Æркастысты ахсджиаг фарстытæм

РХИ-йы Хицауады Сæрдары хæстæ æххæстгæнæг Бекъойты Геннади ауагъта кусæгон æмбырд Хъæууон хæдзарадон æмæ Экономикон рæзты министрадты къухдариуæггæнджытимæ, кæцыйы рæстæджы æркастæуыд 2021-2025 азты РХИ-йы агросæудæджерадон комплексы рæзты фадыгон программæ бацæттæ кæныны фарстытæм.

Бекъойты Геннади банысан кодта, зæгъгæ, документæн ис ахсджиаг нысаниуæг хъæууон хæдзарады дарддæры рæзты тыххæй, æмæ, кæй зæгъын æй хъæуы, иумиагæй республикæйы экономикæйæн.

«Хицауад бахæс кодта Хъæууон хæздарады министрадæн абоны экономикон тенденциты контексты æввахс фондз азмæ агросæудæджерадон комплексы рæзты паддзахадон фадыгон программæ бакусыны тыххæй. Бындурæн ын ист æрцыд 2030 азы онг РХИ-йы экономикон рæзты стратеги, цыран хынцыд æрцыдысты республикæйы агросæудæджерадон комплексы рæзты хицæндзинæдтæ. Программæ ис арæзты стадийы, бæрæг цæуынц йæ реализацийы сæйраг здæхтытæ æмæ механизмтæ, организацион мадзæлттæ, финанскæныны фарстытæ. Йæ бакусынмæ æрбаконд æрцыдысты экономикон рæзты министрады специалисттæ. Уæлдай хъусдард здæхт æрцыд хъæуты социалон рæзты, раздæр пайда кæмæй нæ цыд, уыцы хъæууонхæдзарадон зæххытæ кусын райдайын, ног куыстуæтты арæзтад, хъæууон хæдзарады инновацион потенциалæй спайда кæныны фарстытæм. Сæйраг хæстæй сæ иу у мелиоративон хызæгты рæзт», – загъта Хицауады Сæрдары хæстæ æххæстгæнæг æмæ банысан кодта, зæгъгæ, хицауады органты æмæ хъæууонхæдзарадон продукци уадзджыты раз æввахс фондз азы лæууы серьезон хæс-лæвæрдтæ хъæууон хæдзарад ног æмвæзадмæ ракæныны тыххæй.

Куыд банысан чындæуыд, уымæ гæсгæ программæйы нысæнттæ сты республикæйы агросæудæджерадон комплексы продукцийы сæйраг хуызты кондады гуырахсты рæзт сифтонг кæнын, республикæйы уагъдцæуæг аграрон продукцийы конкурентхъомдзинад дæлфадыгон здæхтыты, хæлцадон æмæ товаруадзæг сæудæджерады инновацион рæзты, товаруадзджытæн æххуыс кæнын, хъæууон территориты инфраструктурæйы рæзт, хъæууон цæрджытæн аккаг царды уавæртæ саразын, æрдзон ресурстæй пайда кæныны эффективондзинад фæбæрзонддæр кæныны фæрцы.