдон сты, фыццаг рады номхыгъдмæ чи хауы, ахæм æмæ æндæр категориты номхыгъдæй адæм.
Хæдзæрттæ уæрст цæудзысты ног азмæ æмæ ма стæй бæрæгбоны фæстæ дæр. Ацы микрорайоны æдæппæт сырæзт 220 фатеры – иу, дыууæ æмæ æртæхатæнонтæ. Уыдонæй уал 80 хицæуттæ сты зындгонд. Къамис алкæй уавæр дæр хицæнæй лæмбынæг сахуыр кодта æмæ уагæвæрдæн дзуапп чи нæ лæвæрдта, уыдоны номхыгъдæй ацух кодтой.
Ног фатерты хицæуттæн раарфæ кодта горæты мэр Хуыгаты Ромео. «Цалдæргай азтæ æнхъæлмæ фæкастыстут ацы райдзаст бонмæ, хъизæмайраг царды фæстæ, ныр уæ Ног аз банысан кæндзыстут рæсугъд, райдзаст, цæрынæн комфортон уавæртæ кæм ис, ахæм хæдзæртты æмæ сæ амондджынæй цæрут. Кæстæрарæх уæнт уæ хæдзæрттæ».
Ног фатерты хицæуттæй сæ иу Цхуырбаты Сони йæ циндзинад адих кодта махимæ: «Бузныг нæ Президентæн, уый стыр хъусдард аздæхта, цæмæй къамис, закъонмæ гæсгæ, æцæгæйдæр, кæмæ æмбæлы, уыдоныл байуара фатертæ. Æз дæн æртæ сывæллоны мад, иууылдæр цардыстæм иухатæноны. Нæ уавæртæ фæхуыздæр кæныны тыххæй рады лæууæм 15 азæй фылдæр. Мæн æмæ мæ хуызæн – бирæ чи фенхъæлмæ каст, уыдонæй бæргæ алкæйы дæр фæндыд, тагъд райсын фатер, фæлæ ахæм хъуыддæгтæн æвиппайды аразæн нæй. Куыд зонæм, афтæмæй дарддæр дæр арæзт цæуы цæрæнуæттæ æмæ ахæм цæсгомджын къамис куы уа, уæд æнæхъусдардæй ничи баззайдзæнис, цæрынæн æмбæлон уавæртæ кæмæн нæй, уыдонæй иу æмбæстаг дæр нæ баззайдзæнис æнæ фатер. Гаглойты Аланæн йæ архайд адæмы хæрзæбонæн у æмæ йæ адæмы хорзæх уæд. Мах зæрдæтæ куыд барухс сты, афтæ рухс цард кæнæд йæхæдæг дæр».
Цалынмæ ног фатерты хицæуттæ сæ цæрæнуæттæм нæ бахызтысты, уæдмæ сæ Администрацийы сæрдар Хуыгаты Ромео бафæдзæхста, цæмæй сæ подъездты чиптæ æддагон адæммæ ма дæдтой, науæд гæнæн ис æмæ æнæзакъонæй исчи бацахса фатертæ. Цæмæй ахæм цаутæ ма æрцæуа, уый тыххæй подъездты бахизæнты лæудзысты æхсæнады фæткхъахъхъæнæг милиционертæ. Хуыгаты Ромео ма бафæдзæхста цæрджыты, цæмæй раздæр цы бынæтты цардысты, уым бафидой сæ коммуналон фиддонтæ.
Банысан кæнын хъæуы уый дæр, æмæ 2024 азы ацы районы ноджыдæр арæзт кæй æрцæудзæн иу бирæуæладзыгон 75 фатерон хæдзар.
УАЗÆГТЫ Марфа
