Ирыстоны хихъæппæрисады рæзтыл, æрыгон курдиатджын фæсивæдæн се сфæлдыстадон гæнæнтыл зæрдиагæй чи ауды, ирон аивады уыцы артдзæстытæй иу у Адæмон сфæлдыстады республикон хæдзар.
Æрæджы та йæ кусджытæ бацæттæ кодтой æмæ мыхуыры рауагътой альманах. Йæ фыццаг номыр райдайы РЦИ-Аланийы Культурæйы министр Къубалты Эльбрусы, ЮНЕСКО-йы хъуыддæгты УФ-йы къамисы материалон чи нæу, уыцы хæзнатæ бахъахъхъæныны фæдыл комитеты сæрдар Пуртова Тамарæйы æмæ Адæмон сфæлдыстады республикон хæдзары директор Лалыты Хъазыбеджы арфæтæй.
Уыдоны зæрдиаг фæндиæгтæй уæлдай амынд цæуы альманахæн йæ нысан хихъæппæрисадон къордты архайд æмæ Адæмон сфæлдыстады хæдзары алы хайады куыст, сæ методисттæ афæдзы дæргъы цы мадзæлттæ аразынц, уыдон дзы лæмбынæгæй æвдисын сæ бон кæй у, уый.
Дарддæр дзы бакæсæн ис Адæмон сфæлдыстады хæдзары методистæй, фæстæдæр та – хайады сæргълæууæгæй кусгæйæ, Ирыстоны аивады æмæ культурæйы рæзтæн стыр хæрзты чи бацыд, уыцы арфæйаг адæймæгтæй иу – УФ-йы культурæйы сгуыхт кусæг Гæбуты Зояйы царды æмæ рухстауæн архайды тыххæй очерк. Йæ автор – УФ-йы Фысджыты цæдисы уæнг, поэт, публицист Дауыраты Зоя.
Адæмон сфæлдыстады республикон хæдзар кæддæриддæр йæ хæсыл нымадта хихъæппæрисадон къордтæй уæлдай адæмон театртæн æмæ драмон къордтæн æххуыс кæнын. Ахæм рухсадон къордтæ Ирыстоны фыццагдæр кæм фæзындысты, уыцы хъæутæй иу у Ольгинскæ. Йæ аивадон разамонæг æмæ режиссер та уыд фыццаг ирон сылгоймаг-фыссæг, публицист Кочысаты Розæ. Йæ цард æмæ сфæлдыстадон архайды тыххæй фыссы зындгонд журналист, радио “Алани”-йы амонæг Налдыхъуаты Зæлинæ. Йæ уац “Ирон драматургийы уарди” йын бакæсæн ис альманахы ацы номыры.
“Фæндыр – йæ царды цин”, зæгъгæ, уыцы автор та у курдиатджын публицист æмæ журналист Хестанты-Бутаты Победæ. Æмæ дзы лæмбынæгæй æвдисы УФ-йы адæмон артист, дирижер, фæндырдзæгъдæг Гæздæнты Булаты цард æмæ бирæвæрсыг сфæлдыстадон архайд.
Нæ республикæйы районты æмæ Дзæуджыхъæуы культурæйы артдзæстыты сæргъы бирæ азты цы сылгоймæгтæ лæууы, уыдоны куысты æмæ царды цымыдисагдæр цауты тыххæй очерктæ мыхуыргонд цæуынц ацы альманахы сæрмагонд рубрикæйы.
Адæмон сфæлдыстады хæдзарæн бындур æвæрд куы æрцыд, уæдæй абонмæ йæ методистты æмæ æппæт кусджыты ‘хсæн фидар у сфæлдыстадон бастдзинад. Кæрæдзийæн алы хъуыддаджы дæр сты æххуысгæнæг. Абон дзы адæмон сфæлдыстады æмæ культурæйы рæзтыл чи ауды, уыцы методистты æмæ иумæйагæй адæмон сфæлдыстады хæдзар æрæджыты цы аивадон изæртæ æмæ фестивалтæ сарæзта, уыдоны тыххæй дæр дзы бакæсæн ис мидисджын æрмæджытæ. Альманахы алы уацмæ дæр йæ хъуыдымæ гæсгæ лæвæрд цæуы хуызджын къамтæ.
Цард размæ кæй цæуы, уымæ гæсгæ Адæмон сфæлдыстады республикон хæдзары коллектив дæр æмдзу кæны рæстæгимæ æмæ йæ куыстмæ хæссы ногдзинæдтæ. Йæ методистты æмæ хихъæппæрисадон къордты куыст амæй фæстæмæ ацы мыхуырон органы фæрцы ноджы парахатдæрæй æвдыст кæй цæудзæн, ууыл дызæрдыг нæ кæнæм. Фæлæ æнæзæгъгæ нæй уый, æмæ алы рухстауæн артдзæсты мыхуыры фæрæзæн (фидиуæгæн) кæй вæййы сæрмагонд ном. Адæмон сфæлдыстады республикон хæдзары фидиуæджы фыццаг номыр рацыд æмæ уыцы сæрмагонд номæй. Хорз уаид, æмæ йæ куы рахониккой “Аивады гуырæнтæ” кæнæ “Удварны рухс”, “Фарны артдзæст”. Иумæйагæй та ацы альманах мидисджынæй ирон æмæ уырыссаг æвзæгтыл фыст æрмæджытимæ мыхуыры кæй рацыд, уый у раппæлинаг æмæ арфæйаг хъуыддаг.
ГАСАНТЫ Валери
Comments are closed, but trackbacks and pingbacks are open.